ខេត្តកណ្តាល ៖ ជនសង្ស័យ៣នាក់ជាប់ពាក់ព័ន្ធលួចបំពុលសត្វឆ្កែអ្នកស្រុកមួយក្បាលឱ្យងាប់ រួចដឹកតាមម៉ូតូយកទៅដើររកម៉ូយទិញនៅម្តុំផ្សារដើមគ រាជធានីភ្នំពេញ ត្រូវម្ចាស់តាមទាន់ ហើយប្តឹងប៉ូលិសប៉ុស្តិ៍ទួលស្វាយព្រៃទី២ ឱ្យចាប់ខ្លួនកាលពីវេលាម៉ោង៧និង៣០នាទីព្រឹក ថ្ងៃទី២៨ មេសា
ខេត្តកណ្តាល ៖ ជនសង្ស័យ៣នាក់ជាប់ពាក់ព័ន្ធលួចបំពុលសត្វឆ្កែអ្នកស្រុកមួយក្បាលឱ្យងាប់ រួចដឹកតាមម៉ូតូយកទៅដើររកម៉ូយទិញនៅម្តុំផ្សារដើមគ រាជធានីភ្នំពេញ ត្រូវម្ចាស់តាមទាន់ ហើយប្តឹងប៉ូលិសប៉ុស្តិ៍ទួលស្វាយព្រៃទី២ ឱ្យចាប់ខ្លួនកាលពីវេលាម៉ោង៧និង៣០នាទីព្រឹក ថ្ងៃទី២៨ មេសា។
ប៉ូលិសឱ្យដឹងថា ជនសង្ស័យក្រោយពីចាប់ខ្លួន រួចបានប្រគល់ឱ្យប៉ូលិសស្រុកស្អាង ដើម្បីសាកសួរ។ ជន៣នាក់នោះ ១-ឈ្មោះសុខ ចន្ទ្រា អាយុ១៧ឆ្នាំ, ២-ឈ្មោះអ៊ូច អុន ហៅទ្រុយ អាយុ២៣ឆ្នាំ និង៣-ឈ្មោះចក់ រដ្ឋា ហៅម៉ក់ អាយុ១៩ឆ្នាំ។ អ្នកទាំង៣រស់នៅភូមិពោធិ៍កាប៉ាង ឃុំស្វាយប្រទាល ស្រុកស្អាង ជាកសិករ ចំណែកម្ចាស់ឆ្កែឈ្មោះទ្រី កំសត់ ភេទប្រុស អាយុ២៣ឆ្នាំ រស់នៅភូមិជាមួយគ្នា។
ពេលចាប់ខ្លួនជនសង្ស័យ ប៉ូលិសបានដកហូតវត្ថុតាងខ្មោចឆ្កែឈ្មោលមួយក្បាល សម្បុរត្នោត និងម៉ូតូ១គ្រឿង ធុន C125 ស៊េរីឆ្នាំ២០០៤ ពណ៌ខ្មៅ ពាក់ស្លាកលេខភ្នំពេញ 1A-7799 ជាម៉ូតូរបស់ជនសង្ស័យ។ ប៉ូលិសឱ្យដឹងថា ជនសង្ស័យសារភាពថា នៅវេលាម៉ោង៩យប់ ថ្ងៃទី២៧ មេសា ឈ្មោះសុខ ចន្ទ្រា បានយកសាច់ជ្រូកអាំងលាយជាមួយថ្នាំបំពុលសត្វកណ្តុរ ដាក់បំពុលឆ្កែនៅខាងមុខផ្ទះឈ្មោះទ្រី កំសត់ នៅពេលម្ចាស់ផ្ទះដេកលក់។ លុះក្រោយមកមានឆ្កែមួយក្បាលងាប់ បន្ទាប់ពីស៊ីចំណីពុលនោះ ហើយសុខ ចន្ទ្រា បបួលបក្សពួកឈ្មោះអ៊ូច អុន និងឈ្មោះចក់ រដ្ឋា យកបាវច្រកខ្មោចឆ្កែ ដឹកទៅរាជធានីភ្នំពេញ ម្តុំផ្សារដើមគ ដើម្បីរកម៉ូយទិញ។ ខណៈកំពុងរកម៉ូយទិញ ស្រាប់តែម្ចាស់ឆ្កែទៅទាន់ប្តឹងឱ្យប៉ូលិសចាប់ខ្លួនតែម្តង។
ម្ចាស់ឆ្កែឈ្មោះទ្រី កំសត់ ប្រាប់ប៉ូលិសថា នៅពេលដែលដឹងបាត់ឆ្កែ លោកជិះម៉ូតូតាមរកនៅម្តុំផ្សារដើមគ ក៏ប្រទះឃើញក្រុមជនល្មើសកំពុងដឹកខ្មោចឆ្កែរបស់លោកដើរលក់ ក៏ប្តឹងប៉ូលិសប៉ុស្តិ៍ទួលស្វាយព្រៃទី២ ឱ្យចាប់ខ្លួនតែម្តង។ ម្ចាស់ឆ្កែសំណូមពរឱ្យប៉ូលិសចាត់ការតាមនីតិវិធីច្បាប់ ថ្វីដ្បិតតែជាសត្វឆ្កែមួយក្បាលពិតមែន តែចាត់ទុកថាជាសមាជិកគ្រួសារមួយដែរ។ ម្យ៉ាងជនទាំងនោះបំពុលឆ្កែឱ្យងាប់មិនដឹងថាមានបំណងអ្វីមួយទៅលើក្រុមគ្រួសារលោកទេនៅថ្ងៃក្រោយ។ នៅរសៀលថ្ងៃទី២៩ មេសា ជនសង្ស័យទាំង៣នាក់ត្រូវបានបញ្ជូនទៅកាន់សាលាដំបូងខេត្ត ដើម្បីចាត់ការតាមនីតិវិធីច្បាប់៕
ចែករំលែកព័តមាននេះ