ថ្នាំផ្សះជាប្រភេទថ្នាំសម្លាប់មេរោគ ប៉ុន្តែថ្នាំប្រភេទនេះមិនមានប្រសិទ្ធភាពកម្ចាត់មេរោគដទៃទៀតដូចជា មេរោគដែលបង្កឲ្យមានជំងឺគ្រុនក្តៅ ឬផ្តាសាយនោះទេ ដូច្នេះទើបក្រសួងសុខាភិបាលប្រកាសមិនឲ្យប្រើប្រាស់ថ្នាំផ្សះក្នុងករណីមិនចាំបាច់ ។
ការប្រើប្រាស់ថ្នាំផ្សះចំពោះជំងឺគ្រុនក្តៅ-ផ្តាសាយ មិនអាចជួយអ្នកឲ្យជាសះស្បើយបានទេ ហើយថែមទាំងធ្វើឲ្យអ្នកមានអារម្មណ៍ឈឺកាន់តែធ្ងន់។ បើសិនជាអ្នកនៅតែប្រើថ្នាំផ្សះក្នុងករណីមិនចាំបាច់ បាក់តេរីអាចសុំានឹងថ្នាំផ្សះ បើបាក់តេរីសុំានឹងថ្នាំផ្សះ អាចធ្វើឲ្យអ្នកកាន់តែឈឺយូរ ឬអាចសម្លាប់អ្នកបាន ។ ដូច្នេះនៅពេលអ្នកចាប់ឈឺនៅចន្លោះពី១ថ្ងៃទៅ៣ថ្ងៃគប្បីអនុវត្តតាមវិធីសាស្ត្រ ៖
-កុំប្រើប្រាស់ថ្នាំផ្សះ
-ទទួលទានទឹកនិងផ្លែឈើឲ្យបានច្រើន
-សម្រាកឲ្យបានគ្រប់គ្រាន់
-ទទួលទានអាហារដែលផ្តល់នូវសុខភាព
នៅពេលដែលអ្នកអនុវត្តតាមវិធីខាងលើនេះបានល្អហើយ អ្នកអាចនឹងទទួលបានអារម្មណ៍ថាប្រសើរជាងមុន បើទោះមិនជាសះស្បើយ១០០ភាគរយក៏ដោយ ។
ប្រសិនបើអ្នកឈឺនៅចន្លោះពី៤ទៅ៦ថ្ងៃ លោកអ្នកត្រូវតែបន្តការទទួលទានទឹក និងផ្លែឈើឲ្យបានច្រើននោះ យ៉ាងយូររយៈពេល៧ថ្ងៃ អ្នកអាចនឹងជាសះស្បើយពីជំងឺគ្រុនក្តៅ ឬផ្តាសាយ១០០ភាគរយ ។
គួរចងចាំថា នៅពេលលោកអ្នកជួបករណីខាងលើ ប្រការដែលត្រូវចៀសវាង៖
-សូមកុំទិញថ្នាំផ្សះដោយគ្មានវេជ្ជបញ្ជា
-កុំប្រើថ្នាំផ្សះតាមវេជ្ជបញ្ជាពីមុន
-កុំប្រើថ្នាំផ្សះសម្រាប់ជំងឺគ្រុនក្តៅឬផ្តាសាយ
-មានតែគ្រូពេទ្យឬវេជ្ជបណ្ឌិតប៉ុណ្ណោះ ដែលចេញវេជ្ជបញ្ជាឲ្យប្រើថ្នាំផ្សះ ៕
ចែករំលែកព័តមាននេះ