រាជធានីភ្នំពេញ ៖ ទារិកាម្នាក់ទើបប្រសូតថ្មីៗត្រូវបានក្មេងឃ្វាលគោប្រទះឃើញនៅក្នុងព្រៃរបោះមួយកន្លែង ស្ថិតនៅក្នុងភូមិបោះអង្កាញ់ សង្កាត់ព្រែកឯង ខណ្ឌមានជ័យ កាលពីរសៀលថ្ងៃទី២៧ មករា ឆ្នាំ២០១២ ហើយក៏នាំគ្នាភ្ញាក់ផ្អើលនិងរើសមកចិញ្ចឹម ។ ទារិកានេះជាកូនដ៏ស្រស់ស្អាតទ្រលុកគួរឱ្យស្រឡាញ់ ដែលនរណាៗក៏ចង់បានដែរ ។
លោកគឹម ភាព អាយុ៤៩ឆ្នាំ ជាកសិកររស់នៅភូមិសង្កាត់ខាងលើបានរៀបរាប់ប្រាប់អ្នកយកព័ត៌មានកោះសន្តិភាពស្តីពីការប្រទះឃើញទារិកាដ៏អភ័ព្វនេះថា ដំបូងឡើយមានក្រុមក្មេងឃ្វាលគោប្រាប់ថា ពួកគេបានឮសូរសំឡេងក្មេងយំ ។ ពេលឮដូច្នេះ លោកគឹម ភាព ក៏ដើរសំដៅទៅរកកន្លែងក្មេងយំហើយប្រទះឃើញទារិកាដ៏តូចច្រឡឹងខំប្រឹងបម្រះស្រវេស្រវាកាយដីចេញពីមុខមាត់ដែលជនមិនស្គាល់មុខយកទៅកប់ចោលទាំងរស់ក្នុងដីអាចម៍បំណាស់ ដែលកាយកប់សើៗ ។ លោកគឹម ភាព បានបន្តថា ពេលឃើញដូច្នេះគាត់មានក្តីក្តុកក្តួល ហើយស្ទុះទៅកាយដីចេញ លើកទារិកានោះសំដៅមកផ្ទះឱ្យប្រពន្ធរបស់គាត់លាងទឹកសម្អាតដើម្បីចិញ្ចឹមបីបាច់ ដែលមានអ្នកស្រុកក្មេងចាស់មកចោមរោមមើល ។
លោកគឹម ភាព បានបន្តថា ការលើកទារិកានេះចេញពីរណ្តៅ គឺរូបទារិកានោះមានជាប់ទាំងទងសុកម្តាយនិងផ្សិតផងដែលសភាពបែបនេះ បញ្ជាក់ថា រូបនាងទើបនឹងកើតចេញពីផ្ទៃម្តាយភ្លាមៗ ហើយត្រូវគេយកទៅកប់ដីប្លុងចោលតែម្តង ។
មិនមានព័ត៌មានលម្អិតបញ្ជាក់ថា ជាម្តាយបង្កើតបានបង្កើតកូនហើយយកទៅកប់ចោលឬក៏អ្នកផ្សេងនាំយកទៅកប់ចោលទាំងរស់នោះ ទេ ។ លើសពីនេះទៅទៀតអ្នកស្រុកនៅជុំវិញកន្លែងកើតហេតុក៏គ្មាននរណា មានផ្ទៃពោះគ្រប់ខែដែរ ។ តាមការស្ទង់ស្ទាបបែបនេះ បញ្ជាក់ថា ទារិកានេះអាចជនមិនស្គាល់មុខនាំយកពីតំបន់ផ្សេងទៅប្លុងចោល ចំណុចខាងលើ ។ ប៉ុន្តែអ្នកស្រុកបញ្ជាក់ថា នៅតំបន់នោះគ្មានផ្លូវរថយន្ត ឬម៉ូតូចូលទៅបានទេ គឺមានតែថ្មើរជើងប៉ុណ្ណោះ ។ ចំពោះបញ្ហានេះក៏ជាប្រធានបទមួយដែលទាមទារឱ្យសមត្ថកិច្ចមូលដ្ឋាន គួរតែចុះតាមដានអំពីចរិតមនុស្សចាស់ដ៏សាហាវដែលយកទារិកាទៅកប់ទាំងរស់នោះផង ។
លោកគឹម ភាព និងភរិយាបាននិយាយថា គាត់សុខចិត្តចិញ្ចឹមទារិកានេះហើយ ទោះជាបែបណាក៏ដោយ ព្រោះទារិកានោះមាននិស្ស័យជាមួយគាត់ ។ អ្នកស្រុកអ្នកភូមិនាំគ្នាចង់បានទារិកានេះយកទៅចិញ្ចឹមគ្រប់ៗគ្នា ព្រោះរូបនាងមានព្រលឹងខ្លាំងណាស់សម្បុរសគួរឱ្យស្រឡាញ់។
ជាមួយគ្នានោះដែរ ក្រុមអ្នកស្រុកអ្នកភូមិនាំគ្នាចូលរួមជាថវិកា តាមសទ្ធាជ្រះថ្លាសម្រាប់លោកគឹម ភាព ទិញទឹកដោះគោចឹញ្ចឹមទារិកាដ៏អភ័ព្វនោះ ។ ទន្ទឹមនឹងក្តីអាណិតអាសូរនេះដែរលោកម៉ម វ៉ាន អ្នកយកព័ត៌មានកោះសន្តិភាពក៏បានជួយឧបត្ថម្ភថវិកា២មឺុនរៀលសម្រាប់ចូលរួមផ្គត់ផ្គង់ការចិញ្ចឹមបីបាច់ទារិកានេះដែរ ៕
ចែករំលែកព័តមាននេះ