ម្ចាស់ជើងឯកក្របខណ្ឌ U.S Openនាង So Yeon Ryuបានបញ្ចប់ជុំទី៣ប្រកួតវាយកូនហ្គោល Australian Ladies Mastersដោយធ្វើបាន៣អាន់ឌ័រ ប៉ា ៦៩នាំមុខ៣ស្រ្តូកឈានចូលជុំផ្តាច់ព្រ័ត្រ។ ព្រឹត្តិការណ៍ប្រកួតនេះត្រូវបានរៀបចំធ្វើនៅទីក្រុង Gold Coastប្រទេសអូស្ត្រាលីកាលពីថ្ងៃសៅរ៍ទី៤ខែកុម្ភៈ ។ នាង Ryuដែលកាលពីជុំទី២ធ្វើបាន១១អាន់ឌ័រប៉ា ៦៩ឆ្លងកាត់ការប្រកួត៥៤រន្ធនៅទីលាន Royal Pinesធ្វើបានលទ្ធផល២០អាន់ឌ័រ ១៩៦។
ចំណែកកីឡាការិនីហូឡង់ Christel Boeljonធ្វើបានពិន្ទុ ៦៨ស្ថិតនៅចំណាត់ថ្នាក់លំដាប់ទី២ តាមពីក្រោយកីឡាការិនីកូរ៉េខាងត្បូង Kim Ha-neulនិងកីឡាការិនីអ៊ីតាលី Diana Luna។ អ្នកទាំង២បញ្ចប់ការប្រកួតក្នុងចំណាត់ថ្នាក់លេខ៣ស្ទួននិងមានគម្លាតពិន្ទុ៥ស្ត្រូកពីនាង Yeon Ryu។ នាង Frances Bondadសញ្ជាតិអូស្ត្រាលីដើមកំណើតអាមេរិកធ្វើបានល្អជាងថ្ងៃទី១និងទី២ជាមួយនឹងពិន្ទុ៦៣។ ជុំទី៣នេះនាងបានឡើងមកដល់ចំណាត់ថ្នាក់លេខ៥និងមានគម្លាតពិន្ទុតែ៧ស្ត្រូកប៉ុណ្ណោះពីនាងYeon Ryu។ នាងបានថ្លែងថា៖«នេះជាជុំដែលមានលក្ខណៈអំណោយផលល្អបំផុត។ លទ្ធផលនេះនឹងជួយឱ្យខ្ញុំដណ្តើមបានជ័យជម្នះក្នុងជុំផ្តាច់ព្រ័ត្រ»។ នាង Bondad ក្នុងការប្រកួតលើកនេះធ្វើបានពិន្ទុបឺឌីនៅ៥ឡូចុងក្រោយ ។
កីឡាការិនីអង់គ្លេស Laura Daviesធ្វើបានពិន្ទុ៧០ស្ថិតនៅគម្លាត១៧ស្ត្រូកពីនាង Yeon Ryu។ ឯម្ចាស់ជើងឯកកម្មវិធីនេះ៧ជំនាន់នាង Karrie Webbមិនបានចូលប្រកួតក្នុងសប្តាហ៍នេះទេ តែនាងនឹងចាប់ផ្តើមបើករដូវកាលថ្មីរបស់ខ្លួនក្នុងកម្មវិធី Australian Openនៅសប្តាហ៍ក្រោយ ៕
ចែករំលែកព័តមាននេះ