រដ្ឋមន្ត្រីហិរញ្ញវត្ថុកូរ៉េខាងត្បូង លោក BANK JAE WAN ថ្លែងថា ប្រទេសកូរ៉េខាងត្បូងនឹងចាត់វិធានការម៉ឺងម៉ាត់នានាសំដៅប្រឈមមុខនឹងភាពមិនច្បាស់លាស់ទាំងឡាយកើតឡើងទាក់ទិនដល់វិបត្តិបំណុលក្នុងតំបន់អឺរ៉ូ ដល់ការឡើងថ្លៃខ្ពស់នៃវត្ថុធាតុដើម និងកត្តាគ្រោះថ្នាក់ឯទៀតៗ ដែលនឹងអាចប៉ះពាល់ដល់សេដ្ឋកិច្ចរបស់កូរ៉េខាងត្បូងនាឆ្នាំនេះ។ ក្នុងពេលជួបជាមួយបណ្តាអ្នកកាសែតបរទេស នៅកណ្តាលក្រុងសេអ៊ូល រដ្ឋមន្ត្រីរូបនេះអះអាងថា រដ្ឋាភិបាលនឹងចាត់វិធានការម៉ឺងម៉ាត់នានា ដើម្បីប្រឈមមុខនឹងបណ្តាគ្រោះថ្នាក់ខាងក្នុងប្រទេស និងខាងក្រៅប្រទេស ដូចជាវិបត្តិហិរញ្ញវត្ថុអឺរ៉ុប ការឡើងថ្លៃនៃវត្ថុធាតុដើម ព្រមទាំងការបោះឆ្នោតសភា និងប្រធានាធិបតី។
លោកបន្តថា រដ្ឋាភិបាលតាមដានយ៉ាងប្រកិតនូវបណ្តាលក្ខខណ្ឌនៃទីផ្សារខាងក្រៅ ព្រោះសេដ្ឋកិច្ចរបស់ប្រទេសពឹងផ្អែកយ៉ាងខ្លាំងលើការផ្លាស់ប្តូរពាណិជ្ជកម្ម ។ កាលពីខែធ្នូ រដ្ឋាភីបាលបន្ថយទស្សនវិស័យនៃកំណើនសេដ្ឋកិច្ចសម្រាប់ឆ្នាំនេះ ពី៤,៥% មកត្រឹម៣,៧% ព្រោះតែលក្ខខណ្ឌមិនល្អនៅលើទីផ្សារនាំចេញ ។ លោកបន្តថា ទោះបីជាមានកត្តាគ្រោះថ្នាក់និងភាពមិនច្បាស់លាស់ច្រើនក៏ដោយ ខ្ញុំជឿជាក់ថា សេដ្ឋកិច្ចរបស់កូរ៉េខាងត្បូងនឹងនៅតែខ្លាំង ដើម្បីជម្នះការលំបាកទាំងនេះជាមួយនឹងប្រព័ន្ធដែលមានគ្រឹះរឹងមាំ និងទំនុកចិត្តដែលបង្កើតក្នុងប្រទេស និងក្រៅប្រទេស៕
ចែករំលែកព័តមាននេះ