រាជធានីភ្នំពេញ ៖ លោកវរសេនីយ៍ទោ ប៊ន សំអាត អធិការនគរបាលខណ្ឌពោធិ៍សែនជ័យ បានណែនាំដល់សិស្សានុសិស្សទាំងអស់នៅវិទ្យាល័យហ៊ុន សែន ជម្ពូវ័ន ផ្នែកនារីឱ្យស្លៀកពាក់ និងកាត់សក់ឱ្យបានសមរម្យ កុំលាបពណ៌ហាយឡាយ កុំស្លៀកពាក់ខើចលើខើចក្រោម ឯសិស្សប្រុសៗកុំទុកសក់វែង ឬពាក់ក្រវិល ។ លើសពីនេះទៅទៀតត្រូវចៀសចេញឱ្យឆ្ងាយពីបញ្ហាគ្រឿងញៀន ល្បែងស៊ីសងគ្រប់ប្រភេទ ជាពិសេសកុំមានស្នេហាពេលកំពុងសិក្សាដែលនាំឱ្យរៀនមិនចូលខូចអនាគត ព្រោះបើភ្លើតភ្លើននឹងរឿងស្នេហាប្រាកដជាភ្លេចការសិក្សាររៀនសូត្រមិនខាន ។
លោកអធិការមានប្រសាសន៍បែបនេះ នៅក្នុងពេលអញ្ជើញជាអធិបតីក្នុងយុទ្ធនាការផ្សព្វផ្សាយស្តីពីវិធានការបង្ក្រាបទប់ស្កាត់និងបង្ក្រាបក្រុមក្មេងទំនើងដែលធ្វើឡើងកាលពីវេលាម៉ោង៨ ព្រឹកថ្ងៃទី២៧ មករា ឆ្នាំ ២០១២ នៅវិទ្យាល័យ ហ៊ុន សែន ជម្ពូវ័នសង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ។
អញ្ជើញចូលរួមក្នុងឱកាសនោះមានលោកអនុសេនីយ៍ទោ គិត វណ្ណៈ អធិការរងទទួលបន្ទុកផ្នែកព្រហ្មទណ្ឌខណ្ឌពោធិ៍សែនជ័យ លោកអនុសេនីយ៍ឯក សើន កែវវណ្ណធី មេបញ្ជាការរងកងរាជអាវុធហត្ថខណ្ឌ លោកភួង ផា មន្ត្រីក្រុមប្រឹក្សាសង្កាត់ចោមចៅ លោកអនុសេនីយ៍ទោ ម៉ម ហោ នាយប៉ុស្តិ៍ចោមចៅ ព្រមទាំងលោកនាយក-នាយករង លោកគ្រូ-អ្នកគ្រូនិងសិស្សានុសិស្ស នៅវិទ្យាល័យនោះផងដែរ ។
លោកវរសេនីយ៍ទោ ប៊ន សំអាត អធិការខណ្ឌពោធិ៍សែនជ័យ បានណែនាំដល់សិស្សានុសិស្សថា «ក្មួយៗទាំងអស់មិនត្រូវបណ្តែតបណ្តោយខ្លួនឱ្យក្លាយទៅជាក្មេងទំនើងទេ ព្រោះបញ្ហាក្មេងទំនើងនេះ ប្រមុខរាជរដ្ឋាភិបាលកម្ពុជា ក៏ដូចជាអគ្គស្នងការនគរបាលជាតិ និងស្នងការរាជធានីភ្នំពេញ ចេញបញ្ជាដាច់ខាតបង្ក្រាបឱ្យដូច្នេះក្មួយៗស្ថិតនៅក្នុងវ័យសិក្សាគឺត្រូវតែធ្វើខ្លួនឱ្យបានល្អ ។
ពេលសិក្សាកុំបង្កើតឱ្យមានស្នេហាឱ្យសោះ និងមិនត្រូវដាក់អាវុធ ដាក់កាំបិតជាប់ខ្លួនទេ ហើយក៏មិនត្រូវគេចសាលាទៅលេងល្បែងដូចជាហ្គេមជាដើម ព្រោះបញ្ហាទាំងនោះនាំឱ្យបាត់បង់ការសិក្សា មានទោសជាប់ខ្លួន ព្រមទាំងល្មើសទៅនឹងគោលនយោបាយភូមិ-ឃុំមានសុវត្ថិភាពដែលរាជរដ្ឋាភិបាលដាក់ចេញ» ។
លោកអធិការបន្តថា បើមានការលេងហ្គេម ឬល្បែងស៊ីសងនៅជិតសាលារៀនសូមជួយផ្តល់ដំណឹងដល់លោក ឬប៉ូលិសប៉ុស្តិ៍ ដើម្បីចុះបង្ក្រាបគឺមិននៅស្ងៀមទុកឱ្យហ្គេមទាំងនោះពង្វក់សិស្សរហូតភ្លេចការរៀនសូត្រឡើយ ។ ដោយឡែកសិស្សមិនត្រូវបង្កើតក្រុម ឬបក្សពួកចេញពីសាលាជម្ពូវ័នទៅវាយសិស្សនៅសាលាផ្សេង ឬបង្កទំនាស់ជាមួយសិស្សសាលាផ្សេងទេ ព្រោះបើមានទំនាស់គ្នាប្រាកដជាមានការលើកគ្នាទៅវាយទៅវិញទៅមកមិនចប់ឡើយ ។
លោកអធិការណែនាំសិស្សមិនឱ្យនាំគ្នាទៅអង្គុយសាសងស្នេហានៅទីងងឹត ឬកន្លែងស្ងាត់ទេ ព្រោះវាគ្រោះថ្នាក់ណាស់ ហើយកន្លងមកធ្លាប់មានគូស្នេហ៍រងរបួស និងស្លាប់ដោយសារចោរប្លន់វាយប្លន់ម៉ូតូពេលកំពុងអង្គុយសាសងគ្នា ប៉ុន្តែពេលនេះក្រុមចោរត្រូវបកស្បែកហើយដោយលោកដឹកនាំកម្លាំងចាប់បានដោយផ្ទាល់ហើយការបង្ក្រាបបាននោះ ក៏ដោយសារមានការជួយឧបត្ថម្ភជ្រោមជ្រែងពីលោកគិត សុផា អភិបាលខណ្ឌពោធិ៍សែនជ័យ ផងដែរ ៕
ចែករំលែកព័តមាននេះ