ឯកអគ្គរដ្ឋទូតអាមេរិកប្រចាំ អ.ស.ប លោកស្រីស៊ូសាន រ៉ៃ ថ្លែងកាលពីថ្ងៃទី៣០ មករា ថា រដ្ឋមន្ត្រីការបរទេសអាមេរិកលោកស្រីហ៊ីលឡារីគ្លីនតុន និងអ្នកទទួលខុសត្រូវជាន់ខ្ពស់អាមេរិកដទៃៗទៀតត្រូវចូលរួមនាថ្ងៃទី៣១ មករា ក្នុងកិច្ចប្រជុំរបស់ក្រុមប្រឹក្សាសន្តិសុខ អ.ស.ប ស្តីពីស៊ីរី។ ក្នុងកិច្ចប្រជុំដែលគ្រោងធ្វើនាថ្ងៃទី៣១ មករា ប្រទេសទាំង១៥ជាសមាជិកក្រុមប្រឹក្សា សន្តិសុខ អ.ស.ប ត្រូវពិភាក្សាគ្នាពីវិបត្តិបច្ចុប្បន្ននៅស៊ីរី និងគម្រោងដំណោះស្រាយមួយដែលស្នើដោយគណៈប្រតិភូម៉ារ៉ុក ដើម្បីប្រឈមមុខនឹងសភាពការណ៍ក្នុងប្រទេសនៅមជ្ឈិមបូព៌ានេះ ។
សហរដ្ឋអាមេរិកគាំទ្រគម្រោងដំណោះស្រាយរបស់ម៉ារ៉ុក ខណៈដែលរុស្ស៊ីបានសម្តែងពីការប្រឆាំងយ៉ាងខ្លាំងចំពោះគម្រោងដំណោះស្រាយនោះដែលតែងតាំងរួមគ្នាដោយបណ្តាប្រទេសអារ៉ាប់ អង់គ្លេស បារាំង និងអាល្លឺម៉ង់ ។ បណ្តាមេដឹកនាំអឺរ៉ុបបានស្នើកាលពីយប់ថ្ងៃទី៣០ មករា ដល់ អ.ស.ប ឱ្យបញ្ចេញប្រតិកម្ម ដើម្បីបញ្ចប់ការបង្ក្រាបនៅស៊ីរី មុនកិច្ចប្រជុំរបស់ក្រុមប្រឹក្សាសន្តិសុខ អ.ស.ប ។ លោកស្រីហ៊ីលឡារី គ្លីនតុន ក៏ដូចជាសហភាពអឺរ៉ុបដែរ អំពាវនាវដល់ អ.ស.ប ឱ្យធ្វើយ៉ាងណាបញ្ចប់អំពើហិង្សានៅស៊ីរី។
ក្នុងសេចក្តីប្រកាសមួយ លោកស្រីគ្លីនតុន មានប្រសាសន៍ថា សហរដ្ឋអាមេរិកថ្កោលទោសយ៉ាងម៉ឺងម៉ាត់បំផុតចំពោះការបង្កើនការវាយប្រហារយ៉ាងសាហាវរបស់របបស៊ីរីប្រឆាំងប្រជាជនឯង។ ចំណែករុស្ស៊ីវិញបានស្នើទទួលរៀបចំធ្វើការចរចាក្រៅផ្លូវការមួយរវាងអាជ្ញាធរស៊ីរី និងពួកប្រឆាំង។ នេះជាការប្រកាសកាលពីថ្ងៃទី៣០ មករា របស់ក្រសួងការបរទេសរុស្ស៊ី តាមរយៈសេចក្តីប្រកាសមួយ ។
សេចក្តីប្រកាសនេះគូសបញ្ជាក់ថា រុស្ស៊ីសង្ឃឹមថា សំណើនោះនឹងជួយឱ្យប្រជាជនស៊ីរី ពិភាក្សាគ្នាពីបញ្ហាទាំងឡាយដើម្បី បញ្ចប់អំពើហិង្សាក្នុងប្រទេសរបស់ខ្លួនឱ្យបានឆាប់រហ័សបំផុត ។ អាជ្ញាធរស៊ីរីបានទទួលយកសំណើនេះរបស់ក្រុងមូស្គូ ហើយរុស្ស៊ីសង្ឃឹមថា ពួកប្រឆាំងស៊ីរីនឹងអាចផ្តល់ចម្លើយវិជ្ជមានមួយក្នុងពេលឆាប់ៗ៕
ចែករំលែកព័តមាននេះ