តាមទីភ្នាក់ងារព័ត៌មានAFP ផ្សាយឱ្យដឹងថា អត្រាអ្នកគ្មានការងារធ្វើនៅក្នុងក្រុមប្រទេសនៅអឺរ៉ុបកើនខ្ពស់ជាឯតទគ្គកម្មថ្មីគឺប្រហែល១០,៤% នៅក្នុងខែវិច្ឆិកា និងខែធ្នូ ឆ្នាំកន្លងមក និងចាត់ទុកថាជាតួលេខផ្លូវការដែលបង្ហើបឱ្យដឹងកាលពីថ្ងៃទី៣១ មករា ។ កាលពីមុននេះ វិទ្យាស្ថានស្ថិតិ «អឺរ៉ូស្តេត» ធ្លាប់បានធ្វើការវាយតម្លៃថា អត្រាអ្នកគ្មានការងារធ្វើនឹងស្ថិតក្នុងកម្រិត១០,៣% នៅក្នុងខែវិច្ឆិកា ប៉ុន្តែធាតុពិត បែរជាកើនដល់ទៅ១០,៤% ។ បច្ចុប្បន្ន អត្រាអ្នកគ្មានការងារធ្វើនៅតំបន់អឺរ៉ុប ស្ថិតនៅត្រឹមឬច្រើនជាង១០% ក្នុងរយៈពេលប្រហែល៨ខែជាប់ៗគ្នា ។
ក្រៅពីនេះ នៅក្នុងខែធ្នូ មានប្រជាជន១៦,៤៦លាននាក់ក្នុងចំណោម១៧ប្រទេសជាសមាជិកអឺរ៉ុបគ្មានការងារធ្វើគឺកើនលើសពីខែវិច្ឆិកា ដល់ទៅ២០.០០០នាក់ ។ នេះបើតាមការឱ្យដឹងពីវិទ្យាស្ថានស្ថិតិ «អឺរ៉ូស្តេត» ។ ស្របពេលជាមួយគ្នានេះ អេស្ប៉ាញជាប្រទេសដែលមានអត្រាអ្នកគ្មានការងារធ្វើខ្ពស់ដល់ទៅ២២,៩% ក្នុងខែវិច្ឆិកា ខណៈពេលប្រទេសក្រិកស្ថិតនៅលំដាប់ទី២ មានមនុស្សគ្មានការងារធ្វើប្រហែល១៩,២%។ ដោយឡែក ប្រទេសអូទ្រីសបានគ្រប់គ្រងស្ថិតិមនុស្សគ្មានការងារធ្វើក្នុងកម្រិតទាបគឺ៤,១% បន្ទាប់មកប្រទេសហូឡង់៤,៩% និងលុចសំបួ ៥,២% ។
ចំណែកនៅអាល្លឺម៉ង់ម្ចាស់សេដ្ឋកិច្ចលំដាប់ទី១នៅអឺរ៉ុបមានអត្រាអ្នកគ្មានការងារធ្វើចំនួន ៥,៥% ខណៈពេលប្រទេសសេដ្ឋកិច្ចលំដាប់ទី២ គឺបារាំង មានអត្រាអ្នកគ្មានការងារធ្វើកើនឡើងតិចតួចគឺពី៩,៨ទៅ៩,៩% ។ ទោះជាយ៉ាងណាក៏ដោយ ក្នុងទិដ្ឋភាពជារួមរបស់ណ្តាប្រទេសជាសមាជិកទាំង២៧ប្រទេស នៅសហគមន៍អឺរ៉ុប អត្រាអ្នកគ្មានការងារធ្វើក្នុងខែធ្នូ ឆ្នាំ២០១១ ស្ថិតនៅ៩,៩% ដោយមានមនុស្សគ្មានការងារធ្វើចំនួន២៣,៨១លាននាក់ ៕
ចែករំលែកព័តមាននេះ