រាជធានីភ្នំពេញ ៖ ជនបរទេសពីរនាក់ត្រូវជនសង្ស័យ៣នាក់ ធ្វើសកម្មភាពយកកាំបិតភ្ជង់ប្លន់យកលុយអស់៥០០ដុល្លារ និងទូរស័ព្ទដៃមួយគ្រឿងបានសម្រេចនៅតាមបណ្តោយវិថីផ្សារកណ្តាលទី១ ខណ្ឌដូនពេញ កាលពីវេលាម៉ោង០៤ និង៣០នាទីទៀបភ្លឺ ថ្ងៃទី២៩ ធ្នូ ២០១៥ ហើយជនសង្ស័យនាំគ្នាជិះម៉ូតូគេចខ្លួនដោយសុវត្ថិភាព។
តាមប្រភពព័ត៌មានពីសន្តិសុខដែលយាមនៅមុខធានាគារមួយ បានឱ្យសមត្ថកិច្ចមូលដ្ឋានដឹងថា មុនពេលកើតហេតុគេបានឃើញជនបរទេស២នាក់ដើរតាមបណ្តោយវិថីព្រះស៊ីសុវត្ថិរហូតដល់ចំណុចកើតហេតុមុខធានាគារ ស្ថិតក្នុងសង្កាត់ផ្សារកណ្តាលទី១ ស្រាប់តែមានជនសង្ស័យម្នាក់ជិះម៉ូតូវីវ៉ា ពណ៌ខ្មៅមិនចាំស្លាកលេខមកឈប់ម៉ូតូ ហើយធ្វើជាសុំបារីជនបរទេស ពេលនោះជនសង្ស័យក៏បានទូរស័ព្ទហៅបក្ខពួក២នាក់ទៀតមក ។
មួយសន្ទុះក្រោយមក ជនសង្ស័យ២នាក់ទៀតបានមកដល់ក៏ធ្វើសកម្មភាពយកកាំបិតភ្ជង់គំរាមប្លន់យកលុយចំនួន៥០០ដុល្លារ និងទូរស័ព្ទដៃមួយគ្រឿង រួមទាំងលិខិតឆ្លងដែនមួយផងដែរ ហើយជិះម៉ូតូគេចខ្លួនដោយសុវត្ថិភាព ។
ក្រោយពេលកើតហេតុជនរងគ្រោះទាំង២នាក់បាននាំគ្នាទៅដាក់ពាក្យបណ្តឹងនៅនគរបាលប៉ុស្តិ៍រដ្ឋបាលផ្សារកណ្តាល១ដើម្បីស្រាវជ្រាវតាមចាប់ជនសង្ស័យយកមកផ្តន្ទាទោសតាមច្បាប់ ៕
ចែករំលែកព័តមាននេះ