សមាជិកក្រុមគ្រួសារអាហ្វហ្គានីស្ថានអន្តោប្រវេសន៍៣នាក់ ត្រូវគេរកឃើញថា មានពិរុទ្ធភាពលើករណីមនុស្សឃាតកម្រិតទីមួយ កាលពីថ្ងៃអាទិត្យ ហើយវាបានក្លាយជាការសម្លាប់ មនុស្សដ៏សាហាវបំផុតក្នុងប្រទេសកាណាដា ។ លោក Mohammad Shafia វ័យ៥៨ឆ្នាំ និងភរិយាទីពីររបស់គាត់ Tooba Mohammad Yahya បានក្លាយជាទណ្ឌិតរួមជាមួយកូនប្រុស វ័យ២១ឆ្នាំ ដោយសារការសម្លាប់កូនស្រីទាំងបីនាក់ក្នុងក្រុមគ្រួសារ និងភរិយាទីមួយរបស់លោក Shafia ដោយជ្រមុជទឹកសម្លាប់ ។
តាមរបាយការណ៍បន្តលើកឡើងថា ពួកគេបានជញ្ជូនសាកសពចូលក្នុងរថយន្ត និងទម្លាក់ចូលព្រែកក្បែរទីក្រុង Kingston រដ្ឋ Ontarioដើម្បីឲ្យមើលទៅដូចជាគ្រោះថ្នាក់ចរាចរណ៍ ។ នេះបើតាមតុលាការជាន់ខ្ពស់រដ្ឋOntario បានធ្វើការសន្និដ្ឋាន ។ សាកសពកូនស្រីទាំងបីនាក់របស់គាត់មានឈ្មោះ Zainab វ័យ១៩ឆ្នាំ, Sahar វ័យ១៧ ឆ្នាំ និងកូនពៅនាងGeeti វ័យ១៣ឆ្នាំ ចំណែកម្តាយរបស់គេ គឺជាភរិយាទីមួយរបស់គាត់ឈ្មោះ Ronna Amir Mohammad វ័យ៥២ឆ្នាំ ត្រូវបានគេរកឃើញក្នុងរថយន្តលិចនៅក្នុងទឹកនៅថ្ងៃទី៣០ មិថុនា ឆ្នាំ២០០៩ ។
ក្នុងខ្សែវីដេអូស្តីពីការបើកសវនាការ លោកShafia បានថាកូនស្រីរបស់គាត់ជាមនុស្សពោរពេញដោយបាប និងជាស្រីខូច ដោយសារក្បត់ក្រុមគ្រួសាររបស់គាត់ទៅណាត់ជួបប្រុសផ្សេង និងស្លៀកពាក់បង្ហាញសាច់ ។ រដ្ឋអាជ្ញាចោទលោកShifia ថា ការពិតដោយសារនាង Mohammad គាំទ្រតារាម៉ូដែលស្រីរបស់លោកខាងលិច ហើយចង់លែងលះគាត់ ។ ក្នុងពេលសវនាការលោកShafia ហៅព្រាយបិសាចឱ្យជុះលើផ្នូរកូនស្រីរបស់គាត់ ។ លោកចៅក្រមRobert Maranger និយាយថា វាពិតជាលំបាកខ្លាំងណាស់ដើម្បីឲ្យដឹងពីទម្ងន់នៃការស្អប់ខ្ពើមកាន់តែខ្លាំងកាន់តែកើតមានបទឧក្រិដ្ឋនោះ ។
ក្រុមគ្រួសាររបស់លោក Shafia បានមក រស់នៅក្នុងប្រទេសកាណាដា ចាប់តាំងពីឆ្នាំ២០០៧ មក ។ គាត់បានរៀបការជាមួយនាង Yahya វ័យ៤២ឆ្នាំ ព្រោះភរិយាទីមួយរបស់គាត់ Mohammad មិនអាចមានកូនបន្ថែមទៀតឲ្យគាត់ ប៉ុន្តែគាត់ចាត់ទុកអ្នកទាំងពីរជាភរិយា ។ បុគ្គលិកក្នុងសាលា គ្រូបង្រៀន និងសាក្សីផ្សេងៗ បាននិយាយក្នុងសវនាការថា ក្មេងស្រី ទាំងនោះភ័យខ្លាចឪពុករបស់គេយ៉ាងខ្លាំងនិងភ័យខ្លាចពីអាយុជីវិតរបស់គេផងដែរ ។ មេធាវីការពារលោក Shafia និយាយការពារថា ការស្លាប់របស់ពួកគេជាឧបទ្ទវហេតុ បន្ទាប់ពីកូនស្រីបង Zainab បានយកប្អូនស្រីទាំងពីរនាក់ និងម្តាយរបស់នាងជិះរថយន្តដើរលេងនាពេលរាត្រី ស្របពេលសមាជិកគ្រួសារដទៃទៀតស្នាក់នៅក្នុងសណ្ឋាគារ Niagara Fall ។
បន្ទាប់ពីសវនាការ លោក Shafia ហៅការចេញសាលក្រមថា គ្មានយុត្តិធម៌ ។ យើងមិនមែនជាឧក្រិដ្ឋជនទេ ពួកគេមិនត្រូវបានធ្វើឃាតឡើយ យើងមិនបានសម្លាប់ពួកគេឡើយ ។ ចំណែកនាង Tooba ភរិយាទីពីររបស់គាត់និយាយថា ខ្ញុំមិនមែនឃាតកឡើយ ហើយខ្ញុំ ជាម្តាយម្នាក់ ៕
ចែករំលែកព័តមាននេះ