នាងម៉ារីយ៉ា សារ៉ាប៉ូវ៉ារួមនឹងកីឡាការិនីមិត្តរួមជាតិរបស់ខ្លួននាង ស្វេតឡាណា គូនេតសូវ៉ាបានជួយឱ្យក្រុមរុស្ស៊ីនាំមុខលើក្រុមអេស្ប៉ាញ ២-០បន្ទាប់ពីពួកគេបានយកឈ្នះគូប្រកួតរៀងៗខ្លួនក្នុងជុំទី១កម្មវិធី Fed Cup។ ការប្រកួតនេះត្រូវបានរៀបចំធ្វើនៅទីក្រុងមូស្គូ ប្រទេសរុស្សុីកាលពីថ្ងៃសៅរ៍ទី០៤ខែកុម្ភៈកន្លងមកនេះ ។ នាងសារ៉ាប៉ូវ៉ាបានបំបាក់នាង Silvia Soler-Espinosaក្នុងលទ្ធផល ៦-២និង៦-១ខណៈនាងគូនេតសូវ៉ាយកឈ្នះនាងCarla Suarez Navarroក្នុងលទ្ធផល៦-៣និង៦-១ ។ អំឡុងពេលប្តូរសឺវីសគ្នាទៅវិញទៅមកពីដំបូង នាងសារ៉ាប៉ូវ៉ាបានយកឈ្នះពិន្ទុលើគូប្រកួត៤វគ្គជាប់ៗគ្នាក្នុងសិតទី១និងបន្ទាប់មកក្នុងសិតទី២នាងបានយកឈ្នះ៤វគ្គបន្ថែមទៀត។
បន្ទាប់ពីនោះមក ពិន្ទុសឺវីសForehandទី១របស់សារ៉ាប៉ូវ៉ាបានបញ្ចប់ការប្រកួតទាំងស្រុង។ ក្រោយពីទទួលបានជោគជ័យ សារ៉ាប៉ូវ៉ាបាននិយាយថា៖«ខ្ញុំភ័យបន្តិចដែរនៅពេលចាប់ផ្តើមប្រកួតដ្បិតកាលពីប្រកួតកម្មវិធីនេះពីមុនមក ខ្ញុំធ្លាប់បានបរាជ័យ»។ នេះគឺជាលើកទី៣ហើយដែលសារ៉ាប៉ូវ៉ាចូលប្រកួតក្នុងកម្មវិធី Fed Cupឱ្យរុស្ស៊ី។ ការចូលរួមកាលពីឆ្នាំ២០០៨ ម្ចាស់ជើងឯកក្របខណ្ឌធំ៣សម័យរូបនេះបានយកឈ្នះក្រុមអ៊ីស្រាអែលទាំងប្រកួតឯកត្តជនទាំងប្រកួតជាគូ តែកាលពីឆ្នាំទៅមិញនាងបរាជ័យក្រោមថ្វីដៃក្រុមបារាំង។
នាងបានថ្លែងថា៖«ការប្រមូលអារម្មណ៍ឱ្យបានមូលវាពិតជាមានសារសំខាន់ខ្លាំងណាស់។ បន្ថែមពីលើនេះទៀតភាពជឿជាក់ក៏អាចបង្ហាញពីការប្រកួតរបស់ខ្ញុំហើយឈានទៅដណ្តើមបានជោគជ័យក្នុងថ្ងៃនេះ ។ ខ្ញុំពិតជាសប្បាយរីករាយយ៉ាងខ្លាំងចំពោះការលេងរបស់ខ្ញុំ »។ ចំណែកនាងគូនេតសូវ៉ាវិញបានយក ឈ្នះពិន្ទុ៤វគ្គបន្តបន្ទាប់គ្នាមុនពេលនាង Suarez Navarro ពង្រួញគម្លាតពិន្ទុមកនៅ៤-៣ក្នុងសិតទី១។ ប៉ុន្តែនៅសិតទី២ គូណេតសូវ៉ាដែលជាម្ចាស់ពានក្របខណ្ឌធំចំនួន២លើកបានយកឈ្នះពិន្ទុ៥វគ្គបន្តបន្ទាប់គ្នាជាថ្មីទៀតនាំមុខក្នុងលទ្ធផល៣-០។ ទីបំផុតនាងយកឈ្នះគូប្រកួតទាំងស្រុងដោយពិន្ទុសឺវីសលើកទី២ ។
នាងបាននិយាយថា៖«ការប្រកួតនេះបើមើលទៅ ហាក់មិនពិបាកទេ តែការពិតមិនដូច្នោះទេ។ ការប្រកួតក្នុងថ្ងៃនេះពិតជាល្អណាស់ ហើយខ្ញុំក៏សប្បាយចិត្តណាស់ដែរចំពោះលទ្ធផលលើកនេះ»។ នៅក្នុងការប្រកួតខ្វែង នាងសារ៉ាប៉ូវ៉ានឹងជួបជាមួយនាង Carla Suarez Navarroខណៈគូនេតសូវ៉ាជួបជាមួយនាង Silvia Soler-Espinosa។ សម្រាប់រុស្ស៊ីចាប់តាំងពីឆ្នាំ២០០៤មកធ្លាប់បានយកឈ្នះពានជើងឯកកម្មវិធី Fed Cupនេះចំនួន៤លើករួចមកហើយ។ ចំណែកអេស្ប៉ាញធ្លាប់បានយក ឈ្នះជើងឯក៥លើកចន្លោះពីឆ្នាំ១៩៩១និងឆ្នាំ១៩៩៨៕
ចែករំលែកព័តមាននេះ