ស្ថានទូតចិនរាយការណ៍ប្រាប់ទីភ្នាក់ងារសារព័ត៌មានចិនស៊ីនហួថា ជនជាតិចិនប្រមាណជា២០នាក់ ដែលធ្វើការក្នុងរោងចក្រស៊ីម៉ង់ត៍មួយក្នុងប្រទេសអេហ្ស៊ីបត្រូវបានចាប់ជាចំណាប់ខ្មាំងដោយប្រជាជនមូលដ្ឋានក្នុងទីក្រុង ARISH ភាគខាងជើងតំបន់ស៊ីណៃ។ អ្នកទទួលខុសត្រូវម្នាក់នៃស្ថានទូតចិនប្រចាំប្រទេសអេហ្ស៊ីបរាយការណ៍ថា និយោជិតចិនទាំងនេះកំពុងធ្វើដំណើរទៅកាន់រោងចក្រពួកគេតាមរថយន្តបឺសមួយគ្រឿងត្រូវប្រជាជនមូលដ្ឋានមួយក្រុមស្ទាក់ចាប់ បន្ទាប់មកនាំទៅកាន់តង់មួយ ដែលនៅក្បែរ។
ស្ថានទូតចិនស្នើដល់រដ្ឋាភិបាលអេហ្ស៊ីប ឱ្យដោះស្រាយរឿងនេះ ជាបន្ទាន់ ហើយប៉ូលិសត្រូវបានបញ្ជូនទៅដោយប្រញាប់ប្រញាល់ដើម្បីធ្វើការចរចា។ អ្នកទទួលខុសត្រូវសន្តិសុខមូលដ្ឋានម្នាក់ថ្លែងប្រាប់ស៊ីនហួថា ក្រុមប្រជាជនមូលដ្ឋាននេះ ទាមទារឱ្យរដ្ឋាភិបាលអេហ្ស៊ីបដោះលែងបណ្តាសាច់ញាតិពួកគេដែលជាប់ឃុំឃាំងចាប់តាំងពីច្រើនឆ្នាំមកហើយ ហើយបញ្ឈប់ការផ្គត់ផ្គង់ឧស្ម័នធម្មជាតិដល់អ៊ីស្រាអែល ៕
ចែករំលែកព័តមាននេះ