ផលិតផលឧស្សាហកម្មជប៉ុនធ្លាក់ចុះ៣,៥ភាគរយក្នុងឆ្នាំ២០១១ បន្ទាប់ពីមានគ្រោះរញ្ជួយដី និងស៊ូណាមី បណ្តាឲ្យរាំងស្ទះដល់សង្វាក់ផ្គត់ផ្គង់រំខានដល់ការផលិតរបស់រោងចក្រ ។ នេះបើតាមទិន្នន័យបង្ហាញដោយរដ្ឋាភិបាលនៅថ្ងៃអង្គារទី៣១ មករា ។ អ្នកចែកចាយសំខាន់ដែលធ្លាក់ចុះនោះគឺ សម្ភារទូរគមនាគមន៍ ធ្លាក់ចុះ២២,៨ភាគរយ រថយន្តនិងសម្ភារដឹកជញ្ជូនផ្សេងៗធ្លាក់ចុះ៩,៩ភាគរយ ចំណែកសម្ភារអគ្គិសនីធ្លាក់ចុះ៩,៤ភាគរយ ។
តួលេខនៃផលិតផលឧស្សាហម្មមានការប្រែប្រួលនាប៉ុន្មានឆ្នាំកន្លងទៅថ្មីៗនេះ ដូចជានៅឆ្នាំ២០០៩ ធ្លាក់ចុះ២១,៩ភាគរយ បន្ទាប់ពីមានវិបត្តិហិរញ្ញវត្ថុ Lehman Shock ក្រោយមក កើនឡើងវិញ៩,៤ភាគរយនៅឆ្នាំ២០១០ ។ ប៉ុន្តែផលិតផលឧស្សាហកម្មកើនឡើងជាងការរំពឹងទុក គឺកើនឡើង៤ភាគរយក្នុងខែធ្នូ ឆ្នាំ២០១១គិតចាប់ពីខែវិច្ឆិកា ។ នេះបើតាមការឱ្យដឹងរបស់ក្រសួងឧស្សាហកម្ម និងពាណិជ្ជកម្មជប៉ុន ។ តាមការព្យាករណ៍របស់អ្នកផលិត ផលិតផលឧស្សាហកម្ម ត្រូវបានគេរំពឹងថា កើនឡើង២,៥ភាគរយក្នុងខែមករា និងកើនឡើង១,២ភាគរយក្នុងខែកុម្ភៈនេះ ៕
ចែករំលែកព័តមាននេះ