រាជធានីភ្នំពេញ ៖ មន្រ្តី គ.ជ.ប បានឲ្យដឹងថា លទ្ធផលការបោះឆ្នោតជ្រើសតាំងសមាជិកព្រឹទ្ធសភា និងបេក្ខជនជាប់ឆ្នោតគ្រោងនឹងប្រកាសនៅថ្ងៃទី៤ កុម្ភៈ ២០១២ ប្រសិនបើមិនមានពាក្យបណ្តឹង។ តែ គ.ជ.ប នៅមិនទាន់បញ្ជាក់ទេថា តើគណបក្សប្រជាជនកម្ពុជា និងគណបក្សសមរង្ស៊ីទទួលបានអាសនៈប៉ុន្មាននោះឡើយ។
មន្រ្តីគណបក្សទាំងពីរបានធ្វើការប៉ាន់ស្មានថា គណបក្សប្រជាជនកម្ពុជា អាចទទួលបានជាង៤០អាសនៈ ខណៈដែលគណបក្សសមរង្ស៊ីសង្ឃឹមថា អាចទទួលបាន១១អាសនៈ។ គ.ជ.ប បានបញ្ជាក់ថា នៅពេលនេះមានពាក្យបណ្តឹងតែមួយទេ ហើយត្រូវបានកើតឡើងនៅក្នុងខេត្តកំពង់ឆ្នាំង ដែលប្តឹងដោយគណបក្សសមរង្ស៊ី ទាក់ទិននឹងភាពមិនប្រក្រតីក្នុងការរាប់សន្លឹកឆ្នោត។ មានរយៈពេល២ថ្ងៃសម្រាប់ការដាក់ពាក្យតវ៉ាពីតំណាងគណបក្សនៅពេលដែលគណៈកម្មការបោះឆ្នោតខេត្ត-រាជធានីបានសម្រេច។
លោកអ៊ុក គឹមហ៊ាន មន្រ្តីតំណាងគណបក្សប្រជាជនកម្ពុជាបានថ្លែងថា គណបក្សប្រជាជនកម្ពុជាបានទទួលសម្លេង៧៩៧សំឡេងមកពីគណបក្សនយោបាយនានាដែលបានបោះឆ្នោតឲ្យគណបក្សប្រជាជនកម្ពុជា ព្រោះគេបានទុកចិត្តគណបក្សប្រជាជនកម្ពុជា និងពេញចិត្តគោលនយោបាយរបស់គណបក្សប្រជាជនកម្ពុជា ដែលបានដឹកនាំប្រទេសមានការរីកចំរើនដូចបច្ចុប្បន្ន៕
ចែករំលែកព័តមាននេះ