ខេត្តព្រៃវែង ៖ កាលពីព្រឹកថ្ងៃទី១៥ សីហា នៅស្នាក់ការគណបក្សប្រជាជនកម្ពុជា ស្រុកស្វាយអន្ទរ មានរៀបចំពិធីផ្សព្វផ្សាយសេចក្តីសម្រេចសន្និបាតគណៈកម្មាធិការ គណបក្សប្រជាជនកម្ពុជាលើកទី៣៦ អាណត្តិទី៥ ក្រោមអធិបតីភាពលោកនេត សាវឿន សមាជិកគណៈអចិន្ត្រៃយ៍គណៈកម្មាធិការកណ្តាលគណបក្សប្រជា
ខេត្តព្រៃវែង ៖ កាលពីព្រឹកថ្ងៃទី១៥ សីហា នៅស្នាក់ការគណបក្សប្រជាជនកម្ពុជា ស្រុកស្វាយអន្ទរ មានរៀបចំពិធីផ្សព្វផ្សាយសេចក្តីសម្រេចសន្និបាតគណៈកម្មាធិការគណបក្សប្រជាជនកម្ពុជាលើកទី៣៦ អាណត្តិទី៥ ក្រោមអធិបតីភាពលោកនេត សាវឿន សមាជិកគណៈអចិន្ត្រៃយ៍គណៈកម្មាធិការកណ្តាលគណបក្សប្រជាជនកម្ពុជា ប្រធានក្រុមការងារគណបក្សប្រជាជនកម្ពុជាចុះជួយស្រុកស្វាយអន្ទរនិងជាអគ្គស្នងការនគរបាលជាតិ។
អញ្ជើញចូលរួមក្នុងពិធីនេះ ក្រុមការងារថ្នាក់ស្រុកចំនួន២៥នាក់ សមាជិកបក្សតាមអង្គភាពជុំវិញស្រុកចំនួន២១នាក់ ក្រុមប្រឹក្សាឃុំក្នុងមុខតំណែង៦២នាក់ ក្រុមប្រឹក្សាស្រុកក្នុងមុខតំណែង១៥នាក់ ប្រធានសាខាបក្សភូមិ១៣៨នាក់ ក្រុមយុវជនឃុំនិងស្រុកចំនួន៣០នាក់ សរុប២៩១នាក់។ ក្រោយពីលោកពុទ្ធ សារុន បានឡើងអានរបាយការណ៍សន្និបាតគណៈកម្មាធិការកណ្តាលគណបក្សស្តីពីសភាពការណ៍ និងការងារគណបក្សឆ្នាំ២០១០ ដើមឆ្នាំ២០១១និងទិសដៅភារកិច្ចចុងឆ្នាំ២០១១ និងឆ្នាំ២០១២រួចមក លោកម៉ក់ជីតូ ក៏បានអានឯកសារជំនួយសា្មរតីសម្រាប់ការបោះឆ្នោតជ្រើសតាំងសមាជិកព្រឹទ្ធសភានីតិកាលទី៣ និងការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៣ នាឆ្នាំ២០១២ ។ បន្ទាប់មកលោកយី យ៉ូន ក៏បានអានសុន្ទរកថាសម្តេចអគ្គមហាធម្មពោធិសាលជា ស៊ីម ប្រធានគណបក្សប្រជាជនកម្ពុជាក្នុងឱកាសបិទសន្និបាតគណៈកម្មាធិការកណ្តាលលើកទី៣៦ ។
មានប្រសាសន៍ក្នុងឱកាសនោះលោកនេត សាវឿនបានស្នើឱ្យក្រុមការងារក៏ដូចជាសមាជិក សមាជិកា ទាំងអស់បន្តជួយពង្រឹង និងថែរក្សាសន្តិសុខ សណ្តាប់ធ្នាប់សាធារណៈនៅក្នុងស្រុកឱ្យបានល្អប្រសើរថែមមួយកម្រិតទៀត ត្រូវយកចិត្តទុកដាក់បន្តការចិញ្ចឹមចលនា ការជួយគ្នាទៅវិញទៅមកឱ្យបានខ្លាំងក្លា ដោយមិនទុកឱ្យប្រជាពលរដ្ឋមានគ្រោះថ្នាក់ ដោយប្រការណាមួយឡើយ។ ស្នងការដ្ឋានខេត្ត ត្រូវត្រៀមកម្លាំង ត្រៀមទូកម៉ាស៊ីន សម្រាប់ជួយប្រជាពលរដ្ឋនៅពេលមានគ្រោះធម្មជាតិ ដូចជាទឹកជំនន់ កើតឡើង បន្តកសាងសមាជិកបក្សថ្មីទាំងស្មារតីទាំងសម្ភារ ជួយណែនាំគាត់ឱ្យយល់អំពីគោលនយោបាយរបស់រាជរដ្ឋាភិបាលក៏ដូចជាគោលនយោបាយរបស់គណបក្ស។ កសាងបក្សដល់ណាត្រូវពង្រឹងសមាជិកបក្សទៅដល់កន្លែងនោះ។ អាជ្ញាធរគ្រប់លំដាប់ថ្នាក់ក៏ត្រូវតែមើលឱ្យបានច្បាស់លាស់ ហើយត្រូវជួយជំរុញឱ្យបងប្អូនប្រជាពលរដ្ឋយកចិត្តទុកដាក់ធ្វើស្រែ ដាំដំណាំរួមផ្សំ ចិញ្ចឹមគោ ក្របី។ល។ ដើម្បីឱ្យជីវភាពក្រុមគ្រួសាររបស់ពួកគាត់កាន់តែធូរធារល្អប្រសើរឡើងថែមទៀត។ ជំរុញផ្សព្វផ្សាយសេចក្តីសម្រេចចិត្តសន្និបាតគណៈកម្មាធិការកណ្តាល គណបក្សប្រជាជនកម្ពុជាលើកទី៣៦ អាណត្តិទី៥ ឱ្យបានខ្លាំងក្លាទៅដល់មូលដ្ឋាន។
នៅក្នុងឱកាសនោះដែរ លោកនេត សាវឿនក៏បានជួយឧបត្ថម្ភសមាជិកដែលបានចូលរួមចំនួន២៩១នាក់ ក្នុងម្នាក់ៗទទួលបានថវិកាចំនួន១ម៉ឺនរៀល និងក្រមា១ ក្រៅពីនេះលោកបានជួយឧបត្ថម្ភថវិកាមួយចំនួនដល់គណបក្សស្រុកស្វាយអន្ទរដើម្បីចាក់ដីបំពេញទីស្នាក់ការផងដែរ៕
ចែករំលែកព័តមាននេះ