សម្តេចតេជោ ហ៊ុន សែន ប្រកាសលុបចោលប័ណ្ណបើកបរម៉ូតូកម្លាំងចាប់ពី 125 CC ចុះក្រោម
រាជធានីភ្នំពេញ ៖ សម្តេចតេជោ ហ៊ុន សែន បានប្រកាសសម្រេចលុបចោលទាំងស្រុងប័ណ្ណបើកបរម៉ូតូដែលមានកម្លាំងចាប់ពី 125CC ចុះក្រោម…
រាជធានីភ្នំពេញ ៖ សម្តេចតេជោ ហ៊ុន សែន បានប្រកាសសម្រេចលុបចោលទាំងស្រុងប័ណ្ណបើកបរម៉ូតូដែលមានកម្លាំងចាប់ពី 125CC ចុះក្រោម ប៉ុន្តែសម្តេចបានសូមឲ្យប្រជាពលរដ្ឋត្រូវតែរៀនច្បាប់ចរាចរណ៍ និងបើកបរត្រូវតែគោរពច្បាប់ចរាចរណ៍គ្រប់ៗគ្នា ។ នេះបើយោងតាមបណ្តាញទំនាក់ទំនងសង្គម (Facebok) ផ្លូវការរបស់សម្តេចតេជោ ហ៊ុន សែន កាលពីប៉ុន្មាននាទីមុននេះ ។
សម្តេចអគ្គមហាសេនាបតីតេជោ ហ៊ុន សែន បានសរសេរនៅលើបណ្តាញទំនាក់ទំនងសង្គម (Facebok) ផ្លូវការរបស់សម្តេចបង្ហោះនៅប៉ុន្មាននាទីមុននេះមានខ្លឹមសារទាំងស្រុងថា ៖
« ជនរួមជាតិជាទីគោរពស្រឡាញ់ !
ក្រោយពីបានតាមដានស្តាប់នូវមតិយោបល់ សំណូមពរ និងសំណើរបស់បងប្អូនជនរួមជាតិ ជាពិសេស យុវជន និងសិស្សានុសិស្សទាក់ទងនិងតម្លៃនៃការធ្វើប័ណ្ណបើកបរម៉ូតូ ហើយក្រោយពីខ្ញុំបានពិភាក្សាជាមួយ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ និងរដ្ឋមន្ត្រីក្រសួងសាធារណការនិងដឹកជញ្ជូន គឺខ្ញុំបានសម្រេចបញ្ឈប់អោយបង់ថ្លៃទាំងស្រុងក្នុងការធ្វើប័ណ្ណបើកបរចំពោះម៉ូតូចាប់ពីកម្លាំង 125 CC ចុះក្រោម ចាប់ពីពេលនេះតទៅ ។ ដូច្នេះប្រជាពលរដ្ឋដែលបើកបរម៉ូតូមានកម្លាំងចាប់ពី 125 CC ចុះក្រោម គឺមិនចាំបាច់បង់លុយថ្លៃធ្វើប័ណ្ណបើកបរ និងមិនចាំបាច់មានប័ណ្ណបើកបរឡើយ ។ ប៉ុន្តែទន្ទឹមនឹងនេះ គឺសូមប្រជាពលរដ្ឋត្រូវតែរៀនច្បាប់ចរាចរណ៍ និងបើកបរត្រូវតែគោរពច្បាប់គ្រប់ៗគ្នា។ ខ្ញុំនឹងស្នើទៅអង្គការនីតិបញ្ញត្តិដើម្បីធ្វើវិសោធនកម្មលើបទបញ្ញត្តិច្បាប់ដែលមានការពាក់ព័ន្ឋក្នុងពេលឆាប់ៗខាងមុខនេះ។
ខ្ញុំសង្ឃឹមថា នេះគឺជាការចូលរួមកាត់បន្ថយនូវការចំណាយ និងការលំបាកទាំងឡាយរបស់ប្រជាពលរដ្ឋទូទាំងប្រទេស ។
នេះគឺជាកាដូមួយថែមទៀតដល់បងប្អូនជនរួមជាតិទាំងអស់នៅក្នុងខួប ៧ មករា ២០១៦ នេះ ! »
ចែករំលែកព័តមាននេះ