ខេត្តបន្ទាយមានជ័យ ៖ មានការឆោឡោមួយកាលពីវេលាម៉ោង៦ល្ងាចថ្ងៃទី២៥ មករា ឆ្នាំ២០១២ នៅភូមិស្តៅ ឃុំគោករមៀត ស្រុក ថ្មពួក ខណៈកម្លាំងកងវិស្វកម្ម នៅក្នុងអង្គភាពវរសេនាតូចលេខ៧១៥ ចំនួន៦នាក់ បាននាំគ្នាផឹកស្រាអស់ចំនួន៨ដប បណ្តាលឲ្យមានម្នាក់ ស្លាប់បាត់បង់ជីវិត ម្នាក់ទៀតសន្លប់ធំ ឯ៤នាក់ទៀតស្រវឹងធម្មតា ។
តាមប្រភពព័ត៌មានពីលោកវរសេនីយ៍ត្រី យ៉ត រ៉ាយ អធិការនគរបាលស្រុកថ្មពួកឲ្យដឹងថា អ្នកផឹកស្រាទាំង៦នាក់នេះ គឺជាកងកម្លាំងវិស្វកម្ម ធ្វើផ្លូវចាប់ពីភូមិគោករមៀតដល់ភូមិស្តៅ។ នាល្ងាចថ្ងៃទី២៥ មករា នោះ ក្រោយពីសម្រាកពីការងារ ពួកគេបាននាំគ្នាផឹកស្រានៅតូបមួយក្នុងភូមិស្តៅ ដែលមានអ្នកលក់ចំនួន២នាក់ គឺ ឈ្មោះ លេខ លេត ភេទស្រី អាយុ១៩ឆ្នាំ និងឈ្មោះ មឿត មុំ ភេទស្រី អាយុ១៧ឆ្នាំ រស់នៅក្នុងភូមិខាងលើ ។ ការផឹកនេះរហូតដល់ម៉ោង១១និង៣០នាទីយប់ថ្ងៃដដែល អស់ស្រាចំនួន៨ដប និងក្លែមបុកល្ហុងអស់៣ចាន ។
ប្រភពព័ត៌មានបានឱ្យដឹងទៀតថា បន្ទាប់មកអ្នកទាំង៦នាក់ មានអាការស្រវឹងយ៉ាងខ្លាំង ហើយឈ្មោះតាប់ វាសនា ភេទប្រុស អាយុ២៣ឆ្នាំ បានដេកស្លាប់នៅកន្លែងធ្វើការ និងឈ្មោះយឿន សឿត ភេទប្រុស អាយុ២៥ឆ្នាំ សន្លប់ធំ ។ឯអ្នកស្រវឹងអាចដើរបានទាំងត្រដរចំនួន៤នាក់ ១-ឈ្មោះសាក់ មៀន ភេទប្រុស អាយុ២៥ឆ្នាំ ២-ឈ្មោះ រ័ត្ន មុន្នី ភេទប្រុស អាយុ២០ឆ្នាំ
៣-ឈ្មោះហាន រតនៈ ភេទប្រុស អាយុ២១ឆ្នាំ ៤-ឈ្មោះសេង ណុប ភេទប្រុស អាយុ២៥ឆ្នាំ។ ដោយពិនិត្យឃើញសភាពមិនស្រួល ប្រធានអង្គភាពក៏បានដឹកអ្នកដែលមិនស្លាប់ទាំង៥នាក់ មកកាន់មន្ទីរពេទ្យស្រុកថ្មពួក ដើម្បីសង្ក្រោះបន្សាបជាតិស្រា ហើយបច្ចុប្បន្នបានធូរស្រាលវិលត្រឡប់ទៅបម្រើការងារវិញហើយ ។ ដោយឡែកឈ្មោះ តាប់ វាសនា ដែលស្លាប់អង្គភាពបានដឹកសពទៅប្រគល់ជូនក្រុមគ្រួសារចាត់ចែងធ្វើបុណ្យតាមប្រពៃណីនៅឯស្រុកកំណើត ខេត្តកំពង់ស្ពឺ ។
លោកអធិការនគរបាលស្រុកថ្មពួកបានបញ្ជាក់ថា កត្តាដែលបង្កឱ្យមានគ្រោះថ្នាក់រហូតដល់មានអ្នកស្លាប់នេះ បណ្តាលមកពីការផឹកស្រានោះវាហួសកម្រិត គ្នាតែ៦នាក់ផឹកស្រាអស់ដល់ទៅ៨ដប ដែលវាមិនមែនជារឿងធម្មតានោះទេ ៕
ចែករំលែកព័តមាននេះ