ខេត្តបាត់ដំបង ៖ ជាបន្តបន្ទាប់អង្គការជីវិតថ្លៃថ្នូរបាននាំអំណោយចែកជូនដល់ប្រជាពលរដ្ឋរងគ្រោះដោយទឹកជំនន់ចំនួន៣ស្រុក ស្មើនឹង២.៣៦៤គ្រួសារ។
ដោយឡែកកាលពីព្រឹកថ្ងៃទី២៨ ធ្នូ ២០១១ ប្រជាពលរដ្ឋរងគ្រោះចំនួន២៤៩គ្រួសារទៀតបានទទួលអំណោយក្រោមអធិបតីភាពលោកប្រាជ្ញ ចន្ទ អភិបាលខេត្ត និងលោកចាន់ វិបុល ប្រធានកម្មវិធីនៃអង្គការជីវិតថ្លៃថ្នូរ និងជាម្ចាស់ដៃគូផ្តល់ជំនួយមនុស្សធម៌ ព្រមទាំងមានការចូលរួមពីមន្ត្រីរាជការ ស្ថាប័ននានាជុំវិញខេត្ត អាជ្ញាធរមូលដ្ឋានគ្រប់លំដាប់ថ្នាក់ និងប្រជាពលរដ្ឋដែលមកទទួលអំណោយយ៉ាងច្រើនកុះករ។
លោកចាន់ វិបុល មានប្រសាសន៍ថា ជំនួយយកមកចែកជូនដល់គ្រួសារចំនួន២៤៩គ្រួសាររងគ្រោះដោយទឹកជំនន់ក្នុងឃុំកំពង់ព្រះ ស្រុកសង្កែនេះមានអង្ករ៥០គីឡូក្រាម ប្រេងឆា១លីត្រ អំបិលអ៊ីយ៉ូត១គីឡូក្រាម សាប៊ូម្សៅ៩០០ក្រាម ថ្នាំបន្សុទ្ធទឹកស្អាត៣០គ្រាប់ និងថ្នាំបំបាត់រាក១កញ្ចប់។ ជំនួយទាំងនេះបានមកពីអង្គការដៃគូនានា ដែលក្នុងនោះផ្តល់ដោយនាយកដ្ឋានជំនួយមនុស្សធម៌របស់សហគមន៍អឺរ៉ុប ពីអង្គការឌីស៊ីអេ ស៊ីអេ និងអង្គការជីវិតថ្លៃថ្នូរ។
លោកប្រាជ្ញ ចន្ទ បានថ្លែងអំណរគុណអង្គការជីវិតថ្លៃថ្នូរ និងបានអំពាវនាវដល់សប្បុរសជន និងបណ្តាអង្គការនានាសូមបន្តសកម្មភាពជាដៃគូផ្តល់ជំនួយ និងបន្តការឃ្លាំមើលពីការលំបាករបស់ប្រជាពលរដ្ឋដែលបង្កឡើងដោយគ្រោះធម្មជាតិផ្សេងៗជាមួយអាជ្ញាធរខេត្តបាត់ដំបងសម្រាប់ថ្ងៃខាងមុខទៀត ៕ កញ្ចក់ទិព្វ
ចែករំលែកព័តមាននេះ