ដើរលក់ពន្ធផ្លូវយានយន្តក្លែងក្លាយតាមកន្លែងផ្សេងៗត្រូវសមត្ថកិច្ចចាប់ខ្លួន២នាក់
ដោយ ៖ឈិត គឹមឆុន
ថ្ងៃចន្ទ ទី៦ ខែកញ្ញា ឆ្នាំ២០១០ ម៉ោង ១១:៣៦
កោះសន្តិភាព
ជនសង្ស័យ២នាក់ត្រូវបានសមត្ថកិច្ចនគរបាលចាប់ខ្លួន
រាជធានីភ្នំពេញ ៖ ជនសង្ស័យ២នាក់ត្រូវបានសមត្ថកិច្ចនគរបាលខណ្ឌចំការមនដឹកនាំដោយលោកវរសេនីយ៍ទោអ៊ុច សុខុន អធិការនគរបាលខណ្ឌចំការមន និងលោកហ៊ាង ថារ៉េត អធិការរង ដោយមានការចូលរួមពីមន្ត្រីពន្ធដារនៃអគ្គនាយកដ្ឋានពន្ធដារបានធ្វើសន្និសីទកាសែតបង្ហាញមុខពាក់ព័ន្ធនឹងការលក់ដូរពន្ធផ្លូវយានយន្តខុសច្បាប់ ។
ជនសង្ស័យទាំង២នាក់ខាងលើនេះ ម្នាក់ឈ្មោះឆេង យីយន ភេទប្រុស អាយុ៤៧ឆ្នាំ ស្នាក់នៅផ្ទះលេខ១៥ ផ្លូវលេខ១២៣ សង្កាត់ស្ទឹងមានជ័យ ខណ្ឌមានជ័យ និងម្នាក់ទៀតឈ្មោះអ៊ឹម សុភ័ក្រ ភេទប្រុស អាយុ២៤ឆ្នាំ ស្នាក់នៅភូមិដំណាក់ធំ សង្កាត់ស្ទឹងមានជ័យ ។
លោកអ៊ឹម សុខុន អធិការនគរបាលខណ្ឌចំការមនបានឱ្យដឹងថា ការឃាត់ខ្លួនជនសង្ស័យទាំង២នាក់ខាងលើនេះ គឺដោយយោងលើពាក្យបណ្តឹងរបស់អគ្គនាយកដ្ឋានពន្ធដារក៏ដូចជាពាក្យបណ្តឹងរបស់ប្រជាពលរដ្ឋមួយចំនួនទៀតប្តឹងពីបញ្ហាធ្វើចរាចរទិញ-លក់បង្កាន់ដៃពន្ធយានយន្តក្លែងក្លាយ ។ យោងតាមការស្រាវជ្រាវរបស់សមត្ថកិច្ចនគរបាលខណ្ឌចំការមន បានឈានទៅធ្វើការឃាត់ខ្លួនជនសង្ស័យទាំង២នាក់ខាងលើ និងបានដកហូតបង្កាន់ដៃពន្ធផ្លូវយានយន្តក្លែងក្លាយច្រើនសន្លឹក ។ បច្ចុប្បន្នទាំងវត្ថុតាង និងជនសង្ស័យត្រូវកសាងសំនុំរឿងបញ្ជូនទៅតុលាការចាត់ការតាមច្បាប់៕
