ប្រភពសន្តិសុខមូលដ្ឋានគូសបញ្ជាក់ថា បំពង់បង្ហូរឧស្ម័នមួយដែលបញ្ជូនឧស្ម័នទៅអ៊ីស្រាអែល និងហ្ស៊កដានី ជាគោលដៅនៃការវាយប្រហារដោយគ្រាប់បែកមួយកាលពីព្រឹកថ្ងៃទី៥ កុម្ភៈ នៅឧបទ្វីបស៊ីណៃ របស់អេហ្ស៊ីប។ ប្រភពនេះបញ្ជាក់ថា ជនប្រដាប់អាវុធប្រមាណជា១០នាក់បាននាំគ្នាដាក់គ្រឿងផ្ទុះពីក្រោមបំពង់ឧស្ម័ននេះនៅភាគខាងលិចទីក្រុង EL-ARISH ខាងជើងឧបទ្វីបស៊ីណៃ ហើយពួកគេធ្វើឱ្យផ្ទុះនាវេលាម៉ោង១រំលងអធ្រាត្រម៉ោងក្នុងស្រុក។ គេបានស្តាប់ឮស្នូរផ្ទុះ យ៉ាងខ្លាំង និងឃើញអណ្តាតភ្លើងបាញ់ឡើងលើយ៉ាងខ្ពស់។
សម្រាប់ពេលនេះ ពុំទាន់មានព័ត៌មានណាមួយរាយការណ៍ពីជនរងគ្រោះឡើយ ។ នេះជាការផ្ទុះលើកទី១២ហើយ សំដៅលើបំពង់បង្ហូរឧស្ម័ននោះ ចាប់តាំងពីខែកុម្ភៈ ឆ្នាំ២០១១ មក។ មុនការផ្ទុះទាំងនេះ ៨០%នៃឧស្ម័នធម្មជាតិសម្រាប់ប្រើផលិតអគ្គិសនីនៅហ្ស៊កដានីត្រូវបានទិញពីអេហ្ស៊ីប ខណៈដែលអ៊ីស្រាអែលនាំចូលឧស្ម័នពីអេហ្ស៊ីបប្រមាណជា៤០% សម្រាប់ផលិតអគ្គិសនីដែរ ៕
ចែករំលែកព័តមាននេះ