ការប្រយុទ្ធគ្នានៅតាមដងវិថីមានសភាព ខ្លាំងក្លាកាលពីថ្ងៃទី៣០ មករា នៅច្រកចូលទាំងឡាយនៃក្រុងដាម៉ាស់ រដ្ឋធានីស៊ីរី ដែលនៅទីនោះកងទ័ពដណ្តើមត្រួតត្រាបានវិញនូវសង្កាត់មួយចំនួនដែលធ្លាក់ក្នុងកណ្តាប់ដៃពួកបះបោរដែលប្រទូស្តរ៉ាយប្រឆាំងនឹងប្រធានាធិបតី លោកបាចាអាល់អាសាដ ។ សាក្សីទាំងឡាយនិយាយថា កងទ័ពបានត្រួតត្រាវិញលើសង្កាត់ HAMOURIYEH នាជាយក្រុងខាងកើត ដែលនៅទីនោះកងទ័ពបានប្រើរថក្រោះ និងកាំភ្លើងធំដើម្បីរុញច្រានពួកបះបោរដែលអាចលុកចូលដល់ចម្ងាយ៨គីឡូម៉ែត្រពីកណ្តាលក្រុង។
កងទ័ពស៊ីរីសេរី ដែលប្រមូលផ្តុំពួកទាហានរត់ចោលជួរមកចូលរួមក្នុងក្រុមពួកប្រឆាំងបានធ្វើការវាយប្រហាររប៉េះរប៉ោះប្រឆាំងកងទ័ពរដ្ឋាភិបាល ដែលរុលចូលក្នុងសង្កាត់ SAKBA ក្រោយពួកបះបោរកាន់កាប់កាលពីប៉ុន្មានថ្ងៃមុននេះ។ មនុស្សយ៉ាងតិច២៥នាក់ ក្នុងនោះមានជនស៊ីវិល១៩នាក់ និងសមាជិកកងទ័ពស៊ីរីសេរី៦នាក់ត្រូវស្លាប់ក្នុងការប្រយុទ្ធគ្នានានាពេលកងទ័ពស៊ីរីសេរីវាយដកថយនៅ SAKBA និង KFAR BATNA។ ពួកប្រឆាំងរៀបរាប់ពីមនុស្សដល់ទៅ១០០នាក់ស្លាប់រយៈពេល៣ថ្ងៃ នៃការប្រយុទ្ធគ្នាក្នុងតំបន់ទាំងនោះ ។ កងទ័ពរដ្ឋាភិបាល និយាយថា បានចាប់ខ្លួនមនុស្សជាច្រើននាក់ពេលលុកចូលសង្កាត់ទាំងនេះ ៕
ចែករំលែកព័តមាននេះ