ក្រោយសំលាប់រង្គាលប៉ូលិសនីហ្សេរីយ៉ាចាប់ខ្លួនមនុស្ស២០០នាក់
ដោយ ៖ អប្សរា
ថ្ងៃសៅរ៏ ទី១៣ ខែមិនា ឆ្នាំ២០១០ ម៉ោង ១៨:៤៩
គេហទំព័របរទេស
.
ប៉ូលិសនីហ្សេរីយ៉ាប្រកាសកាលពីថ្ងៃទី១១ មីនា ពីការចាប់ខ្លួនមនុស្សប្រមាណជា២០០នាក់ ក្រោយការវាយប្រហារលើភូមិពួកគ្រឹស្ដ៣ ដែលបណ្ដាលឱ្យមនុស្សស្លាប់ជាច្រើនរយនាក់កាលពីចុងសបា្ដហ៍កន្លងមកនេះ។
សភាពការណ៍នៅតែតានតឹងក្នុងទីក្រុងចូស រដ្ឋធានីនៃរដ្ឋបា្លតូរបស់នីហ្សេរីយ៉ា ក្រោយការសំលាប់រង្គាលនៅភូមិដូហ្គោ ណាហាវ៉ា ភូមិហ្សូត និងភូមិរ៉ាតសាតដែលពួកគ្រឹស្ដចោទថា នោះជាអំពើរបស់អ្នកចិញ្ចឹមសត្វអ៊ិស្លាមនៅភាគខាងជើងប្រទេស ។
អ្នកនាំពាក្យប៉ូលិសរដ្ឋ លោកម៉ូហាម៉េដ ឡឺរ៉ាម៉ា ថ្លែងថា សំរាប់ពេលនេះមនុស្ស២០០នាក់ត្រូវចាប់ខ្លួន ។ ពេលបញ្ចប់ការស៊ើបអង្កេតរាល់អ្នកចូលរួមក្នុងការសំលាប់រង្គាលនេះទាំងអស់នឹងត្រូវចាប់ខ្លួន។ ពួកអ្នកទាំងនោះមួយចំនួនកាន់អាវុធដោយខុសច្បាប់ ហើយមួយចំនួនទៀតបំពានលើបទឈប់បាញ់គ្នា រួចខ្លះទៀតចូលរួមក្នុងការប្រមូលផ្ដុំមនុស្សដែលត្រូវហាមឃាត់ ។
នារីជាច្រើនរយនាក់បាននាំគ្នាដើរហែក្បួនបាតុកម្មកាលពីថ្ងៃទី១១ មីនា នៅតាមវិថីនានានៃទីក្រុងចូស ដោយទាមទារឱ្យដកហូតតំណែងបណ្ដាប្រមុខកងទ័ព ហើយដោយទាមទារកយុត្ដិធម៌សំរាប់ជនរងគ្រោះ ។
អភិបាលរដ្ឋបា្លតូ លោកចូណាហ៍ ហ្សង់ បានចោទប្រកាន់កងទ័ពថា ពុំបានបញ្ចេញប្រតិកម្មចំពោះការព្រមានទាំងឡាយរបស់លោក ខណៈដែលមានសេចក្ដីរាយការណ៍ពីចលនាពួកជនប្រដាប់អាវុធ ។ សេនាធិការកងទ័ពបដិសេធថា ពុំទទួលបានព័ត៌មានទាំងឡាយក្នុងន័យនោះឡើយ ។
ការវាយប្រហារទាំងនេះប្រហែលជាធ្វើឡើងជាការសងសឹក៤ថ្ងៃក្រោយអំពើហិង្សា ដែលបណ្ដាលឱ្យមនុស្សស្លាប់ជាច្រើនរយនាក់ កាលពីខែមករាក្នុងតំបន់ទីក្រុងចូលជាតំបន់ មានពួកអ៊ិស្លាមនៃសហគមន៍គូរូ ការ៉ាម៉ា រស់នៅភាគច្រើន ។
