រាជធានីភ្នំពេញ ៖ អាណិកជនខ្មែរនៅសហរដ្ឋអាមេរិកមួយរូប បានឧបត្ថម្ភថវិកាចំនួន២០០ដុល្លារ ដល់ស្ត្រីមេម៉ាយមានកូន៥នាក់ ដែលត្រូវប្តីវាយធ្វើបាប និងចុះចោលជាបន្តបន្ទាប់ ហើយថវិកានេះត្រូវបានភ្នាក់ងារកោះសន្តិភាពនាំយកទៅប្រគល់ដល់ដៃស្ត្រីរូបនេះ នៅឯផ្ទះជួលដែលនាងស្នាក់នៅ កាលពីព្រឹក ថ្ងៃទី១៩ ធ្នូ ឆ្នាំ២០១១ កន្លងមក ដោយមានតំណាងរបស់លោកមេភូមិត្រពាំងថ្លឹង ២នាក់ ចូលរួមក្នុងពេលប្រគល់នោះផងដែរ ។
ថវិកាចំនួនពីររយដុល្លារនោះ គឺជាអំណោយរបស់លោកហ៊ីង សុជាតិ ជាសប្បុរសជនខ្មែររស់នៅរដ្ឋអូហៃយ៉ូ សហរដ្ឋអាមេរិក ដែលបានផ្ញើតាមរយៈលោកណុប ច័ន្ទតារា សហការីកោះសន្តិភាពប្រចាំក្រុងឡងប៊ិច ក្នុងទឹកចិត្តអាណិតអាសូរ និងជាការជួយរំលែកនូវការខ្វះខាត និងទុក្ខលំបាករបស់ស្ត្រីរូបនេះ ដែលខំរកស៊ីទាំងលំបាកចិញ្ចឹមកូនស្រី៥នាក់ នៅក្នុងបន្ទុក ។
ស្ត្រីអភ័ព្វរូបនេះឈ្មោះឡាំង បុប្ផា អាយុ៣៥ឆ្នាំ មានស្រុកកំណើតនៅភូមិកំពង់ភ្នំ ឃុំក្បាលជ្រោយ ស្រុកលើកដែក ខេត្តកណ្តាល ។ នាងបានរៀបការជាមួយប្តីទី១ឈ្មោះស៊ឺ លីហៀង បច្ចុប្បន្នអាយុ៦១ឆ្នាំ កាលពីឆ្នាំ១៩៩៥ បានកូនស្រី៥នាក់ តែដល់ឆ្នាំ២០០៧ ក៏បែកបាក់គ្នា ដោយប្តីទៅមានស្រីថ្មីទៀត ។ ក្រោយមក នាងមករកស៊ីនៅភ្នំពេញមានប្តីទី២ ឈ្មោះកែវ រដ្ឋា អាយុ៤៤ឆ្នាំ តែចាប់ដៃគ្នាបានរយៈពេលជាង៥ខែ ប៉ុណ្ណោះក៏បែកបាក់គ្នាទៀត ហើយប្តីក្រោយនេះបានវាយធ្វើបាបឥតត្រាប្រណីបណ្តាលឱ្យនាងមានរបួសធ្ងន់ធ្ងរ រហូតមកដល់ពេលនេះមិនទាន់ជាសះស្បើយនៅឡើយទេ ឯប្តីកំណាចនោះក៏បានចាកចេញចោលនាងបាត់ទៀត ។
ស្ត្រីឈ្មោះឡាំង បុបា្ផ បាននិយាយរៀបរាប់ទៀតថា ប្តីទី១ របស់នាងឈ្មោះស៊ឺ លីហៀង កាលពីនៅជុំគ្នាមិនដែលវាយធ្វើបាបទេ គឺគាត់ស្រឡាញ់នាងខ្លាំងណាស់ ឯនាងវិញក៏ស្រឡាញ់គាត់ណាស់ដែរ ។ ប៉ុន្តែបន្ទាប់ពីចាប់ដៃគ្នាបានរយៈពេល១៣ឆ្នាំ ប្តីចាប់ផ្តើមបែកចិត្តផិតក្បត់ទៅមានស្រីថ្មី ដែលស្រីម្នាក់នោះគឺជាប្អូនជីដូនមួយនេះតែម្តងមិនមែនអ្នកសាច់ឆ្ងាយឡើយ រួចប្តីរបស់នាងក៏ពង្រត់ប្អូនស្រីជីដូនមួយរបស់នាងទៅបាត់ស្រមោលចោលនាង និងកូនស្រីទាំង៥នាក់ ដែលកាលណោះកូនទី៥ មិនទាន់កើតនៅឡើយទេ ។ ក្រោយពីប្តីយកប្អូនជីដូនមួយនាងធ្វើជាប្រពន្ធចុះចោលរូបនាងបាត់ នាងក៏សម្រេចចិត្តចាកចេញពីស្រុកកំណើតមករកស៊ីនៅភ្នំេពញ ធ្វើជាសន្តិសុខយាមរោងចក្ររកប្រាក់ចិញ្ចឹមកូនស្រីទាំង៥នាក់ ។ រហូតដល់ឆ្នាំ២០១១ នាងបានជួបបុរសពោះម៉ាយម្នាក់ឈ្មោះកែវ រដ្ឋា អាយុ៤៤ឆ្នាំ ហើយបុរសនោះធ្វើខ្លួនជាមនុស្សសុភាពរាបសាគួរឱ្យអាណិតមកសុំស្នេហាពីរូបនាង ។
ស្ត្រីមេម៉ាយនេះរៀបរាប់ទៀតថា ដោយឃើញចរិតគួរឱ្យរាប់អាន និងអាចពឹងពាក់បានទើបនាងយល់ព្រម និងបានចាប់ដៃគ្នាជាប្តីប្រពន្ធ ប៉ុន្តែអ្វីដែលស្មានមិនដល់នោះ គឺប្តីនាងក្រោយនេះ មិនគិតគូររកស៊ីអ្វីទេ គិតតែដើរផឹកស្រវឹងរួចរករឿងវាយធ្វើបាបនាងឥតស្រាកស្រាន្ត ។ មិនតែប៉ុណ្ណោះ ប្អូនថ្លៃរបស់នាងក៏បានជួយបងប្រុសរបស់គេវាយនាងដែរ ហើយនៅលើកចុងក្រោយ ខណៈនាងមានផ្ទៃពោះ២ខែ ដោយមើលឃើញចរិតមិនគួរឱ្យទុកចិត្តទើបនាងសម្រេចចិត្តយកកូនចេញ ។
ពេលយកកូនចេញបានតែរយៈពេល៤ថ្ងៃប៉ុណ្ណោះ ក៏ត្រូវប្តី និងប្អូនថ្លៃស្រីឈ្មោះកែវ សុភ័ក្ត្រ អាយុ២៥ឆ្នាំ ព្រួតគ្នាវាយធ្វើបាបធ្វើឱ្យនាងទាស់សរសៃឈឺយ៉ាងធ្ងន់ធ្ងរ ។ សព្វថ្ងៃនាងជួលផ្ទះគេស្នាក់នៅបន្ទប់លេខ១៧J ប្លុកឡឥដ្ឋ ភូមិត្រពាំងថ្លឹង សង្កាត់ចោមចៅ ខណ្ឌដង្កោ រាជធានីភ្នំពេញហើយដោយជីវភាពលំបាកពេកទោះបីមិនទាន់ជាសះស្បើយនៅឡើយក្តី ក៏នាងបានចូលធ្វើការនៅរោងចក្រ ។ ចំណែកកូនស្រីទី១របស់នាងអាយុ១៥ឆ្នាំ ទៅស៊ីឈ្នួលលក់កាហ្វេឱ្យគេនៅផ្សារកាណាឌីយ៉ា កូនស្រីទី២អាយុ១៣ឆ្នាំ ជួលលក់បង្អែមឱ្យគេ កូនស្រីទី៣អាយុ១១ឆ្នាំ ឱ្យទៅនៅជាមួយម្តាយនាងឯស្រុក ហើយឮអ្នកជិតខាងប្រាប់ថា ម្តាយរបស់នាងធ្វើបាបកូននាងខ្លាំងណាស់ ។ រីឯកូនស្រីទី៤អាយុ៨ឆ្នាំ ត្រូវអ្នកជិតខាងយកទៅចិញ្ចឹមទំនុកបម្រុងឱ្យរៀនសូត្រ និងកូនទី៥ទើបអាយុ៤ឆ្នាំប៉ុណ្ណោះ រស់នៅជាមួយនាង ។
ស្ត្រីរូបនេះ បានបញ្ជាក់ថា មូលហេតុដែលប្តីក្រោយរបស់នាងផឹកស្រាស្រវឹងរួចរករឿងវាយតប់រហូតនោះ គឺដោយសារតែរូបនាងឱ្យកូនស្រីច្បងអាយុ១៥ឆ្នាំ ទៅលក់កាហ្វេឱ្យគេហើយទំនងប្តីក្រោយមានគំនិតអាក្រក់លើកូនស្រីនាង ទើបខឹងនាង ។ ម្យ៉ាងទៀត នាងមើលទៅចិត្តប្តីមិនស្មោះត្រង់លើកូនស្រី ទើបនាងឱ្យកូនស្រីទៅស៊ីឈ្នួលលក់កាហ្វេឱ្យគេបែបនេះ ៕
សេចក្តីជូនដំណឹង
សូមជម្រាបជូនដល់បងប្អូនជនរួមជាតិដែលកំពុងរស់នៅក្រៅប្រទេស ឱ្យបានជ្រាបថា លោកណុប ច័ន្ទដារា រស់នៅក្រុងឡូសអេនចឺឡេស ទូរស័ព្ទលេខ ៥៦២ ៣១៣ ៣៦៩៩ អ៊ីម៉ែល ៖ cnop@juno.com គឺជាអ្នកទទួលរាល់ប្រាក់អំណោយសប្បុរសធម៌នានា ដែលបងប្អូនមានបំណងចង់ផ្ញើមកជួយដល់ជនរួមជាតិ តាមរយៈសារព័ត៌មានកោះសន្តិភាព ដោយយើងខ្ញុំសន្យាថានឹងពាំនាំទៅប្រគល់ដល់ដៃជនទុរគត ជនក្រីក្រ ឬជនជួបគ្រោះថ្នាក់ផ្សេងៗ មិនឱ្យខុសបំណងនោះទេ ។
ទូរស័ព្ទទាក់ទងលេខ (៨៥៥) ១៧៤៤៩០១៧ ឬអ៊ីម៉ែល ៖ News@kspg.co ឬ ads@kspg.co ៕
ចែករំលែកព័តមាននេះ