ខេត្តកំពង់ចាម ៖ កាលពីព្រឹកថ្ងៃទី២០ ធ្នូ លោកឧកញ៉ាអូស្មាន ហាស្សាន់ រដ្ឋលេខាធិការក្រសួងការងារនិងបណ្តុះបណ្តាលវិជ្ជាជីវៈនិងជាប្រធានអង្គការមូលនិធិអភិវឌ្ឍន៍មូស្លីមកម្ពុជា បានអញ្ជើញជាអធិបតីភាពក្នុងឱកាសបិទវគ្គបណ្តុះបណ្តាលគរុកោសល្យនិងចែកវិញ្ញាបនបត្រដល់គ្រូអ៊ិស្លាមចំនួន២០០នាក់ នៅភូមិរកា សង្កាត់សំបួរមាស ក្រុងកំពង់ចាម ។
វគ្គបណ្តុះបណ្តាលគរុកោសល្យគ្រូអ៊ិស្លាម ដែលធ្វើពិធីបិទនៅពេលនេះជាវគ្គទី២ហើយ ក្នុងគម្រោងបណ្តុះបណ្តាលចំនួន៥វគ្គដែលបានបង្កើតឡើងដោយមូលនិធិអភិវឌ្ឍន៍មូស្លីមកម្ពុជា សហការជាមួយគណៈដឹកនាំជាន់ខ្ពស់នៃសាសនាអ៊ិស្លាមកម្ពុជា ក្រោមការជួយឧបត្ថម្ភពីលោក Dato Aidit Bin Ghazali សមាជិកនៃក្រុមប្រឹក្សាសាសនាអ៊ិស្លាម ស្ថាប័នហ្សាកាត់នៅរដ្ឋ Selangor នៃប្រទេសម៉ាឡេស៊ីអស់ថវិកាចំនួន៧១.២០០ដុល្លារ សម្រាប់បណ្តុះបណ្តាលគ្រូអ៊ិស្លាមទូទាំងប្រទេសចំនួន៨០០ នាក់ ។
លោកស៊ឹម សុព្រី អភិបាលរងខេត្ត បានថ្លែងថា យើងជាគ្រូបង្រៀនត្រូវមានសមត្ថភាពបច្ចេកទេសក្នុងការបង្រៀន និងមានសីលធម៌រស់នៅល្អ អត្តចរិតល្អ ធ្វើជាគំរូល្អៗ ដល់សិស្សទើបការសាបព្រោះចំណេះដឹងដល់សិស្សទទួលបានលទ្ធផលល្អ ។
លោក Dato Aidit Bin Ghazali ថ្លែងថាបន្ទាប់ពីបញ្ចប់វគ្គបណ្តុះបណ្តាលគរុកោសល្យគ្រូបង្រៀននៅក្នុងខេត្តកំពង់ចាម នេះ នៅថ្ងៃទី២៦ ធ្នូ គណៈប្រតិភូរបស់លោកដែលជាគ្រូបង្គោលនឹងបន្តដំណើរទៅបើកវគ្គបណ្តុះបណ្តាលនៅខេត្តក្រចេះទៀត ហើយបើតាមគម្រោងមានគ្រូៗអ៊ិស្លាមចំនួន២០០នាក់ចូលរួមដើម្បីក្រេបយកចំណេះដឹងគរុកោសល្យគ្រូបង្រៀន ។
លោកឧកញ៉ាអូស្មាន ហាស្សាន់ បានថ្លែងអំណរគុណយ៉ាងជ្រាលជ្រៅចំពោះស្ថាប័នហ្សាកាត់ រដ្ឋ Selangor ប្រទេសម៉ាឡេស៊ី ដែលតែងតែជួយឧបត្ថម្ភគាំទ្រសហគមន៍អ៊ិស្លាមនៅកម្ពុជា ជាពិសេសជួយបណ្តុះបណ្តាលធនធានមនុស្ស ។ រាជរដ្ឋាភិបាលកម្ពុជា ក្រោមការដឹកនាំរបស់សម្តេចអគ្គមហាសេនាបតីតេជោហ៊ុន សែន បានធ្វើឱ្យប្រទេសមានស្ថិរភាព និងការអភិវឌ្ឍលើគ្រប់វិស័យ ហើយគ្រប់សាសនាទាំងអស់រស់នៅជាមួយគ្នាយ៉ាងសុខដុមរមនា ។
លោកឧកញ៉ា ក៏បានផ្តាំផ្ញើដល់លោកគ្រូអ្នកគ្រូទាំងអស់់ ត្រូវយកចំណេះដឹងដែលទទួលបានពីវគ្គបណ្តុះបណ្តាលគរុកោសល្យនេះ ទៅបង្ហាត់បង្រៀនដល់សិស្សនៅតាមមូលដ្ឋានរបស់ខ្លួន ឱ្យពួកគេក្លាយជាសិស្សល្អ មិត្តល្អ កូនល្អ និងជាពលរដ្ឋល្អ នៅក្នុងសង្គមជាតិ ដើម្បីរួមចំណែកអភិវឌ្ឍន៍ប្រទេសជាតិឱ្យកាន់តែរីកចម្រើនថែមទៀត ក្រោមការដឹកនាំរបស់សម្តេចអគ្គមហាសេនាបតីតេជោហ៊ុន សែន ។ លោកឧកញ៉ាអូស្មាន ហាស្សាន់ រួមជាមួយគណៈប្រតិភូប្រទេសម៉ាឡេស៊ី ក៏បានចែកវិញ្ញាបនបត្រជូនដល់លោកគ្រូ អ្នកគ្រូចំនួន២០០នាក់ មកពីខេត្តកំពង់ចាម ខេត្តកំពង់ធំ និងខេត្តសៀមរាប ដែលបានបញ្ចប់វគ្គបណ្តុះបណ្តាលនេះ និងបានឧបត្ថម្ភថវិកាសម្រាប់ធ្វើដំណើរក្នុងម្នាក់ៗចំនួន១២ម៉ឺនរៀល ដែលសរុបទាំងអស់២៤លានរៀល ៕ ជលធា
ចែករំលែកព័តមាននេះ