រាជធានីភ្នំពេញ ៖ លោកតុ វ៉ាន់ចាន់ តំណាងរាស្ត្រគណបក្សសម រង្ស៊ី មណ្ឌលតាកែវ ដែលទើបតែត្រូវបានបណ្តេញចេញពីបក្សរិះគន់ថា បើបក្សប្រឆាំងនេះចេះតែដេញសមាជិកដោយគ្មានមូលហេតុបែបនេះនឹងមិនមានជោគជ័យ ហើយឈានទៅរលំរលាយនៅពេលអនាគតមិនខាន។ ការថ្លែងរបស់អ្នកតំណាងរាស្ត្ររូបនេះ បានធ្វើឡើងកាលពីព្រឹកថ្ងៃទី១០ តុលា ២០១១ នៅឯបន្ទប់របស់លោកនៃវិមានរដ្ឋសភាជាតិ ខណៈហៅអ្នកសារព័ត៌មានមកជួបជុំនឹងផ្តល់ព័ត៌មានអំពីការយល់ឃើញរបស់លោក។
លោកអតីតំណាងរាស្ត្រមណ្ឌលតាកែវ បានលើកឡើងទៀតថា ការបណ្តេញបុគ្គលិក ឬសមាជិកបក្សជាច្រើនលើកគឺធ្វើឡើងពីសំណាក់ក្រុមមួយនៅក្នុងគណៈកម្មាធិការអចិន្ត្រៃយ៍របស់បក្សសម រង្ស៊ី ដោយគ្រាន់តែស្តាប់មនុស្សអែបអបមួយចំនួនក៏រិះរកឧបាយកលបណ្តេញសកម្មជននិងតំណាងរាស្ត្ររបស់ខ្លួនជាបន្តបន្ទាប់។គណបក្សសម រង្ស៊ី បានសម្រេចកាលពីថ្ងៃទី៧ តុលា ២០១១ បណ្តេញលោកតុ វ៉ាន់ចាន់ និងលុបឈ្មោះចេញពីបញ្ជីរបស់គណបក្សសម រង្ស៊ី បន្ទាប់ពីបក្សបានពិនិត្យ និងពិភាក្សាអំពីភាពអសកម្មការងារមួយចំនួនរបស់លោក និងធ្វើសកម្មភាពផ្ទុយពីផលប្រយោជន៍របស់បក្ស។
លោកតុ វ៉ាន់ចាន់បន្តថា ការសម្រេចរបស់គណៈកម្មាធិការអចិន្ត្រៃយ៍គណបក្សសម រង្ស៊ី គឺធ្វើឡើងទាំងងងឹតងងុល មិនបានស្រាវជ្រាវ ហើយគ្រាន់តែស្តាប់មនុស្សមួយក្រុមតូចដែលពូកែខាងអែបអបឡេមឡឺម ប៉ុណ្ណោះ ក៏សម្រេចធ្វើការបណ្តេញមនុស្សល្អៗ និងសកម្មជនរបស់ខ្លួន ចេញពីបក្សមុនធ្វើការណែនាំ ឬដាក់ពិន័យ ពោលគឺគ្មានភស្តុតាងក្នុងការចោទប្រកាន់កំហុសដូច្នេះគ្មានតម្លាភាពទេ ៕
ចែករំលែកព័តមាននេះ