ខេត្តព្រៃវែង ៖ ខណៈដែលមនុស្សគ្រប់គ្នាកំពុងតែសប្បាយរីករាយស្វាគមន៍ថ្ងៃបុណ្យណូអែលនោះ ស្ថិតនៅចំកណ្តាលស្ពានហ្សឹបាសា ឬស្ពានអ្នកលឿង មានមនុស្សចំនួន២ក្រុមដែលម្ខាងៗមានគ្នាជិត២០នាក់សុទ្ធតែស្រវឹង បានបើកឆាកវាយកាប់ចាក់គ្នាយ៉ាងអង់អាចក្លាហាន ហាក់គ្មានខ្លាចឈឺសាច់អ្វីបន្តិចសោះ ប៉ុន្តែសកម្មភាពនេះត្រូវបានបញ្ចប់ទៅវិញក្នុងរយៈពេលជាង៥នាទី បន្ទាប់ពីភាគីដែលចាញ់នាំគ្នារត់ឡើងរថយន្តបើកចេញទៅ ហើយបុរសម្នាក់ត្រូវបានគេចាក់ស្លាប់នៅនឹងកន្លែង ។
ហេតុការណ៍នេះ បង្កភ្ញាក់ផ្អើលកាលពីវេលាម៉ោង១០យប់ថ្ងៃទី២៥ ធ្នូ ២០១៥ នៅចំណុចខណ្ឌចែកទឹកដីនៃខេត្តព្រៃវែង និងខេត្តកណ្តាល ។
ប្រភពបានឱ្យដឹងថា ជនរងគ្រោះដែលស្លាប់ត្រូវគេស្គាល់ឈ្មោះឡូត អាយុ៣២ឆ្នាំ មានទីលំនៅក្នុងភូមិលេខ៧ សង្កាត់កំពង់លាវ ក្រុងព្រៃវែង ។
សមត្ថកិច្ចឱ្យដឹងថា ភាគីខាងជនរងគ្រោះមានគ្នាចំនួន១០នាក់ គឺជាចុងភៅដែលមកធ្វើម្ហូបត្រៀម សំរាប់ពិធីឡើងផ្ទះរបស់លោកសេង សុភ័ក្ត្រ ស្នងការរងខេត្តព្រៃវែង នៅឯភូមិព្រែកខ្សាយ ឃុំព្រែកខ្សាយ (ក) ស្រុកពាមរក៍ ខេត្តព្រៃវែង ។ ដោយមុនពេលកើតហេតុនោះ ជនរងគ្រោះ និងបក្សពួកបាននាំគ្នាផឹកស៊ីនៅផ្ទះរបស់លោកស្នងការរង ពេលស្រវឹងហើយ ក៏នាំគ្នាឡើងជិះរថយន្តកូរ៉េ សម្រាប់ដឹកគ្រឿងចុងភៅឡើងទៅលេងនៅលើស្ពាន រួចក៏បន្តឆ្លងទៅលេងនៅចំណុចរង្វង់មូលគង់ស្ពានត្រើយខាងលិចទៀត ដែលស្ថិតក្នុងឃុំកំពង់ភ្នំ ស្រុកលើកដែក ខេត្តកណ្តាល ។ ប៉ុន្តែពេលទៅដល់ ក៏មានទំនាស់ពាក្យសម្តីជាមួយភាគីម្ខាងទៀតមានគ្នា៧-៨នាក់ ដែលកំពុងផឹកស៊ីនៅទីនោះដែរ ទើបកើតទៅជាជម្លោះ ហើយក៏ណាត់គ្នាមកវាយនៅលើស្ពានតែម្តង ។
ប៉ុន្តែប្រភពពីខាងជនរងគ្រោះវិញអះអាងថា ពេលដែលមានទំនាស់ពាក្យសម្តីគ្នាហើយ ពួកគេក៏នាំគ្នាឡើងរថយន្តជិះមកឈប់លេងនៅលើស្ពានក្នុងដីខេត្តកណ្តាលដដែល ប៉ុន្តែមួយសន្ទុះក្រោយមក ក៏ស្រាប់តែឃើញភាគីជនបង្កជិះម៉ូតូ២គ្រឿង តាមទៅដល់មានគ្នា៥-៦នាក់ ដោយមានទាំងដាវសាមូរ៉ៃ, កាំបិត និងបំពង់ទីបគ្រប់ដៃផង និងបានធ្វើសកម្មភាពវាយប្រហារមកលើពួកគេ ទើបពួកគេវាយតដៃទៅវិញ ។ ប៉ុន្តែដោយសារតែគ្មានអាវុធក្នុងដៃវាយមិនឈ្នះគេ ទើបនាំគ្នារត់ឡើងរថយន្តជិះរត់គេចពីការវាយប្រហាររបស់ភាគីបង្ក ។ ចំណែកឯជនរងគ្រោះឈ្មោះ ឡូត ដោយសារតែរត់ឡើងរថយន្តមិនទាន់ ក៏ត្រូវគេព្រួតវាយ និងចាក់រហូតដល់ស្លាប់តែម្តងទៅ ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ