រាជធានីភ្នំពេញ ៖ ស្ត្រីដែលមានគភ៌ចាប់ពីអាយុសូន្យខែទៅប្រាំខែ ហើយមានធ្លាក់ដុំឈាម ឬដុំគភ៌ពីក្នុងស្បូនមកក្រៅ នោះគេហៅថារលូតកូន ។
លោកសាស្ត្រាចារ្យវេជ្ជបណ្ឌិតអ៊ូច ឌីណា ឯកទេសផ្នែកសម្ភព និងរោគស្ត្រីនៅមន្ទីរពេទ្យកាល់ម៉ែត បានមានប្រសាសន៍ឱ្យដឹងថា ការធ្លាក់ឈាមក្រោយពីរាំងរដូវមិនមានការឈឺចុកចាប់អ្វីនោះទេ ប៉ុន្តែបើសិនជាមានការឈឺចាប់នៅពេលរលូតកូនស្បូនមិនបើក ដែលបណ្តាលឱ្យមានការឈឺចុកចាប់យ៉ាងខ្លាំងនៅក្នុងពោះខាងលើថ្ងាស ព្រោះនេះជាពេលដែលស្បូនច្របាច់ឱ្យកូនចេញមកក្រៅ ។ ដូចនេះស្ត្រីគ្រប់រូបគួរតែប្រញាប់ទៅជួបជាមួយគ្រូពេទ្យដែលមានជំនាញ ដើម្បីចៀសវាងដល់ដំណាក់កាលធ្ងន់ធ្ងរ ។ ចំពោះការរលូតកូនអាចបណ្តាលមកពីមូលហេតុច្រើនយ៉ាងដូចជា៖
១-ការតោងរបស់គភ៌មិនធម្មតាៈ គភ៌ទំនៅលើភ្នាសស្បូន កាលណាគត៌តោងទៅលើភ្នាសស្បូនមិនល្អ ជាពិសេសភ្នាសស្បូនដែលធ្លាប់ធ្វើការវះកាត់ច្រើនដង អាចធ្វើឱ្យគភ៌រលូតបាន ។
២-ស្បូនមានរូបរាងមិនធម្មតាៈស្បូនមានរូបរាងច្រើនប្រភេទ ចំពោះស្បូនធម្មតា គឺមានរូបរាងដូចជាឃ្លោក ។ រីឯស្បូន ដែលមានរូបរាងមិនធម្មតា គឺសំដៅទៅលើស្បូនពីកំណើតមានរូបរាងខុសពីស្បូនដទៃទៀត ឬក៏ស្បូនមានបញ្ហាផ្សេងៗនៅក្នុងសាច់ស្បូនក៏បណ្តាលឱ្យរលូតដែរ។
៣-ម្តាយដែលមានជំងឺប្រចាំកាយ ដូចជាមានជំងឺពកក ឬក៏ជំងឺទឹកនោមផ្អែម ជំងឺទាំងនេះក៏ជាមូលហេតុ ដែលអាចបណ្តាលឱ្យកូនរលូតបានដែរ ។
៤-ការប្រើប្រាស់ថ្នាំៈ ស្ត្រីខ្លះប្រើប្រាស់ថ្នាំតាមចិត្តចង់ មិនបានពិភាក្សាជាមួយគ្រូពេទ្យជំនាញឱ្យបានត្រឹមត្រូវក៏អាចបណ្តាលឱ្យមានផលប៉ះពាល់ចំពោះទារកយ៉ាងធ្ងន់ធ្ងរផងដែរ ។
៥-សុកកូនខ្សោយៈ ជាទូទៅសុកត្រូវតែទំនៅលើភ្នាសស្បូន ដូចនេះសុកត្រូវតែមានការមមាញឹក ដើម្បីតោងភ្នាសស្បូនឱ្យជាប់ ហើយដើម្បីតោងភ្នាសស្បូនឱ្យជាប់ សុកត្រូវតែមានសុខភាពល្អ ព្រោះសុកមានតួនាទីសំខាន់សម្រាប់ចិញ្ចឹមជីវិតគភ៌ បើកសុកខ្សោយកូនក៏ខ្សោយដែរ ជាហេតុធ្វើឱ្យកូនរលូត ។
៦-មេជីវិតឈ្មោលខ្សោយៈ ជំងឺខ្សោយពី ធម្មជាតិនៃមេជីវិតរបស់បុរស ។
៧-ការប៉ះទង្គិចពេលមានគភ៌ៈ ការដួលប៉ះទង្គិច ឬគ្រោះថ្នាក់ផ្សេងៗ ដែលអាចបណ្តាលឱ្យរលូតកូន ។
៨-ឈាមម្តាយ និងឈាមកូនមិនត្រូវគ្នាៈ ក៏ជាចំណុចមួយដែលអាចធ្វើឱ្យរលូតកូនបាន ។
៩-ឈាមម្តាយ និងឪពុកមិនត្រូវគ្នាៈ ចំពោះឈាមឪពុក និងឈាមម្តាយមិនត្រូវគ្នាក៏អាចបណ្តាលឱ្យកូនរលូត ឬកូនកើតមកអាចស្លាប់ក៏មាន ។
លោកសាស្ត្រាចារ្យបានបន្ថែមឱ្យដឹងទៀតថា ជាការពិតណាស់ការរលូតកូនពិតជាផ្តល់នូវផលប៉ះពាល់យ៉ាងធ្ងន់ធ្ងរដល់អាយុជីវិតរបស់ស្ត្រី ជាម្តាយ នៅក្រោយពេលរលូតដូចជា៖
– ការរលូតមកទាំងអស់ៈ ការរលូតមានតាំងពីឈាម សុក ទឹកភ្លោះ ដែលហៅថា ការរលូតទាំងដុល ឬគ្រប់គ្រាន់ ។ ដូចនេះ ផលប៉ះពាល់ គឺមិនមានអ្វីធំដុំនោះទេ គ្រាន់តែមានការធ្លាក់ឈាមបន្តិចបន្តួចតែប៉ុណ្ណោះ ហើយក៏បាត់ទៅវិញ ។
-ការរលូតមិនទាំងដុលៈ ការរលូតប្រភេទនេះ ពិតជាមានផលប៉ះពាល់ចំពោះសុខភាពម្តាយយ៉ាងធ្ងន់ធ្ងរ ដែលធ្វើឱ្យធ្លាក់ឈាមខ្លាំងរហូតសម្ពាធឈាមចុះខ្សោយដល់សូន្យ ដែលធ្វើឱ្យស្ត្រីជាម្តាយអាចស្លាប់បាន ។
លោកសាស្ត្រាចារ្យបានបន្ថែមទៀតថា បើមានការរលូតមកទាំងដុលដូចនេះ ការព្យាបាលគឺមិនមានអ្វីសំខាន់នោះទេ គ្រាន់តែប្រើថ្នាំឃាត់ឈាម ឬក៏ប្រើថ្នាំសម្រាប់ឱ្យសាច់ដុំស្បូនប្រឹងតែប៉ុណ្ណោះ ប៉ុន្តែត្រូវតែពិភាក្សាជាមួយគ្រូពេទ្យ ។ បើសិនជាការរលូតកូនមិនទាំងដុលនោះទេ ស្ត្រីគ្រប់រូបត្រូវតែប្រញាប់ទៅជួបគ្រូពេទ្យ ដើម្បីឱ្យគ្រូពេទ្យសម្អាតទៅតាមបច្ចេកទេសរបស់គ្រូពេទ្យ និងការប្រើប្រាស់ថ្នាំដើម្បីការពារកុំឱ្យឆ្លងមេរោគជាដើម ។
ដូច្នេះដើម្បី ការពារកុំឱ្យរលូតកូនស្ត្រីគ្រប់រូបជាម្តាយត្រូវតែឧស្សាហ៍ទៅពិគ្រោះជាមួយគ្រូពេទ្យឱ្យបានញឹកញាប់ ជាពិសេសមុនពេលសម្រេចចិត្តមានផ្ទៃពោះ ដើម្បីស្វែងរកជំងឺ
ផ្សេងៗ ដែលបង្កឱ្យរលូតកូនបាន ៕
ចែករំលែកព័តមាននេះ