ខេត្តកណ្តាល ៖ ដើម្បីរួមចំណែកកាត់បន្ថយនូវអត្រាគ្រោះថ្នាក់ចរាចរណ៍ក៏ដូចរួមចំណែកការបន្ថយភាពក្រីក្ររបស់ប្រជាពលរដ្ឋ និងដោយឈរលើទិសយុទ្ឋសាស្ដ្រទី១របស់
កាកបាទក្រហមកម្ពុជា រួមចំណែកសង្គ្រោះជីវិត កសាងភាពធន់មាំទៅនឹងគ្រោះមហន្ដរាយ និងវិបត្ដិផ្សេងៗ ព្រមទាំងវិស័យស្នូលទី១ ។ ការគ្រប់គ្រងគ្រោះមហន្ដរាយជារៀងរាល់សប្ដាហ៍នាព្រឹកថ្ងៃសៅរិ៍ គំរោងសុវត្ថិភាពចរាចរណ៍របស់ កាកបាទក្រហមកម្ពុជាសាខារាជធានីភ្នំពេញ ដោយមានយុវជនកាកបាទក្រហមកម្ពុជាចំនួន៣២០នាក់ គ្រូទីប្រឹក្សា២៦នាក់ និងមន្ដ្រីបុគ្គលិកសាខាជាច្រើនរូបបានអប់រំសុវត្ថិភាពចរាចរណ៍តាមស្ដុបគោលដៅសំខាន់ៗចំនួន២០នៅក្នុងរាជធានីភ្នំពេញ ។
សំរាប់ការធ្វើសុវត្ថិភាពចរាចរណ៍នាថ្ងៃទី៧ ខែមករានេះ យុវជនកាកបាទក្រហមកម្ពុជាតាមស្ដុបគោលដៅនីមួយៗមានសកម្មភាពរស់រវើក ដោយយុវជនខ្លះឈរកាន់ទង់បញ្ជាចរាចរណ៍ ខ្លះឈរស្រែកបញ្ជារតាមឧឃោសនស័ព្ទ ខ្លះកាន់បដា ដែលមានខ្លឹមសារពាក់ព័ន្ឋអប់រំសុវត្ថិភាពចរាចរណ៍ ខិតខំអំពាវនាវដោយយកចិត្ដទុកដាក់ក្នុងគោលបំណងអប់រំបំផុសនិងដាស់ស្មារតីដល់អ្នកធ្វើដំណើរតាមដងផ្លូវសាធារណៈទាំងអស់ឱ្យចេះគោរពច្បាប់ចរាចរណ៍ ភ្លើងសញ្ញា ស្លាកសញ្ញា គំនូសសញ្ញា និងពេលបើកបរត្រូវពាក់មួកសុវត្ថិភាព ឬដាក់ខ្សែក្រវាត់ឱ្យបានត្រឹម
ត្រូវ ។ ជាពិសេសបើកបរត្រូវមានការចេះយោគយល់អាធ្យាស្រ័យគ្នាទៅវិញទៅមកដើម្បីជៀសវាងការបង្កឱ្យមានគ្រោះថ្នាក់ចរាចរណ៍កើតឡើងជាយថាហេតុ។
ជាលទ្ធផលសំរាប់សប្ដាហ៍នេះបងប្អូនអ្នកធ្វើដំណើរតាមដងផ្លូវភាគច្រើនបានយល់ជ្រួតជ្រាបអំពីការធ្វើសុវត្ថិភាពចរាចរណ៍នាំគ្នាគោរពច្បាប់ចរាចរណ៍ ព្រមទាំងសហការណ៍ជាមួយយុវជនយើង ដែលជាគំរូដ៏ល្អដល់អ្នកបើកបរមួយចំនួនតូចដែលមិនគោរពច្បាប់។
សូមបញ្ជាក់ថា កាកបាទក្រហមកម្ពុជា ក្រោមការដឹកនាំដ៏ឈ្លាសវៃប្រកបដោយភាពប៉ិនប្រសព្វរបស់លោកជំទាវកិត្ដិព្រឹទ្ឋបណ្ឌិត ប៊ុន រ៉ានី ហ៊ុន សែន ជាប្រមុខដឹកនាំបានផ្ដួចផ្ដើមគំនិតបង្កើតនូវចលនាយុវជននេះ ព្រមទាំងធ្វើឱ្យយុវជនកាកបាទក្រហមកម្ពុជាយើងត្រូវដើរតួនាទីឈានមុខក្នុងការអប់រំទប់ស្កាត់ជួយ សង្គ្រោះដល់ប្រជាពលរដ្ឋដែលរងគ្រោះដោយប្រការផ្សេងៗ ជាពិសេសបញ្ហាគ្រោះថ្នាក់ចរាចរណ៍ដែលជាបញ្ហាប្រឈមរបស់សង្គមជាតិទាំងមូល។
ដូចនេះដើម្បីកាត់បន្ថយនូវគ្រោះថ្នាក់ចរាចរណ៍ ក៏ដូចជាកាត់បន្ថយនូវភាពក្រីក្រ សូមបងប្អូនប្រជាពលរដ្ឋដែលធ្វើដំណើរតាមដងផ្លូវទាំងអស់មេត្ដារួមគ្នាគោរពច្បាប់ចរាចរណ៍ឱ្យបានខ្ជាប់ខ្ជួនដើម្បីធ្វើឱ្យចរាចរណ៍ក្នុងរាជធានីភ្នំពេញ ក៏ដូចជាក្នុងប្រទេសយើងទាំងមូលមានរបៀបរៀបរយ និងធ្វើដំណើរប្រកបដោយសុវត្ថិភាព៕
ចែករំលែកព័តមាននេះ