រាជធានីភ្នំពេញ ៖ ទីតាំងអាជីវកម្មបារ និងកម្សាន្តរាត្រី ចំនួន២កន្លែងជាប់គ្នា ត្រូវបានកម្លាំងសមត្ថកិច្ចជំនាញចុះបង្ក្រាប និងផ្អាកសកម្មភាពភ្លាមៗ បន្ទាប់ពីផ្លាស់ប្តូរប្រតិបត្តិការស្រាវជ្រាវឈានទៅរកការបំបែកសំណុំរឿងសង្ស័យលួចបង្កប់សេវាផ្លូវភេទ និងមានការប្រើប្រាស់កម្លាំងពលកម្មអនីតិជន ។
ប្រតិបត្តិការនេះ ដឹកនាំដោយកម្លាំងនាយកដ្ឋានប្រឆាំងការជួញដូរមនុស្ស និងការពារអនីតិជន នៃអគ្គស្នងការដ្ឋាននគរបាលជាតិ កាលពីវេលាម៉ោង ១០:៣០នាទីយប់ ថ្ងៃទី៣០ ខែតុលា ឆ្នាំ២០២៦ ដោយបានបិទខ្ទប់ទីតាំងបារយីហោ «ឡេម៉ឹន (Lemon)» និង «អូអេស៊ីស ១៣៦ (OASIS 136)» ដែលមានទីតាំងស្ថិតនៅតាមបណ្តោយផ្លូវលេខ ១៣៦ សង្កាត់ផ្សារកណ្តាលទី១ ខណ្ឌដូនពេញ រាជធានីភ្នំពេញ ។
ប្រភពពីសមត្ថកិច្ចបានឱ្យដឹងថា ប្រតិបត្តិការនេះមិនមែនជាការចុះពិនិត្យចៃដន្យនោះឡើយ ពោលគឺកម្លាំងជំនាញបានចំណាយពេលស៊ើបអង្កេត និងតាមដានមុខសញ្ញាយ៉ាងយកចិត្តទុកដាក់អស់មួយរយៈពេលធំ។ ផ្អែកលើតម្រុយ និងភស្តុតាងច្បាស់លាស់ បង្ហាញថា ទីតាំងទាំងពីរខាងលើបានលួចលាក់ផ្តល់សេវាកម្មផ្លូវភេទ ដោយមានការកៀរគរ និងប្រមូលផ្តុំក្មេងស្រីមិនទាន់គ្រប់អាយុ (អនីតិជន) ឱ្យមកធ្វើការបម្រើភ្ញៀវក្នុងហាង ។
នៅក្នុងការចុះឆ្មក់ភ្លាមៗនោះ កម្លាំងសមត្ថកិច្ចបានឃាត់ខ្លួនមនុស្សជាច្រើននាក់ដែលស្ថិតនៅក្នុងទីតាំង រួមមាន៖ អ្នកគ្រប់គ្រងហាង, បុគ្គលិកបម្រើការងារប្រុស-ស្រី (ក្នុងនោះមានក្មេងស្រី ដែលសង្ស័យជាអនីតិជន) ព្រមទាំងភ្ញៀវដែលកំពុងចូលកម្សាន្ត ។
ជាលទ្ធផលចុងក្រោយ ទីតាំងបារ «Lemon» និង «OASIS 136» ត្រូវបានសមត្ថកិច្ចសម្រេចផ្អាក និងបិទទ្វារជាបណ្តោះអាសន្ន។ ដោយឡែក អ្នកគ្រប់គ្រងហាង និងបុគ្គលិកពាក់ព័ន្ធ ត្រូវ បានសមត្ថកិច្ចជំនាញកសាងសំណុំរឿង បញ្ជូនខ្លួនទៅកាន់សាលាដំបូងរាជធានីភ្នំពេញ ដើម្បីចាត់ការ និងផ្តន្ទាទោសតាមនីតិវិធីច្បាប់ជាធរមាន ៕
ចែករំលែកព័តមាននេះ