ខេត្តកំពត ៖ ឈើគ្រញូង២តោនដឹកតាមគោយន្តច្នៃ ត្រូវបានសមត្ថកិច្ចរដ្ឋបាលព្រៃឈើដឹកនាំដោយលោកហង្ស ភឿង ប្រធានផ្នែករដ្ឋបាលព្រៃឈើស្រុកឈូក សហការជាមួយកងរាជអាវុធហត្ថលើផ្ទៃប្រទេស និងកងរាជអាវុធហត្ថស្រុកឈូកចាប់ឃាត់ទុក ខណៈធ្វើដំណើរក្នុងគោលដៅឆ្ពោះទៅលក់នៅប្រទេសវៀតណាម ។ ការបង្ក្រាបចាប់ឈើប្រណីតនេះ ធ្វើឡើងកាលពីវេលាម៉ោង១១យប់ថ្ងៃទី៧ កញ្ញា ២០១០ នៅលើផ្លូវក្រួសក្រហមមួយស្ថិតក្នុងភូមិខ្នាចរមាស ឃុំនារាយណ៍ ស្រុកឈូក ។ ជាមួយនេះសមត្ថកិច្ចបានឃាត់ខ្លួនបុរស២នាក់ គឺម្នាក់ឈ្មោះអៀវ កេត អាយុ៤៣ឆ្នាំ ជាកម្មករលីសែងចល័ត និងម្នាក់ទៀតឈ្មោះឃុត ហឿន អាយុ៣១ឆ្នាំ ជាអ្នកបើកបរ ។
បុរសទាំង២រស់នៅភូមិព្រៃពក ឃុំដងទង់ ស្រុកដងទង់ បាននិយាយថា ឈើប្រណីតទាំងនេះមិនមែនជារបស់ពួកខ្លួននោះទេ គឺពួកខ្លួនគ្រាន់តែស៊ីឈ្នួលដឹកឱ្យគេតែប៉ុណ្ណោះ ។ តាមប្រភពព័ត៌មានបានឱ្យដឹងថា ឈើប្រណីតដែលឈ្មួញលបលួចដឹកចេញនេះគឺគេកាប់ពីភ្នំនៅក្នុងទឹកដីខេត្តកែប ហើយលាក់ទុកនៅតាមព្រៃ លុះពេលមានឱកាសល្អក៏យកឡានដើរប្រមូលដឹកចេញឆ្ពោះទៅតាមគោលដៅរបស់គេតែម្តង ។ ឈើទាំងនេះត្រូវបានយកទៅរក្សាទុកនៅទីស្នាក់ការរដ្ឋបាលព្រៃឈើអូរដងសន្ទូច ដើម្បីចាត់ការតាមផ្លូវច្បាប់ ៕
ចែករំលែកព័តមាននេះ