អាជ្ញាធររាយការណ៍កាលពីថ្ងៃទី២៩ មករា ថា មនុស្សសរុប២២នាក់ ត្រូវបានធ្វើឃាតកាលពីយប់ថ្ងៃទី២៨ មករា នៅភាគខាងជើងម៉ិចស៊ិក ក្នុងនោះ៥នាក់ក្នុងបុណ្យខួបកំណើតរបស់កុមារនៅទីក្រុង TIJUANA ជាប់ព្រំដែនជាមួយសហរដ្ឋអាមេរិក។ អ្នកទោស៤នាក់ត្រូវគេសម្លាប់ក្នុងពន្ធនាគារមួយនៃរដ្ឋ CHIHUAHUA ជារដ្ឋមួយដែលមនុស្ស៨នាក់ត្រូវសម្លាប់ក្នុងក្របខណ្ឌនៃរឿង ដែលទាក់ទិនដល់ឧក្រិដ្ឋកម្មមានការរៀបចំ ហើយមនុស្ស៥នាក់ទៀតត្រូវគ្រាប់ស្លាប់ ពេលមានការវាយប្រហារក្នុងទីក្រុង TORREON ។
នៅទីក្រុង TIJUANA ជនប្រដាប់អាវុធ៣នាក់បានលុកចូលក្នុងពិធីបុណ្យខួបកំណើតមួយមុនពេលចាប់បំបែកបុរសនៅម្តុំ និងនារីនៅម្តុំ ។ មនុស្សទាំងនេះត្រូវបង្ខំឱ្យដេកផ្កាប់មុខទៅដី ចំណែកបុរសពេញវ័យ៤នាក់ និងក្មេងជំទង់អាយុ១៣ឆ្នាំម្នាក់ត្រូវពួកនេះនាំទៅកាន់ចង្ក្រាន រួចបាញ់សម្លាប់ពួកគេនៅទីនោះ។ យោងតាមការស៊ើបអង្កេតដំបូងថា ជនរងគ្រោះម្នាក់ត្រូវជាបងរបស់អតីតប៉ូលិសម្នាក់ដែលត្រូវចាប់ខ្លួនកាលពីថ្ងៃទី៦ មករា ទាក់ទិននឹងក្រុមរត់ពន្ធគ្រឿងញៀន SINALOA ដែលធ្វើប្រតិបត្តិការ ក្នុងទីក្រុងជាច្រើននាភាគពាយ័ព្យម៉ិចស៊ិកក្នុងនោះមានទីក្រុង TIJUANA ដែលស្ថិតនៅក្បែរទីក្រុងសាន់ឌីយេហ្គោ របស់អាមេរិកផង។
មនុស្សជាង៥០.០០០នាក់ ហើយត្រូវស្លាប់នៅម៉ិចស៊ិកតាំងពីចាប់ផ្តើមការវាយលុកខាងយោធាប្រឆាំងបណ្តាក្រុមរត់ពន្ធគ្រឿងញៀន បើកធ្វើដោយលោកប្រធានាធិបតីហ្វឺលីប កាល់ដឺរ៉ូនក្រោយពេលលោកឡើងកាន់អំណាចពីខែធ្នូ ឆ្នាំ២០០៦មក ៕
ចែករំលែកព័តមាននេះ