ខេត្តប៉ៃលិន ៖ ក្រុមក្មេងស្ទាវស្រវឹងស្រា៤នាក់បានស្ទាក់វាយបំផ្លាញរថយន្តដឹកទំនិញ និងអ្នកបើកបរឱ្យរងរបួសដោយចោទថា បើកបរមិនចេះយោគយល់គ្នាទៅវិញទៅមក ។ ហេតុការណ៍នេះបានកើតឡើងកាលពីថ្ងៃទី២២ មករា វេលាម៉ោង៣និង៤០នាទីរសៀលនៅចំណុចភូមិប៉ាងរលឹម សង្កាត់អូរតាវ៉ៅ ក្រុងបៃលិន ។ ចំពោះករណីនេះត្រូវបានកម្លាំងកងរាជអាវុធហត្ថក្រុងប៉ៃលិនដែលនៅជិតនោះ ចុះទៅពិនិត្យហេតុការណ៍ភ្លាមៗ ទើបឈានដល់ការឃាត់ខ្លួនជនបង្កបញ្ជូនទៅតុលាការ ។
ឈ្មោះឈួន ណារ៉ា ភេទប្រុស អាយុ២២ឆ្នាំ មានទីលំនៅក្នុងភូមិអូរចារ សង្កាត់អូរចារ ក្រុងបាត់ដំបង បានបញ្ជាក់ថា ខ្លួនបានបើករថយន្តមួយគ្រឿងម៉ាកហ្វុយហ្សូ និងឈ្មោះវិន បូរ៉ា ភេទប្រុស អាយុ៣២ឆ្នាំ ជាព្រូឡាន ដឹកកាហ្វេពីស្រុកមេមត់ ខេត្តកំពង់ចាម យកទៅលក់នៅព្រំដែនថៃក្នុងខេត្តប៉ៃលិន ។ ពេលមកដល់ចំណុចខាងលើក្រុមស្ទាវទាំងនោះបានចតរថយន្តកណ្តាលផ្លូវ ហើយពួកនេះនាំគ្នាចុះពីលើរថយន្តមួយបាំងកន្លះម៉ាកតាកូម៉ា ពណ៌ខ្មៅ ដោយមានកាន់ដែកបំពង់ទីប និងដំបងមកវាយលើខ្លួនរបួសដៃ និងក្បាល ។ ដោយសារតែរងនូវការវាយប្រហានេះខ្លួន និងព្រូឡានបានរត់ចោលរថយន្ត ស្រាប់តែក្រុមទាំងនោះបន្តវាយបំបែកកញ្ចក់រថយន្ត ដឹកទំនិញផ្នែកខាងមុខឱ្យខូចខាត ទើបនាំគ្នាឡើងរថយន្តរបស់គេបើកចេញទៅ ។ ចំណែកខ្លួនជាជនរងគ្រោះបានរត់ទៅប្តឹងប៉េអឹមនៅជិតនោះឱ្យជួយទើបមានការស្រាវជ្រាវចាប់បានចំនួន៣នាក់ ឯម្នាក់ទៀតរត់គេចខ្លួន ។
លោកនង វ៉ាន់នី មន្ត្រីកងរាជអាវុធហត្ថខេត្តប៉ៃលិនបានញ្ជាក់ថា មូលហេតុដំបូង រថយន្តទាំងពីរគ្រឿងបើកពីកើតមកលិចស្របទិសគ្នា ហើយរថយន្តម៉ាកតូយ៉ូតា តាកូម៉ា ពណ៌ខ្មៅ មួយបាំងកន្លះបានបើកវ៉ារថយន្តធំដឹកទំនិញមិនទាន់ផុតផង ក៏បួងចង្កូតងាកមកចូលស្តាំដៃវិញ ធ្វើឱ្យរថយន្តធំជាន់ហ្រ្វាំងទាំងបង្ខំ ព្រោះខ្លាចបុកពីក្រោយ ហើយអ្នកបើករថយន្តធំនោះលើកដៃចង្អុលទៅក្រុមអ្នកជិះរថយន្តតាកូម៉ា ទើបធ្វើឱ្យពួកគេខឹងសម្បាបញ្ឈប់រថយន្តរួចចុះមកសួរនាំ និងប្រកែកគ្នាយកត្រូវរៀងៗខ្លួន តែដោយក្រុមជិះរថយន្តតាកូម៉ាមានជាតិស្រវឹងនៅក្នុងខ្លួនផង ទើបបង្កឱ្យមានការប្រើអំពើហិង្សា ។ ក្រុមជនដែលត្រូវឃាត់ខ្លួន ១-ឈ្មោះអ៊ុច សុវណ្ណារ៉ា ភេទប្រុស អាយុ២០ឆ្នាំ ជាមេការឃ្លាំងទទួលទំនិញកសិផលនៅភូមិក្រចាប់ រស់នៅភូមិប៉ាងរលឹម សង្កាត់អូរតាវ៉ៅ ក្រុងប៉ៃលិន ២-ឈ្មោះឯម វុទ្ធី ភេទប្រុស អាយុ២៣ឆ្នាំ ជាកម្មករ ៣-ឈ្មោះជុត ដែន ហៅធីម អាយុ៣៤ឆ្នាំ ជាកម្មករ និង៤-ឈ្មោះរើន បានរត់គេចខ្លួន ទោះបីជាបែបណាពួកគេទាំង៣នាក់ត្រូវបានដោះលែងវិញ ។
កោះសន្តិភាពមិនអាចសុំការបំភ្លឺពីជនបង្កហេតុបានទេ និងព្យាយាមសុំការបំភ្លឺពីស្ថាប័នអ្នកច្បាប់ស្តីពីការដោះលែងអ្នកបង្កហេតុទាំង៣នាក់នោះក៏ពុំបានដែរ នៅរសៀលថ្ងៃទី២៥ មករានៅមិនទាន់ទទួលបានការរកខុសត្រូវដោះស្រាយសំណងនៅឡើយ ។
នៅព្រឹកថ្ងៃទី២៧ មករា លោកជឹម តារា មេធាវីការពារក្តីឱ្យជនរងគ្រោះបានបង្ហាញឯកសារពីចៅក្រម និងព្រះរាជអាជ្ញាខេត្តប៉ៃលិន បញ្ជាក់ថា អ្វីៗត្រូវអនុវត្តទៅតាមផ្លូវច្បាប់អំពីករណីបទល្មើសជាក់ស្តែងនេះ តែអាចឱ្យនៅក្រៅឃុំបាន ដោយជនបង្កហេតុយកប្រាក់មកតម្កល់ទុកនៅក្នុងតុលាការចំនួន១.០០០ដុល្លារ និងត្រូវបង្ហាញខ្លួនក្នុង២សប្តាហ៍ម្តងនៅប៉ុស្តិ៍រដ្ឋបាលឃុំអូរតាវ៉ៅ និងចូលបំភ្លឺតាមដីកាកោះហៅរបស់តុលាការ ព្រោះយល់ថា ភាគីទាំងសងខាងសុទ្ធតែជាអ្នករកស៊ីដូចគ្នាចៀសវាងការបាត់បង់ពេលវេលា និងខូចផលប្រយោជន៍ ៕
ចែករំលែកព័តមាននេះ