ឧបករណ៍តន្ត្រីបុរាណភ្លេងឡើងអ្នកតានិងអារក្ស
ដោយ ៖ អប្សរា
ថ្ងៃអាទិត្យ ទី២២ ខែសីហា ឆ្នាំ២០១០ ម៉ោង ១៥:១៩
រស្មី
ឧបករណ៍ភ្លេងឡើងអ្នកតា ឬភ្លេងលៀងអារក្ស
រាជធានីភ្នំពេញ ៖ គណៈកម្មការសារមន្ទីរជាតិកម្ពុជា បានយកឧបករណ៍ភ្លេងឡើងអ្នកតា ឬភ្លេងលៀងអារក្ស ដាក់តាំងសំរាប់ឱ្យកូនខ្មែរជំនាន់ក្រោយបានឃើញបានស្គាល់ ជាពិសេសនោះចង់បង្ហាញភ្ញៀវអន្តរជាតិ ឱ្យកាន់តែស្គាល់ច្បាស់ថា ខ្មែរមានឧបករណ៍តន្ត្រីបុរាណច្រើនប្រភេទណាស់ ។ បើតាមឯកសារភ្លេងឡើងអ្នកតា ឬភ្លេងអារក្សដែលបិទនៅក្បែរឧបករណ៍តន្ត្រីបុរាណខ្មែរដាក់តាំងនៅក្នុងសារមន្ទីរជាតិកម្ពុជាចាប់ពីថ្ងៃទី២៨ កក្កដា ឆ្នាំ២០១០ រហូតដល់ខែតុលា ឆ្នាំ២០១០ ខាងមុខឱ្យដឹងថា ភ្លេងឡើងអ្នកតានិងអារក្សគេប្រគំឡើងដោយឧបករណ៍៥យ៉ាងបញ្ចូលគ្នា មាន ៖ ចាប៉ីដងវែង, ប៉ីអ, ស្គរដៃ ឬស្គរអារក្ស, ខ្សែដៀវ, និងទ្រខ្មែរខ្សែបី ។ ឧបករណ៍ទាំងនោះប្រគំចូលគ្នាក្លាយជាបទភ្លេងដ៏ពីរោះសំរាប់ឡើងអ្នកតា ឬលៀងអារក្ស ។
ចំពោះប៉ីអ គឺជាឧបករណ៍មួយធ្វើអំពីបំពង់ប្ញស្សី ដែលជាផ្នែកមួយនៃតន្ត្រីខ្មែរតាំងពីសម័យមុនអង្គរមកម៉្លេះ ។ ចំណែកស្គរអារក្ស ឬស្គរដៃ ដែលធ្វើអំពីឈើ និងស្បែកពស់ជាឧបករណ៍តន្ត្រីដ៏មានប្រជាប្រិយភាពមួយក្នុងចំណោមឧបករណ៍បុរាណផ្សេងៗទៀតនៅទូទាំងព្រះរាជាណាចក្រកម្ពុជា ហើយបច្ចុប្បន្ននេះភាគច្រើនគេយកទៅប្រើក្នុងវង់ភ្លេងក្នុងពិធីមង្គលការ និងសំរាប់ប្រគំរាំរែកក្រៅផ្លូវការផ្សេងៗទៀត ។ ចំពោះទ្រខ្មែរខ្សែបី និងខ្សែដៀវគឺជាឧបករណ៍ខ្សែបី និងខ្សែមួយនៅក្នុងវង់ភ្លេងអ្នកតា ឬ អារក្ស ដែលគេប្រគំជាមួយឧបករណ៍តន្ត្រីផ្សេងៗទៀតបានដែរ ។
ឧបករណ៍ទ្រខ្សែបីធ្វើអំពី ឈើ ឆ្អឹង ស្បែកពស់ និងខ្សែលួស ចំពោះខ្សែដៀវធ្វើអំពីឈើ សំបកផ្លែឃ្លោក និងខ្សែលួសតូចឆ្មា ។ ឧបករណ៍តន្ត្រីបុរាណក្នុងវង់ភ្លេងអ្នកតាឬអារក្សនេះ គេអាចជ្រើសរើសយកមួយណាលេងជាទោលក៏បាន ប្រគំជាក្រុមក៏បាន ជា ពិសេសទៀតនោះក៏មានខ្លះគេអាចយកទៅប្រគំលាយជាមួយភ្លេងសម័យបានដែរ ដូចជាស្គរដៃជាដើម៕
