អតីតទាហានម្នាក់ដែលត្រូវបានចាប់ខ្លួន ក្រោយពីកើតហេតុការណ៍ចាប់មនុស្សជាចំណាប់ខ្មាំងមួយនៅឯមូលដ្ឋានយោធា ក្នុងរដ្ឋចចជៀរ បានប្រឈមមុខនឹងការចោទប្រកាន់ជាច្រើនករណី ក្នុងនោះរួមមានការគំរាមធ្វើឃាតប្រធានាធិបតីសហរដ្ឋអាមេរិក លោកអូបាម៉ា និងអតីតប្រធានាធិបតីសហរដ្ឋអាេមរិក លោកប៊ីលគ្លីនតុន ។ នេះបើយោងតាមឯកសាររបស់តុលាការសហព័ន្ធដែលចេញផ្សាយកាលពីថ្ងៃទី៧ កញ្ញា កន្លងមក ។
ជននោះឈ្មោះ Robert Anthony អាយុ២៩ឆ្នាំ រស់នៅក្នុងទីក្រុង Hinesville រដ្ឋចចជៀរ ត្រូវបានចាប់ខ្លួនកាលពីថ្ងៃទី៦ កញ្ញា ក្រោយពីព្រឹត្តិការណ៍ចាប់មនុស្សជាចំណាប់ខ្មាំងរយៈពេល២ម៉ោងនៅឯមន្ទីរពេទ្យក្នុងសហគមន៍មួយ ។ នេះបើយោងតាមការិយាល័យស៊ើបអង្កេតសហព័ន្ធ FBI ។ FBI ឱ្យដឹងថា ក្រោយពីត្រូវបានចាប់ខ្លួនជននេះ ត្រូវបញ្ជូនទៅពន្ធនាគារ ហើយក្នុងអំឡុងពេលនៃការសួរចំលើយជននេះបានលាតត្រដាងពីផែនការរបស់គេថា គេមានបំណងធ្វើឃាតលោកប្រធានាធិបតីបារ៉ាក់ អូបាម៉ា និងលោកប៊ីល គ្លីនតុន ។
ការឆែកឆេរនៅផ្ទះជនឈ្មោះ Anthony នេះបានរកឃើញកាំភ្លើងវែងចំនួន១០ដើម ហើយអាជ្ញាធរបានរកឃើញសៀវភៅកំណត់ហេតុបង្ហាញអំពីក្រុមជួយសង្គ្រោះជនដែលត្រូវចាប់ជាចំណាប់ខ្មាំង ។ នៅក្នុងការសួរចំលើយនោះគេបានសួរថា តើអ្នកឯងនឹងសំលាប់លោកអូបាម៉ា និងលោកគ្លីនតុន ឬប្រសិនបើឱកាសផ្តល់ឱ្យ? ជននេះបានឆ្លើយថា «បាទ» ៕
ចែករំលែកព័តមាននេះ