ចូលលួចគាស់ទូក្នុងផ្ទះមិនបានសំរេច ប៉ូលិសចាប់វាយខ្នោះ
ដោយ ៖ អប្សរា
ថ្ងៃព្រហស្បត្ត៏ ទី៩ ខែកញ្ញា ឆ្នាំ២០១០ ម៉ោង ១៥:៣៦
កាំពី
កំលាំងប៉ូលិសស្រុកសំបូរបានឃាត់ខ្លួនជនសង្ស័យម្នាក់
ខេត្តក្រចេះ ៖ កំលាំងប៉ូលិសស្រុកសំបូរបានឃាត់ខ្លួនជនសង្ស័យម្នាក់ ខណៈពេលជនរូបនេះ កំពុងធ្វើសកម្មភាពលួចគាស់កូនទូក្នុងផ្ទះអ្នកស្រុកដើម្បីលួចលុយកាក់ និងរបស់របរ ប៉ុន្តែមិនបានសំរេចត្រូវម្ចាស់ផ្ទះទាន់ ។ ជនត្រូវចោទក្នុងករណីចោរកម្មខាងលើនេះឈ្មោះជា ព្រហស្បតិ៍ អាយុ២៩ឆ្នាំ មុខរបរមិនពិតប្រាកដ មានទីលំនៅភូមិសំបូរ ឃុំសំបូរ ។ កាលពីវេលាម៉ោង៣រសៀលថ្ងៃទី៧ កញ្ញា ជនសង្ស័យរូបនេះបានលួចចូលធ្វើសកម្មភាពគាស់ទូក្នុងផ្ទះរបស់ស្ត្រីឈ្មោះលី ផារ៉េត អាយុ៣០ឆ្នាំ មានទីលំនៅភូមិកែងប្រាសាទ ឃុំសំបូរ ស្រុកសំបូរ ។
លោកប៊ុន ឈឿន អធិការប៉ូលិសស្រុកសំបូរបានឱ្យដឹងថា កាលពីរសៀលថ្ងៃកើតហេតុ ខណៈពេលដែលម្ចាស់ផ្ទះមិននៅ ជនសង្ស័យរូបនេះប្រដាប់ដោយទួរណឺវីស កាំបិតប៉័ងតោ និង អង្រែ បានលួចចូលទៅសំងំក្នុងផ្ទះរបស់ស្ត្រីខាងលើ ហើយធ្វើសកម្មភាពគាស់កូនទូដែលមានដាក់របស់របរមានតំលៃដូចជាគ្រឿងអលង្ការ និងលុយកាក់មួយចំនួននៅក្បែរគ្រែដេកក្នុងបន្ទប់ ។ ទោះបីជាយ៉ាងណា ជនសង្សយ័រូបនេះ ធ្វើសកម្មភាពមិនបានសំរេចទេដោយគាស់កូនទូនេះមិនរបើក ហើយពេលចេញមកក្រៅបន្ទប់វិញត្រូវប្អូនស្រីម្ចាស់ផ្ទះឃើញ ក៏ប្រាប់ទៅបងស្រីជាម្ចាស់ផ្ទះ ។ ចំណែកសមត្ថកិច្ចប៉ូលិសក្រោយពីបានទទួលពាក្យបណ្តឹងភ្លាម ក៏ទៅដល់កន្លែងកើតហតុធ្វើការឃាត់ខ្លួនជនសង្ស័យរូបនេះនាំ មកកាន់អធិការដ្ឋានស្រុក ដើម្បីសួរនាំ ។
លោកអធិការបានឱ្យដឹងទៀតថា នៅពេលសមត្ថកិច្ចឃាត់ខ្លួនជនសង្ស័យរូបនេះ ក៏បានដកហូតនូវវត្ថុតាងមួយចំនួនដែលជាឧបករណ៍សំរាប់ធ្វើសកម្មភាពល្មើស ។ នៅចំពោះមុខសមត្ថកិច្ច ជនត្រូវចោទរូបនេះបានឆ្លើយថា រូប គេពិតជាបានលួចចូលទៅក្នុងផ្ទះរបស់ស្ត្រីខាងលើ ធ្វើសកម្មភាពគាស់កូនទូនេះប្រាកដមែន ប៉ុន្តែពេលនោះរូបគេស្ថិតក្នុងភាពស្រវឹងមិនដឹងខ្លួន ។ នៅល្ងាចថ្ងៃទី៨ កញ្ញា ជនសង្ស័យរូបនេះ ត្រូវបានប៉ូលិសអធិការដ្ឋានស្រុកសំបូរបញ្ជូនខ្លួនមកកាន់ស្នងការដ្ឋានខេត្ត ដើម្បីចាត់វិធានការបន្តទៅតាមផ្លូវច្បាប់ ៕
