ខេត្តកំពង់ឆ្នាំង ៖ រថយន្តក្រុងមានលួចលាក់បង្កប់ឈើគ្រញូងចំនួន៣០កំណាត់ បានត្រូវកំលាំងកងរាជអាវុធហត្ថខេត្តធ្វើការចាប់ឃាត់ និងឆែកឆេរកាលពីវេលាម៉ោង៩និង៣០នាទីព្រឹកថ្ងៃទី៣ កញ្ញា នៅចំណុចជិតស្ពានខ្សាម ស្ថិតក្នុងភូមិទី១ សង្កាត់ខ្សាម ក្រុងកំពង់ឆ្នាំង ។ លោកវរសេនីយ៍ទោទេព សារ៉ាន់ ប្រធានមន្ទីរស្រាវជ្រាវ និងយុត្តិធម៌បញ្ជាការដ្ឋានកងរាជអាវុធហត្ថខេត្ត បានឱ្យដឹងថា ក្រោយពីទទួលបានព័ត៌មានពីបណ្តាញសំងាត់ស្តីពីឈើគ្រញូងលួចលាក់បង្កប់ក្នុងរថយន្តដែលធ្វើដំណើរពីខេត្តពោធិ៍សាត់ ឆ្លងកាត់ខេត្តកំពង់ឆ្នាំងទៅភ្នំពេញនោះ លោកឧត្តមសេនីយ៍ត្រីជួន ជឿន មេបញ្ជាការកងរាជអាវុធហត្ថខេត្តបានបញ្ជាឱ្យរូបលោកដេញស្ទាក់រថយន្តខាងលើដែលពាក់ស្លាកលេខ បាត់ដំបង 3A-0220 ។
លុះដល់ម៉ោងប្រហែល៩ព្រឹក ក៏ឃើញរថយន្តដូចខាងលើមកដល់ចំណុចស្ពានស្រះអង្កាម ហើយកំលាំងប៉េអឹមរបស់លោកក៏តាមពីក្រោយរហូតមកដល់ជិតចំណុចស្ពានខ្សាម ពេលរថយន្តក្រុងនេះឈប់ដាក់មនុស្ស លោកក៏បានសុំត្រួតពិនិត្យ ដោយនាំរថយន្តក្រុងនេះមកកាន់ទីបញ្ជាការកងរាជអាវុធហត្ថ ។ ជាមួយនេះក៏បានអញ្ជើញលោកពេញ វិបុល ព្រះរាជអាជ្ញាអមសាលាដំបូងខេត្ត រួមទាំងមន្ត្រីខណ្ឌរដ្ឋបាលព្រៃឈើផង ដើម្បីធ្វើការឆែកឆេរ ហើយរកឃើញឈើគ្រញូងចំនួន៣០កំណាត់ ដែលលាក់បង្កប់ក្នុងរថយន្ត ។
ក្រោយពីការឆែកឆេរឃើញវត្ថុតាង ក៏បានឃាត់ម្ចាស់ឈើឈ្មោះសើ ប៊ុនហេង ភេទប្រុស អាយុ២៦ឆ្នាំ មានទីលំនៅក្នុងខេត្តបាត់ដំបង និងអ្នកបើកបររថយន្តឈ្មោះសៀន ឡៃ ភេទប្រុស អាយុ៣៨ឆ្នាំ មានទីលំនៅក្នុងខេត្តបាត់ដំបងដែរ ។ លោកស៊ីន កុសល នាយខណ្ឌរដ្ឋបាលព្រៃឈើកំពង់ឆ្នាំង ដែលចុះធ្វើកំណត់ហេតុដកហូតកំណាត់ឈើនេះបាននិយាយថា ម្ចាស់ឈើនិងអ្នកបើកបរ ព្រមទាំងវត្ថុតាងត្រូវបានបញ្ជូនទៅតុលាការចាត់ការតាមនីតិវិធីច្បាប់ ៕
ចែករំលែកព័តមាននេះ