រាជធានីភ្នំពេញ ៖ កម្លាំងចម្រុះ នៃគណៈបញ្ជាការឯកភាពរដ្ឋបាលខណ្ឌមានជ័យ កាលពីយប់ថ្ងៃទី ២៨ ខែតុលា ឆ្នាំ២០២៦ បានបើកប្រតិបត្តិការចុះរដ្ឋបាលឆែកឆេរផ្ទះជួលចំនួន ៤ទីតាំង ស្ថិតតាមបណ្តោយផ្លូវបេតុង ប្រឡាយលូស្ទឹងមានជ័យ សង្កាត់ស្ទឹងមានជ័យទី១ ខណ្ឌ មានជ័យ ដោយបានឃាត់ខ្លួនមនុស្សប្រុសស្រី ចំនួន១៧នាក់ ពាក់ព័ន្ធនឹងបទល្មើសល្បែងស៊ីសងអនឡាញ (ជុកកឺ Joker) ។
ប្រភពព័ត៌មានពីប្រជាពលរដ្ឋរស់នៅជិតខាងបានឱ្យដឹងថា ទីតាំងផ្ទះជួល ទាំងនោះមានភាពមិនប្រក្រតី និងមានមនុស្សចេញចូលប្លែកៗ ជាប្រចាំ ទាំងយប់ទាំងថ្ងៃ ដែលបង្កការសង្ស័យ និងក្តីបារម្ភពីសុវត្ថិភាពក្នុងមូលដ្ឋាន និងដោយមិនអាចអត់ទ្រាំ នឹងសកម្មភាពលួចលាក់ បើកល្បែងស៊ីសងអនឡាញនេះបាន អ្នកជិតខាងក៏បានរាយការណ៍ជូនអាជ្ញាធរមូលដ្ឋាន ដើម្បីឱ្យចុះពិនិត្យ និងមានវិធានការបង្ក្រាប ។
កម្លាំងសមត្ថកិច្ចចម្រុះបានចុះទៅដល់ទីតាំងកើតហេតុ និងធ្វើការឆែកឆេររហូតឈានទៅដល់ការឃាត់ខ្លួនមនុស្សសរុប១៧នាក់ (ក្នុងនោះ មាន ស្ត្រី៥នាក់) ព្រមទាំងដកហូតវត្ថុតាង មួយចំនួន ដែលពាក់ព័ន្ធនឹងហ្គេមអនឡាញ ។
ក្រោយបញ្ចប់ប្រតិបត្តិការ ជនសង្ស័យទាំង១៧នាក់ ត្រូវបានសមត្ថកិច្ចបញ្ជូនខ្លួនទៅកាន់អធិការដ្ឋាននគរបាលខណ្ឌមានជ័យ ដើម្បីធ្វើការសាកសួរ និងកសាងសំណុំរឿងចាត់ការតាម នីតិវិធីច្បាប់បន្ត ៕
ចែករំលែកព័តមាននេះ