ក្មេងប្រុសម្នាក់បានទូរស័ព្ទមកកាន់លេខ៩១១ ជាលេខសង្គ្រោះបន្ទាន់នៅសហរដ្ឋអាមេរិក ដោយសារមិនដឹងថា ម្តាយរបស់វានៅឯណា ។ ទីបំផុតស្ត្រីជាម្តាយរស់នៅក្នុងទីក្រុងញូវយ៉ក បានចូលដេកគុក បន្ទាប់ពីទុកកូនប្រុសអាយុ៥ឆ្នាំ ឱ្យនៅតែឯកឯងក្នុងពេលខ្លួនទៅលេងល្បែងក្នុងកាស៊ីណូ ។ លោកស្រី Xiao Xu Wu វ័យ៣៨ឆ្នាំ បានទុកកូនប្រុសរបស់គាត់ក្នុងបន្ទប់សណ្ឋាគារពេល ដែលគាត់ចេញទៅលេងល្បែងក្នុងកាស៊ីណូMohegan Sun ។ នេះបើតាមសារព័ត៌មានHartford Courant ។
ក្មេងប្រុសវ័យ៥ឆ្នាំ បានទូរស័ព្ទទៅកាន់ប៉ូលិស ព្រោះវាមិនដឹងថាម្តាយរបស់វាទៅទីណា ។ ពេលនោះវានិយាយថា ខ្លួនវានៅក្នុងបន្ទប់សណ្ឋាគារតែម្នាក់ឯង ។ ក្រោយមក លោកស្រី Wu ក៏ត្រូវគេរកឃើញ និងចាប់ខ្លួន ចំណែកកូនប្រុសរបស់គាត់ក៏ត្រូវកន្លែងថែទាំកុមារយកទៅការពារ ។ លោកស្រី Wu ត្រូវបានតុលាការចេញដីកា និងបញ្ជាឲ្យបង់ប្រាក់ចំនួន១៥០.០០០ដុល្លារ ។ លោកស្រីត្រូវចូលខ្លួនមកតុលាការនៅថ្ងៃទី២៤ កុម្ភៈ ខាងមុខជាថ្មីទៀត ។
ក្នុងសេចក្តីប្រកាសព័ត៌មានរបស់កាស៊ីណូនិយាយថា នៅកាស៊ីណូ Mohegan Sun យើងធ្វើអ្វីគ្រប់យ៉ាងដែលយើងអាចធ្វើបានដើម្បីផ្តល់ជូននូវឱកាសសម្រាប់ភ្ញៀវគ្រប់គ្នា ។ ប្រសិនបើត្រូវការថែទាំក្មេងយើងមានជម្រើសជាច្រើនសម្រាប់អតិថិជន ដូចជាកន្លែងក្មេងលេង និងសួនកុមារ។ យើងគ្មានការទទួលខុសត្រូវចំពោះរឿងបែបនេះឡើយ ហើយយើងក៏មានកិច្ចសហការពេញទីជាមួយអាជ្ញាធរលើបញ្ហានោះ ៕
ចែករំលែកព័តមាននេះ