ប្រធានាធិបតីអាមេរិក លោកបារ៉ាក់ អូបាម៉ា បានទទួលស្គាល់កាលពីថ្ងៃទី៣០ មករា ថា ប្រទេសរបស់លោកបានធ្វើការវាយប្រហារដោយប្រើយន្តហោះគ្មានមនុស្សបើកប្រឆាំងអាល់កៃដានៅប៉ាគីស្ថានដែលប្រតិបត្តិការទាំងនេះធ្លាប់តែលាក់ដោយក្រុងវ៉ាស៊ីនតោន ដែលមកទល់ពេលនេះ ពុំធ្លាប់ធ្វើការអះអាងជាផ្លូវការឡើយ ។ ពេលសួរលោកលើការប្រើប្រាស់យន្តហោះគ្មានមនុស្សបើកប្រដាប់អាវុធនាឱកាសធ្វើការឆ្លើយឆ្លងគ្នាជាមួយបណ្តាអ្នកលេងអ៊ីនធើរណេតតាមបណ្តាញសង្គម GOOGLE និង YOUTUBE លោកអូបាម៉ា បានការពារប្រតិបត្តិការទាំងនេះហើយគូសបញ្ជាក់ថា ពិតណាស់មានការវាយប្រហារបែបនេះជាច្រើននៅតំបន់កុលសម្ព័ន្ធភាគ ពាយ័ព្យប៉ាគីស្ថាន។
ពេលអ្នកលេងអ៊ីនធើរណេតម្នាក់លើកឡើងពីបណ្តាជនរងគ្រោះស៊ីវិល លោកប្រធានាធិបតីសម្តែងនូវជំនឿជាក់ថា បណ្តាមនុស្សពិតជាដឹងថា បណ្តាយន្តហោះគ្មានមនុស្សបើកមិនបង្កឱ្យមានជនរងគ្រោះស៊ីវិលច្រើនឡើយ ។ ជាទូទៅការវាយប្រហារទាំងនេះជាការវាយប្រហារប្រាកដប្រជា ហើយច្បាស់ប្រឆាំងអាល់កៃដា និងបណ្តាសាខារបស់គេ ហើយយើងមានការប្រុងប្រយ័ត្នខ្លាំងពីរបៀបប្រើប្រាស់យន្តហោះគ្មានមនុស្សបើក។
ការប្រើប្រាស់ការវាយប្រហាររបស់យន្តហោះគ្មានមនុស្សបើកក្នុងតំបន់កុលសម្ព័ន្ធប៉ាគីស្ថានដែលធ្វើក្រោមប្រធានាធិបតីចច ដាប់ប៊លយូប៊ូស នោះត្រូវបានប្រើយ៉ាងទូលំទូលាយបំផុត ដោយរដ្ឋការលោកអូបាម៉ា ។ យោងតាមNEW AMERICA FOUDDATION ជាក្រុមពិចារណារបស់ក្រុងវ៉ាស៊ីនតោនដែលរាប់ពីការវាយប្រហារទាំងនេះថា មនុស្សរវាងពី១.៧១៧ទៅ២.៦៨០នាក់ បានត្រូវស្លាប់ដោយការវាយប្រហាររបស់យន្តហោះគ្មានមនុស្សបើកអាមេរិកនៅប៉ាគីស្ថាន រយៈពេល៨ឆ្នាំចុងក្រោយនេះ ។ អត្រាជនរងគ្រោះស៊ីវិលមាន១៧% គិតជាមធ្យម ៕
ចែករំលែកព័តមាននេះ