កីឡាការិនីអាមេរិកលីនសេ វ៉ុនបានសម្តែងក្តីរីករាយជាខ្លាំងបន្ទាប់ពីដណ្តើមបានជ័យជម្នះស្គីចុះជម្រាល World Cupជាលើកទី៩ប្រចាំរដូវកាលនិងជាលើកទី៥០ក្នុងអាជីពរបស់ខ្លួនក្រោយពីយកឈ្នះពានជើងឯកក្នុងកម្មវិធី Audi FIS Alpine Ski World Cup Women’s Downhillនៅទីក្រុង Garmisch-Partenkirchenប្រទេសអាល្លឺម៉ង់កាលពីថ្ងៃសៅរ៍ទី០៤កុម្ភៈកន្លងមកនេះ ។ ស្ថិតនៅលើទីលានប្រកួតKandaharដែលមានសីតុណ្ហភាពដក១៣អង្សាសេ នាងវ៉ុនដែលជាម្ចាស់ជើងឯកអូឡាំពិកបានបញ្ចប់ការប្រកួតក្នុងថិរវេលា១នាទីនិង ៤៤.៨៦វិនាទីនាំមុខកីឡាការិនីស្វ៊ីស Nadja Kamerដែលប្រើពេលច្រើនជាង០.៤១វិនាទីនិងឈ្នះនាង Tina Weiratherមកពីប្រទេសឡេតូនីដែលប្រើពេលច្រើនជាង០.៧៩វិនាទី ។
ថ្លែងបន្ទាប់ពីទទួលបានជ័យជម្នះ នាងវ៉ុនបានបញ្ជាក់ថា៖«វាជារឿងឆ្កួតៗខ្ញុំត្រេកអររកពាក្យនិយាយមិនបាន។ ជ័យជម្នះលើកនេះធ្វើឱ្យខ្ញុំទប់ទឹកភ្នែកមិនបាន។ សម្រាប់ខ្ញុំការយំពិតជាគ្រប់គ្រាន់ហើយក្នុងថ្ងៃនេះ។ ឈ្នះជើងឯកក្នុងកម្រិត World Cupជាលើកទី៥០ក្នុងអាជីពគឺពិតជាអ្វីមួយដែលធំធេងបំផុត។ ខ្ញុំចង់បានបែបនេះជាយូរមកហើយ»។ វាពិតជារឿងមួយកម្រដែលនាងលីនសេ វ៉ុនយកឈ្នះជើងឯកដល់ទៅ៥០លើកក្នុងអាជីព។ មានតែកីឡាការិនីពីរទៅ៣រូបប៉ុណ្ណោះដែលអាចធ្វើបានលើសនាងបន្តិចបន្តួចក្នុងនោះមានកីឡាការិនីអូទ្រីស Annemarie Moser-Proellឈ្នះ៦២លើក និងកីឡាការិនីស្វ៊ីស Vreni Schnerderឈ្នះ៥៥លើក ។
ដោយស្ថិតនៅក្នុងវ័យ២៧ឆ្នាំ នាងវ៉ុនចាស់ជាងនាងMoser-Proellបើគិតពីពេលដែលកីឡាការិនីរូបនេះយកឈ្នះជើងឯកជាលើកទី៦២ ប៉ុន្តែធៀបជាមួយនាងSchnerderវិញគឺនាងវ៉ុនក្មេងជាង ។ វ៉ុនបាននិយាយថា៖«គោលបងបំណងរបស់ខ្ញុំគឺចង់យកឈ្នះជើងឯកតែមួយប្រកួតទៀតប៉ុណ្ណោះ» ។ នៅលើតារាងជើងឯកពិភពលោក World Cup នាងវ៉ុនពេលនេះកំពុងតែនាំមុខគេដោយពិន្ទុ ៤៨២ ។ នាងកំពុងតែស្ថិតនៅលើផ្លូវដ៏ត្រឹមត្រូវមួយឆ្ពោះទៅរកការដណ្តើមយកតំណែងជើងឯកពិភពលោកពីនាង Hoefl-Riesch។ នាងបាននិយាយថា៖«ខ្ញុំតែងសប្បាយចិត្តគ្រប់ជ័យជម្នះរាល់លើក។ តែលើកទី៥០នេះធំជាងគេបំផុត។
ខ្ញុំគិតថា នេះគឺជាថ្ងៃដែលធ្វើឱ្យខ្ញុំងាកមើលក្រោយពីអ្វីដែលធ្វើបានក្នុងពេលកន្លងមក។ ខ្ញុំរៀនសូត្របន្តទៀត»។ នេះគឺជាជ័យជម្នះបន្តបន្ទាប់គ្នាបន្ទាប់ពីនៅប្រទេសស្វ៊ីសកាលពីចុងខែមករាកន្លងមក។ កាលពីរដូវកាលកន្លងទៅ នាងMaria Hoefl-Rieschបានបង្អាក់ដំណើររបស់នាងវ៉ុនក្នុងការគ្រងជើងឯក World Cupជាលើកទី៤ ។ ដោយឡែកនៅឆ្នាំនេះ លីនសេន វ៉ុនគ្មានអារម្មណ៍ដែលសង្ស័យថា ខ្លួនមិនអាចដណ្តើមជ័យជម្នះ World Cupលើកទី៤នោះទេ។ ពេលនេះនាងនៅខ្វះតែ១០០ពិន្ទុទៀតប៉ុណ្ណោះនឹងក្លាយជាជើងឯកពិភពលោកម្នាក់ ៕
ចែករំលែកព័តមាននេះ