ទាហានអង់គ្លេស៣នាក់ត្រូវទាហានអាហ្វហ្គានីស្ថានម្នាក់សម្លាប់
ដោយ ៖ ប្រុសកោះ
ថ្ងៃពុធ ទី១៤ ខែកក្កដា ឆ្នាំ២០១០ ម៉ោង ១៥:៥១
គេហទំព័របរទេស
កងទាហានអង់គ្លេសកំពុងធ្វើប្រតិបត្តិការនៅអាហ្វាហ្គានីស្ថាន
រដ្ឋាភិបាលអង់គ្លេសអះអាងកាលពីថ្ងៃទី១៣ កក្កដា ពីការស្លាប់ទាហានរបស់ខ្លួន៣នាក់នៅភាគខាងត្បូងអាហ្វហ្គានីស្ថាន ដោយសារការក្បត់របស់ទាហានអាហ្វហ្គានីស្ថានម្នាក់ដែលបាញ់ប្រហារលើពួកគេពេលមានការវាយប្រហារគ្រោងទុកជាមុនមួយលើកងកំលាំងរបស់អូតង់ក្នុងប្រទេសនេះ ។ សេចក្ដីប្រកាសមួយរបស់ក្រសួងការពារប្រទេសអង់គ្លេសនិយាយថា ទាហានអង់គ្លេស៣នាក់ ត្រូវស្លាប់នាព្រឹកថ្ងៃទី១៣ កក្កដា នៅ NAHR-E-SARAJ ខេត្ដហែលម៉ង់ ។ យើងគិតថា នេះជាអំពើរបស់បុគ្គលតែម្នាក់ ដែលក្បត់ចំពោះកងកំលាំងចំរុះបរទេស និងកងទ័ពអាហ្វហ្គានីស្ថានក្នុងការវាយប្រហារដោយគ្រោងទុកជាមុនមួយ ។ អំពើទាំងនេះនឹងពុំអាចពង្វាងបេសកម្មរបស់យើង ហើយយើងនឹងបន្ដធ្វើការយ៉ាងជិតស្និទ្ធជាមួយបណ្ដាមិត្ដអាហ្វហ្គានីស្ថានដើម្បីធានាសន្ដិសុខក្នុងខេត្ដហែលម៉ង់ ។ ការស្លាប់ទាហានអង់គ្លេស៣នាក់នេះទៀត ធ្វើឱ្យចំនួនទាហានអង់គ្លេសដែលស្លាប់នៅអាហ្វហ្គានីស្ថាន តាំងពីចាប់ផ្ដើមធ្វើអន្ដរាគមន៍នៅទីនោះពីឆ្នាំ២០០១មកឡើងដល់ ៣១៧នាក់ហើយ ៕
