រាជធានីភ្នំពេញ ៖ គូស្នេហ៍កំលោះក្រមុំមួយគូ បន្ទាប់ពីដាក់ចិត្តដាក់កាយមិនស្តាយស្រណោះរឿងរ៉ាវដែលកើតមានពីអតីតកាលឡើយ ផ្តួចផ្តើមស្នេហ៍ដោយទឹកចិត្តស្មោះស្ម័គ្រទាំងសងខាង គ្មានអ្នកណាបង្ខំអ្នកណា
រាជធានីភ្នំពេញ ៖ គូស្នេហ៍កំលោះក្រមុំមួយគូ បន្ទាប់ពីដាក់ចិត្តដាក់កាយមិនស្តាយស្រណោះរឿងរ៉ាវដែលកើតមានពីអតីតកាលឡើយ ផ្តួចផ្តើមស្នេហ៍ដោយទឹកចិត្តស្មោះស្ម័គ្រទាំងសងខាង គ្មានអ្នកណាបង្ខំអ្នកណា ទោះបីជាមានឧបសគ្គពីចាស់ទុំសងខាងមិនពេញចិត្ត តែជម្រើសបុគ្គលសងខាងប្តូរផ្តាច់ជម្នះឧបសគ្គទាំងនោះ ក្នុងភាពក្លាហានដោយដឹកដៃនាំគ្នាចូលទៅលុនតួសុំការអន្តរាគមន៍ពីអាជ្ញាធរសង្កាត់ចោមចៅ ខណ្ឌពោធិ៍សែនជ័យ កាលពីវេលាម៉ោង៣និង៣០នាទីរសៀលថ្ងៃទី៤ ខែមករា ឆ្នាំ២០១៦ ។
ភាគីខាងស្រីឈ្មោះ ទី សុខណែត អាយុ១៩ឆ្នាំ ជាបុគ្គលិកក្រុមហ៊ុនស្នាក់នៅផ្ទះជួលក្នុងសង្កាត់ចោមចៅ ខណ្ឌពោធិ៍សែនជ័យ មានស្រុកកំណើតខេត្តបន្ទាយមានជ័យ ។ចំណែកភាគីខាងប្រុសឈ្មោះ លឹម រតន: អាយុ២១ឆ្នាំ រស់នៅក្នុងសង្កាត់ចោមចៅ ខណ្ឌពោធិ៍សែនជ័យ ដូចគ្នា ។
តាមការបំភ្លឺពីភាគីសាមីខ្លួនកំលោះក្រមុំបានឱ្យដឹងថា ពួកគេទាំង២នាក់ពុំមានភាគីខាងណាបង្ខំចិត្តនោះទេ គឺពិតជាស្រឡាញ់គ្នាដោយស្មោះស្ម័គ្រអស់ពីដួងចិត្ត កន្លងមក រឿងរ៉ាវស្នេហារបស់ពួកគាត់ទាំង២នាក់លេចឮដល់ឪពុកម្តាយសងខាងដូចគ្នា ហើយចាស់ទុំទាំងសងខាងជំទាស់មិនចង់ឱ្យបានគ្នាជាគូអនាគតឡើយ ។ តែដោយសារអំណាចភ្លើងស្នេហ៍មិនអាចកែប្រែបាននោះធ្វើឱ្យពួកគាត់ទាំង២នាក់ស្រឡាញ់គ្នាដោយស្មោះស គ្មានការបង្ខិតបង្ខំ ហើយតាំងចិត្តថា ទោះជា អាក្រក់ ល្អ សឬខ្មៅ យ៉ាងណាក្តី ក៏ពួកគេទាំង២នាក់សុខចិត្តរស់នៅជាមួយគ្នាជាប្តីប្រពន្ធស្រឡាញ់គ្នារហូតដល់ចាស់ព្រឹទ្ធចាស់ព្រេង ។
ក្នុងទឹកមុខក្លាហាន និងស្វាហាប់ បណ្តាលឱ្យគូស្នេហ៍មួយគូខាងលើនេះ បានធ្វើសច្ចាជម្នះគ្រប់ឧបសគ្គ គ្មានអ្នកណាបំបែកបំបាក់ស្នេហារបស់ពួកគេបានឡើយ
ទោះបីជាទទួលរងសម្ពាធពីឪពុកម្តាយទាំងសងខាងយ៉ាងណាក៏ដោយ ក៏ពួកគេមិនខ្លាចនឹងប្រឈមមុខឡើយ ទាំងនេះជាជម្រើសរបស់សាមីបុគ្គល ។
ដើម្បីកុំឱ្យកើតក្តីហ្មងសៅ គូស្នេហ៍មួយគូនេះក៏សម្រេចនាំគ្នាទៅសំពះលុនតួនៅមុខអាជ្ញាធរសង្កាត់ចោមចៅ និងសច្ចាប្រកាន់ជំហររៀងៗខ្លួនថា ស៊ូស្លាប់រស់ជាមួយគ្នាអស់មួយជីវិត សូមឱ្យអាជ្ញាធរទទួលស្គាល់តាមផ្លូវច្បាប់ផង ។
បន្ទាប់ពីទទួលការប្រៀនប្រដៅអប់រំទាំងផ្លូវច្បាប់ ទាំងផ្លូវចិត្ត ពីសំណាក់លោកចៅសង្កាត់រួចមក ទាំង២នាក់ក៏វិលត្រឡប់ទៅវិញទាំងទឹកមុខស្រស់ស្រាយនិងក្លាហាន តែមិនបានចុះអេតាស៊ីវិលទេ បានត្រឹមតែធ្វើលិខិតធានាអះអាងដោយមានការដឹងឮពីលោកចៅសង្កាត់ និងអុជធូបស្បថស្បែនៅក្នុងសាលាសង្កាត់តែប៉ុណ្ណោះ ៕
ចែករំលែកព័តមាននេះ