អយ្យការរដ្ឋ NUEVO LEON ភាគខាងជើងម៉ិចស៊ិកគូសបញ្ជាក់កាលពីថ្ងៃទី៣០ មករា ថា សមាជិកម្នាក់នៃក្រុមរត់ពន្ធគ្រឿងញៀនម៉ិចស៊ិក LOS ZETAS មានឈ្មោះថា ENRI-QUE AURELIO ELIZONDO FLORES ហៅអារ៉ាប់ អាយុ៣៥ឆ្នាំ ទទួលសារភាពថា រូបគេម្នាក់បានសម្លាប់មនុស្សដល់ទៅ៧៥នាក់ ដែលជាគូប្រជែង ប៉ូលិស និងជនស៊ីវិល ពិសេសពួកអ្នកដំណើរដែលរូបគេស្ទាក់ផ្លូវជិះក្នុងរថយន្តបឺស។
ចាប់ខ្លួនបានកាលពីថ្ងៃទី២០ មករា កន្លងមកនេះ ជននោះ ត្រូវបាននាំមកបង្ហាញខ្លួនដល់សារព័ត៌មានកាលពីថ្ងៃទី៣០ មករា ។ រដ្ឋអាជ្ញារដ្ឋ NUEVO LEON លោកអាឌ្រីអាន ដឺឡាហ្គាហ្សា អះអាងថា ជននេះ ប្រាប់ថា រូបគេជាមួយបណ្តាដៃគូសម្លាប់មនុស្ស៧៥នាក់ តែយើងគិតថា មនុស្សដែលពួកគេសម្លាប់មានដល់ជាង១០០នាក់។ បណ្តាសមាជិករបស់ក្រុម LOS ZETAS ត្រូវបានរដ្ឋាភិបាលចោទប្រកាន់ថា ជាអ្នកទទួលខុសត្រូវលើការសម្លាប់មនុស្សជាច្រើនរយនាក់ជាអ្នកដំណើរក្នុងរថយន្តបឺសដែលពួកគេចូលអុកឡុកតាមផ្លូវថ្នល់នៅភាគខាងជើងប្រទេសឆ្ពោះទៅកាន់សហរដ្ឋអាមេរិក ។
ជនឈ្មោះអារ៉ាប់ សារភាពថា កាលពីខែមីនា ឆ្នាំ២០១១ ក្រុមគេបានឃាត់រថយន្តបឺសមួយ ហើយរូបគេផ្ទាល់ជាអ្នកសម្លាប់មនុស្ស៣៥នាក់។ ក្នុងខែមករា ឆ្នាំ២០១១ ក្រុមគេបានចាប់រថយន្តបឺសមួយគ្រឿងទៀតជាមួយអ្នកដំណើរ៥០នាក់ ហើយរូបគេសម្លាប់មនុស្ស១៥នាក់ ។ ជននេះនិយាយថា រូបគេធ្វើសកម្មភាពជាមួយមនុស្ស៦នាក់ទៀត ហើយក្រុមគេទទួលបញ្ជាឱ្យឃាត់ចាប់រថយន្តបឺសទាំងឡាយ ហើយសម្លាប់ពួកជនស៊ីវិលដែលបដិសេធមិនចូលរួមក្នុងក្រុមគេ ៕
ចែករំលែកព័តមាននេះ