ទាហានអាមេរិក២នាក់បានស្លាប់ និង៩នាក់ទៀតរងរបួសនៅក្នុងការវាយប្រហារមួយនៅភាគខាងជើងអ៊ីរ៉ាក់ ។ ទាក់ទិនទៅនឹងការស្លាប់ ទាហានអាមេរិនេះ យោធាអាមេរិកនិយាយថា ទាហានទាំងនេះត្រូវបានបាញ់ប្រហារដោយខ្មាន់កាំភ្លើងដែលស្លៀកពាក់ឯកសណ្ឋានយោធាអ៊ីរ៉ាក់ នៅក្បែរតំបន់ប្រជុំជន Tuzkhormato មានចំងាយប្រមាណ២១០គីឡូម៉ែត្រ ភាគខាងជើងក្រុងបាដាដ ។
ការស្លាប់ទាហាន២នាក់នោះជាការស្លាប់ទាហានអាមេរិកលើកដំបូងចាប់តាំងពីប្រធានាធិបតី លោកបារ៉ាក់ អូបាម៉ា ប្រកាសពីការបញ្ចប់ជាផ្លូវការនូវប្រតិបត្តិការប្រយុទ្ធរបស់កងទ័ពអាមេរិក នៅអ៊ីរ៉ាក់កាលពីថ្ងៃទី៣១ សីហា មក ។
យោធាមួយរូបនិយាយថា ទាហានអាមេរិក១១នាក់ជាប់ពាក់ព័ន្ធជាមួយនឹងការបាញ់តគ្នាមួយបណ្តាលឱ្យស្លាប់២នាក់ និង៩នាក់ទៀត របួស ។
សហរដ្ឋអាមេរិកបានបញ្ចប់ប្រតិបត្តិការប្រយុទ្ធរបស់កងទ័ពខ្លួននៅអ៊ីរ៉ាក់កាលពីថ្ងៃទី៣១ សីហា កន្លងមក ប៉ុន្តែបានបន្សល់ទុកទ័ពមួយចំនួនដើម្បីជួយទ្រទ្រង់កងទ័ពអ៊ីរ៉ាក់ ។ ការវាយប្រហារលើកងទ័ពអាមេរិកនៅអ៊ីរ៉ាក់នេះ កើតឡើងកាលពីល្ងាចថ្ងៃទី៧ កញ្ញា កន្លងមក ៕
ចែករំលែកព័តមាននេះ