ខេត្តព្រៃវែង ៖ បញ្ហាទំនាស់ដីធ្លីបានក្លាយជាជំងឺរ៉ាំរ៉ៃដែលភាគច្រើនកើតឡើង ទៅលើ ប្រជាពលរដ្ឋស្លូតត្រង់ ទន់ខ្សោយ ក្រីក្រ ហើយ បើកើតហើយមិនងាយព្យាបាលឱ្យសះស្បើយភ្លាមៗបានទេ ដែលករណីនេះ កំពុងរាតត្បាតស្ទើរគ្រប់ទីកន្លែង ។ ជាក់ស្តែងប្រជាពលរដ្ឋចំនួន១២២គ្រួសារ រស់នៅក្នុងភូមិតាហ៊េល«ខ» ឃុំរាធរ
ខេត្តព្រៃវែង ៖ បញ្ហាទំនាស់ដីធ្លីបានក្លាយជាជំងឺរ៉ាំរ៉ៃដែលភាគច្រើនកើតឡើងទៅលើ ប្រជាពលរដ្ឋស្លូតត្រង់ ទន់ខ្សោយ ក្រីក្រ ហើយ បើកើតហើយមិនងាយព្យាបាលឱ្យសះស្បើយភ្លាមៗបានទេ ដែលករណីនេះ កំពុងរាតត្បាតស្ទើរគ្រប់ទីកន្លែង ។ ជាក់ស្តែងប្រជាពលរដ្ឋចំនួន១២២គ្រួសារ រស់នៅក្នុងភូមិតាហ៊េល«ខ» ឃុំរាធរ ស្រុកព្រះស្តេច រងនូវការលំបាក ហើយបាត់បង់ផ្លូវសាធារណៈ ដោយសារតែបុគ្គលម្នាក់រំលោភយកធ្វើជាកម្មសិទ្ធិ ។ បើទោះជាអាជ្ញាធរភូមិ-ឃុំ-ស្រុក ធ្លាប់បានចុះជួយដោះស្រាយឱ្យមួយលើកជាពីរលើកទៅហើយនៅតែពុំមានលទ្ធផល រហូតពួកគាត់បានដាក់ពាក្យបណ្តឹងទៅសាលាដំបូងខេត្តព្រៃវែង អភិបាលខេត្ត និងទៅប្រធានរដ្ឋសភាជាតិ ក៏នៅតែពុំទាន់មានលទ្ធផលនៅឡើយ ។
ដីដែលមានទំនាស់នេះតូចសោះ និងជាដីទ.ទឹកដែលមានទំហំទទឹង៣ម៉ែត្រ បណ្តោយ៧០៥មែ៉ត្រជាសម្បត្តិសាធារណៈក្នុងសហគមន៍សម្រាប់ធ្វើផ្លូវដឹកកសិផលពីស្រែមកលំនៅឋានហើយសម្រាប់ធ្វើផ្លូវទឹកផងដែរ ។ ឥឡូវត្រូវបានបុគ្គលម្នាក់ឈ្មោះឡឹង សុវណ្ណ រំលោភយកធ្វើជាកម្មសិទ្ធិរបស់ខ្លួន ពួកគាត់បាននាំគ្នាឈរដាំជាបង្គោល២ជួរ លើទំហំដីដែលពួកគាត់សុំទាមទារឱ្យរក្សាទុកជាសម្បត្តិសាធារណៈ កាលពីថ្ងៃទី២១ ធ្នូ ដើម្បីជាការបញ្ជាក់បង្ហាញនូវការរំលោភបំពានដកបង្គោល កាប់គល់រាំងបំបាត់ភស្តុតាងពីសំណាក់អ្នកដែលព្យាយាមយក។
លោកយោគ ឌី ជាអភិបាលរងស្រុកព្រះស្តេច និងជាអភិបាលស្តីទីបានឱ្យកោះសន្តិភាពដឹងថា កន្លងមក លោកបានបង្កើតគណៈកម្មការដែលមានរូបលោកជាប្រធានចុះទៅដោះស្រាយឱ្យប្រជាពលរដ្ឋទាំង១២២គ្រួសារ ជាមួយអ្នកទំនាស់ តែពុំទទួលបានលទ្ធផល ។ លោកបាននិយាយពីប្រវត្តិដីទំនាស់នោះថា ដំបូងដីស្រែប្រាំង និងដីទ.ទឹកនេះជាដីរបស់ឈ្មោះស្រ៊ុន ស្រឿន។ មកដល់ឆ្នាំ១៩៩៩ ឈ្មោះស្រ៊ុន ស្រឿន លក់ដីស្រែនេះឱ្យទៅឈ្មោះអ៊ុច ខេង ក្នុងតម្លៃ៣តម្លឹង តែមិនលក់ទ.ទឹកដែលជាប់នឹងព្រំដីខាងជើងទេ ដោយគាត់ទុកជាសម្បត្តិសាធារណៈ ។ ដល់ថ្ងៃទី២០ មេសា ឆ្នាំ២០០៩ អ៊ុច ខេង លក់ដីស្រែនេះឱ្យទៅឈ្មោះឡឹង សុវណ្ណ ក្នុងតម្លៃ១០តម្លឹង៨ជី៥ហ៊ុន ហើយក៏មិនបានលក់ដីទ.ទឹកដែលជាសម្បត្តិសាធារណៈនោះដែរ ។ ក្រោយមក បែរជាឡឹង សុវណ្ណ បានទៅភ្ជួរវាលយកដីទទឹកធ្វើជាស្រែសាបព្រោះស្រូវ ហើយហាមមិនឱ្យប្រជាពលរដ្ឋយកដីទ.ទឹកធ្វើជាផ្លូវដឹកជញ្ជូនកសិផលតទៅទៀតឡើយ ទើបការទំនាស់ផ្ទុះឡើង ។
លោកបន្តថា ប្រឈមមុខនឹងបញ្ហានេះ លោកបានហាមប្រជាពលរដ្ឋសុំកុំឱ្យប្រើអំពើហិង្សាក្នុងទំនាស់គ្នានេះឱ្យសោះ ទុកឱ្យអាជ្ញាធរដោះស្រាយជូន តែការដោះស្រាយនោះពុំទទួលបានលទ្ធផលជូនប្រជាពលរដ្ឋនៅឡើងទេ ។
លោកបន្តថាលោក បានចុះទៅសម្របសម្រួលម្តងទៀតជាលើកទី២ ដោយឱ្យឈ្មោះអ៊ុច ខេង យល់ព្រមចេញថ្លៃដីត្រង់កន្លែងទ.ទឹកចំនួន១ជីមាស ឱ្យទៅឈ្មោះឆេង ឆន ដែលឈ្មោះឡឹង សុវណ្ណ ផ្ទេរសិទ្ធិឱ្យទៅឆេង ឆន ចូលរួមដោះស្រាយទំនាស់។ តែភាគីឆេង ឆន មិនព្រមទទួលយកទេ គឺសុខចិត្តឱ្យប្រជាពលរដ្ឋទាំង១២២គ្រួសារដែលបានផ្តិតមេដៃឱ្យស្បថថា ពីមុនមកដីទ.ទឹកនេះពិតជាមានមែន ហើយការស្បថនេះខ្វះតែមួយនាក់ក៏មិនព្រមដែរ ស្បថឱ្យគ្រប់គ្នាទើបប្រគល់ឱ្យ ។ ទោះជាយ៉ាងនេះក្តី ភាគីខាងឈ្មោះឡឹង សុវណ្ណ បែរជាមិនព្រម ថែមទាំងដកបង្គោលថ្មកំណត់ព្រំដី កាប់គល់រាំងចោល បំបាត់ភស្តុតាងថែមទាំងជេរ ប្រមាថដល់អាជ្ញាធរភូមិ-ឃុំ-ស្រុកថែមទៀត ។
លោកក៏បានបញ្ជូនសំណុំរឿងនេះទុកឱ្យថ្នាក់ខេត្តជាអ្នកដោះស្រាយម្តង។ ដោយរង់ចាំការចុះដោះស្រាយថ្នាក់ខេត្តយូរពេក ពួកគាត់ទាំង១២២គ្រួសារបានធ្វើពាក្យបណ្តឹងទៅគណៈកម្មការសិទ្ធិមនុស្សទទួលពាក្យបណ្តឹង អង្កេត និងទំនាក់ទំនងរដ្ឋសភា ព្រឹទ្ធសភា តាមរយៈ លោកងួន ញ៉ិល ប្រធានរដ្ឋសភាស្តីទី ហើយក៏បានចេញលិខិតលេខ០៤៨ រស.គ១ ចុះថ្ងៃទី២ មីនា ឆ្នាំ២០១១ ដែលក្នុងលិខិតនោះបានបញ្ជាក់ថា សុំឱ្យលោកអភិបាលខេត្តព្រៃវែង ជួយពិនិត្យ និងដោះស្រាយជូនប្រជាពលរដ្ឋអំពីករណីនោះ ។ ប៉ុន្តែរហូតមកដល់ពេលនេះ នៅតែពុំទទួលបានលទ្ធផលដដែល ។ ធ្វើឱ្យប្រជាពលរដ្ឋមានការព្រួយបារម្ភបំផុតព្រោះជិតដល់ពេលដែលត្រូវដឹកជញ្ជូនកសិផលហើយ ៕ ចក្រី
ចែករំលែកព័តមាននេះ