ប្រទេសរុស្ស៊ី និងចិន កាលពីថ្ងៃទី៤ កុម្ភៈ បានប្រើវេតូប្រឆាំងនឹងដំណោះស្រាយដាក់ដោយបណ្តាប្រទេសអឺរ៉ុប និងអារ៉ាប់ស្តីពីស៊ីរីដែលគាំទ្រវិធានការសម្ព័ន្ធអារ៉ាប់ឱ្យមានការផ្លាស់ប្តូររបបនៅស៊ីរី ដែលនេះជាលើកទី២ហើយ ចាប់តាំងពីខែតុលា ឆ្នាំ២០១១ មក។ គម្រោងដំណោះស្រាយរបស់ក្រុមប្រឹក្សាសន្តិសុខ អ.ស.ប ដាក់ដោយប្រទេសម៉ារ៉ុក ហើយគាំទ្រដោយសហរដ្ឋអាមេរិក និងពួកមហាអំណាចអឺរ៉ុបទទួលការគាំទ្រ១៣សំឡេង ក្នុងពេលបោះឆ្នោត។ ដើម្បីអាចអនុម័តគម្រោងដំណោះស្រាយមួយត្រូវទទួលការគាំទ្រដោយ៩សំឡេង ហើយពុំមានសមាជិកអចិន្ត្រៃយ៍ណាមួយរបស់ក្រុមប្រឹក្សាសន្តិសុខដាក់វេតូជំទាស់។
រុស្ស៊ី និងចិនធ្លាប់ប្រើវេតូកាលពីថ្ងៃទី៤ តុលា ឆ្នាំ២០១១ ប្រឆាំងគម្រោងដំណោះស្រាយមួយដាក់ដោយបណ្តាអឺរ៉ុប ដែលថ្កោលទោសការរំលោភធ្ងន់ធ្ងរ និងជាបន្តបន្ទាប់ដល់សិទ្ធិមនុស្សពីសំណាក់អាជ្ញាធរស៊ីរី ហើយដែលគំរាមកំហែងដាក់ទណ្ឌកម្មប្រឆាំងរបបស៊ីរី។ គម្រោងដំណោះស្រាយថ្មីគាំទ្រដោយពេញទំហឹងចំពោះការសម្រេចចិត្តកាលពីថ្ងៃទី២២ មករា របស់សម្ព័ន្ធអារ៉ាប់ សម្រួលឱ្យមានការឆ្លងកាត់ខាងនយោបាយមួយឆ្ពោះទៅរកប្រព័ន្ធប្រជាធិបតេយ្យ និងពហុបក្សនៅស៊ីរី តាមរយៈការចរចារវាងរដ្ឋាភិបាល និងពួកប្រឆាំងស៊ីរី។
ផែនការសម្ព័ន្ធអារ៉ាប់ស្នើដល់លោកប្រធានាធិបតីបាចាអាល់អាសាដ ឱ្យចាកចេញពីអំណាចដើម្បីបើកផ្លូវទៅរកការបង្កើតរដ្ឋាភិបាលរួបរួមជាតិមួយ និងរៀបចំការបោះឆ្នោតក្នុងប្រទេស។ រុស្ស៊ី និងចិន បានសម្តែងការប្រឆាំងយ៉ាងខ្លាំង ចំពោះការផ្លាស់ប្តូររបបដោយចាប់បង្ខំនៅស៊ីរី ៕
ចែករំលែកព័តមាននេះ