ខេត្តកណ្តាល ៖ រថយន្តបំពាក់ស៊ីរ៉ែនពណ៌ ត្រេអ៊ី ពាក់ស្លាកលេខខេមរភូមិន្ទមួយគ្រឿង កំពុងធ្វើសកម្មភាពដឹកជញ្ជូនត្រីឆ្តោខុសច្បាប់ជារៀងរាល់ថ្ងៃពីស្រុកកោះធំ និងពីក្រុងតាខ្មៅ ដើម្បីមកលក់ចែកចាយនៅរាជធានីភ្នំពេញ ហើយសមត្ថកិច្ចជំនាញជលផលក៏មិនហ៊ានអនុវត្តច្បាប់របស់ខ្លួនឡើយ បើទោះបីជាការនាំត្រីឆ្តោនោះខុសច្បាប់ក្តី ។
ជាក់ស្តែងរយៈពេលប៉ុន្មានថ្ងៃមកហើយរហូតមកដល់ថ្ងៃទី២៦ មករា គេឃើញរថយន្តស៊ីរ៉ែនខាងលើនេះ ចូលដឹកត្រីឆ្តោរបស់មន្ត្រីយោធាម្នាក់ឈ្មោះផាត់ សឿង ហៅវិចិត្រ ដែលមានត្រីឆ្តោរាប់មឺុនក្បាលចិញ្ចឹមនៅក្នុងស្រះខាងលិចផ្លូវជាតិលេខ២១B ស្ថិតក្នុងភូមិព្រែកសំរោង សង្កាត់តាខ្មៅ ក្រុងតាខ្មៅ ។ មន្ត្រីយោធារូបនោះបានលួចលាក់ចិញ្ចឹមត្រីឆ្តោ ដែលច្បាប់ហាមឃាត់រាប់ម៉ឺនក្បាលនៅក្នុងស្រះ ស្ថិតក្នុងភូមិព្រែកសំរោង សង្កាត់តាខ្មៅ រយៈពេលជាច្រើនខែមកហើយ ហើយសមត្ថកិច្ចជំនាញមិនបានកៀរដួសយកទៅចាក់ចោលដូចស្រះដទៃទេ គឺបានត្រឹមតែចុះទៅអើតមើលក៏ស្ងាត់ទៅវិញ ។ រហូតដល់ត្រីល្មមលក់ ម្ចាស់ស្រះនេះ ក៏យករថយន្តស៊ីរ៉ែនពណ៌ត្រេអ៊ី បន្លាចមន្ត្រីជលផល ដើម្បីដឹកជញ្ជូនយកទៅលក់នៅភ្នំពេញ យ៉ាងរលូនទៀត ។
កន្លងមកគេឃើញសកម្មភាពចុះបង្ក្រាបរបស់មន្ត្រីជំនាញទៅលើស្រះចិញ្ចឹមត្រីឆ្តោរបស់ប្រជាពលរដ្ឋមានភាពសកម្មបំផុត គឺមិនមានការលើកលែងឡើយ ថែមទាំងធ្វើកិច្ចសន្យាឈប់ឱ្យចិញ្ចឹមលើកក្រោយៗទៀតផង។ ចំណែករថយន្តស៊ីរ៉ែនពណ៌ត្រេអ៊ី ពាក់ស្លាកលេខខេមរភូមិន្ទមួយគ្រឿងនេះ គេតែងតែឃើញដឹកត្រីឆ្តោពីស្រុកកោះធំ តាមផ្លូវជាតិត្រើយខាងកើតទន្លេបាសាក់ សំដៅចូលរាជធានីភ្នំពេញ ជាញឹកញាប់។ ការប្រើប្រាស់រថយន្តពណ៌ត្រេអ៊ី បំពាក់ស៊ីរ៉ែនដឹកត្រីឆ្តោខុសច្បាប់នេះទំនងជាកាក់កបណាស់ ព្រោះយកស្បែកខេមរភូមិន្ទមកប្រើប្រាស់ ដើម្បីបន្លាចសមត្ថកិច្ចជំនាញជលផល ។ គេមិនដែលឃើញមន្ត្រីជលផលឃាត់រថយន្តមួយគ្រឿងនេះសួរនាំពីច្បាប់ទម្លាប់ក្នុងការដឹកជញ្ជូនត្រីឆ្តោខុសច្បាប់នោះទេ បើទោះបីជាដឹងថា មានដឹកត្រីឆ្តោពីប្រទេសវៀតណាមចូលមករាជធានីភ្នំពេញ ក៏ដោយ ។ ប៉ុន្តែបើឈ្មួញរកសីុដឹករថយន្តធម្មតាវិញ គឺគេចមិនផុតពីការចាប់រកច្បាប់ឡើយ ជួនកាលក៏ធ្វើការផាកពិន័យ ជួនកាលក៏ស្ងាត់ស្ងៀមក៏មានដែរ។
កាលពីពេលថ្មីៗកន្លងមកនេះ ប្រមុខរាជរដ្ឋាភិបាលបានប្រកាសជាសាធារណៈដល់មន្ត្រី ហាមមិនឱ្យយករថយន្តអង្គភាពទៅប្រើប្រាស់ដឹកជញ្ជូនទំនិញផ្ទាល់ខ្លួនឡើយ ។ ចំណែករថយន្តស៊ីរ៉ែនមួយគ្រឿងនេះម្ចាស់វាក្លាហានណាស់យកមកដឹកទំនិញត្រីឆ្តោខុសច្បាប់ថែមទៀត ដែលគេមិនដឹងថា រថយន្តមួយនេះចេញពីអង្គភាពណាមួយពិតប្រាកដនោះទេ ។
កោះសន្តិភាពមិនអាចសុំការបំភ្លឺបានទេ សូម្បីថតរូបភាពក៏ប្រើហ្ស៊ូមពីចម្ងាយដែរ៕
ចែករំលែកព័តមាននេះ