ការលក់មាសនារដូវបុណ្យចូលឆ្នាំថ្មីចិនមានការកើនឡើងយ៉ាងខ្លាំងនៅប្រទេសចិនដែលបង្ហាញពីទំនុកចិត្តរបស់បណ្តាអ្នកប្រើប្រាស់មាស ខណៈដែលតម្លៃមាសមាននិន្នាការកើនឡើងក្នុងឆ្នាំ២០១២ ។ នេះជាការអះអាងរបស់អ្នកជំនាញការម្នាក់កាលពីថ្ងៃទី២៨ មករា កន្លងមកនេះ ។ ការជូនជាកាដូនូវគ្រឿងអលង្ការធ្វើពីមាស គឺជាទម្លាប់មួយដែលពេញនិយមបំផុតនៅចិន ពិសេសក្នុងពេលឈប់សម្រាកឱកាសបុណ្យចូលឆ្នាំថ្មី ។
លោកអៃ ចាវ អ្នកលក់មាសម្នាក់នៃក្រុមហ៊ុន CHOWTAI FOOK JEWELRY CO. ដែលស្ថិតនៅទីលានស៊ីន កុង ក្រុងប៉េកាំង ថ្លែងកាលពីថ្ងៃទី២៨ មករា កន្លងមកនេះថា ទំហំនៃការលក់មាសសម្រាប់ឆ្នាំនាគ ដែលគេទិញជាកាដូជូនគ្ន ពិតជាមានកម្រិតខ្ពស់ឱកាសបុណ្យចូលឆ្នាំថ្មី ។ ការលក់មាសនៅហាង BEIJING CAIBIA ជាហាងលក់គ្រឿងអលង្ការដ៏ល្បីបំផុតមួយមានការកើនឡើងច្រើនជាងកាលពីឆ្នាំទៅមិញនាអំឡុងពេលបុណ្យចូលឆ្នាំចិន ។
និយោជិតហាងនេះម្នាក់និយាយថា យើងលក់ដាច់ខ្សែកមាសមួយខ្សែរៀងរាល់មួយនាទីគិតជាមធ្យមពេលសំបូរមនុស្សទិញច្រើន ។ សេចក្តីត្រូវការគ្រឿងអលង្ការនៅចិនមានការកើនឡើង១៣% នាឆ្នាំនេះ ជាមួយនឹងមាសដល់១៣១តោន ដែលមានទឹកប្រាក់៤៦ពាន់លានយាន់។ ចិនកត់សម្គាល់ឃើញសេចក្តីត្រូវការមាសកើនឡើង២៤% ចាប់តាំងពីឆ្នាំមុនមក គឺ ៦០,២តោន ក្នុងត្រីមាសទី៣ឆ្នាំ២០១១ ៕
ចែករំលែកព័តមាននេះ