នាង NATACHA KAMPUSCH ជាយុវនារីអូទ្រីសម្នាក់ដែលត្រូវគេចាប់ពង្រត់ហើយបង្ខាំងទុករយៈពេល៨ឆ្នាំ គឺ៣០៩៦ថ្ងៃធ្វើជាទាសករក្នុងផ្ទះតូចមួយស្ថិតនៅជាយទីក្រុងវីយែនមុនពេលរត់គេចខ្លួនរួចពីកណ្តាប់ដៃជនចាប់ពង្រត់បានចេញផ្សាយនាសបា្តហ៍នេះនូវសៀវភៅជាភាសាអូទ្រីសរៀបរាប់រឿងរ៉ាវរបស់នាង រយៈពេល៣០៩៦ថ្ងៃ និងរៀបរាប់ពីទុក្ខវេទនារបស់នាង ។ នាង NATASCHA KAMPUSCH មានអាយុ១០ឆ្នាំ ពេលត្រូវចាប់ពង្រត់នៅតាមផ្លូវទៅសាលារៀនក្នុងទីក្រុងវីយែនកាលពីថ្ងៃទី២ មីនា ឆ្នាំ១៩៩៨ដោយបុរសម្នាក់ឈ្មោះ WOLFG-ANG PRIKLOPIL ដែលឃុំឃាំងនាងទុកជាទាសករក្នុងផ្ទះតូចមួយរបស់គេស្ថិតនៅជាយក្រុង។ ថ្ងៃទី២៣ សីហា ឆ្នាំ២០០៦ យុវនារីរូបនេះអាចរត់គេចខ្លួនរួច ។ អ្នកចាប់បង្ខាំងនាងទុកជាជាងអគ្គិសនី អាយុ៤៤ឆ្នាំម្នាក់បានធ្វើអត្តឃាតប៉ុន្មានម៉ោងក្រោយនាងរត់រួច ដោយលោតចូលកង់រទេះភ្លើង ។
យុវនារីរូបនេះដែលបច្ចុប្បន្នមានអាយុ២២ឆ្នាំ បានរៀបរាប់ក្នុងសៀវភៅរបស់នាងសរសេរដោយសារជំនួយរបស់អ្នកកាសែត២នាក់រៀបរាប់ពីអំពើហិង្សាលើរូបរាងកាយនាង និងអំពើហិង្សាខាងផ្លូវចិត្តប្រព្រឹត្តមកលើនាងដោយបុរសឈ្មោះ PRIKLOPIL ។ បុរសនោះវាយធ្វើបាបនាងជាញឹកញាប់ បង្ខំនាងឱ្យរៀបចំបាយទឹកដោយឱ្យនាងដោះសំលៀកបំពាក់ចេញពាក់កណ្តាល រំលោភរួមភេទហើយចាប់នាងកោរសក់ ។ នាងបន្តថា បុរសនេះសាហាវព្រៃផ្សៃគ្មានអ្វីប្រដូច ។ បុរសនោះវាយធ្វើបាននាងឱ្យនាងរស់នៅខាងក្រោមដី ហើយជននេះក៏ប្រលោមនាងដែរ ដោយប្រើវិធីសាស្ត្រនានាឱ្យនាងស្ថិតក្នុងសភាពចំណុះខាងផ្លូវចិត្តលើរូបគេ។
សៀវភៅនេះដែលមានចំណងជើងថា «៣០៩៦ថ្ងៃនៃការចាប់ខ្លួន» ត្រូវដាក់លក់ចាប់ពីថ្ងៃទី៧ កញ្ញា ទៅក្នុងហាងលក់សៀវភៅទាំងឡាយនៃប្រទេសអូទ្រីស មុនពេលបង្ហាញជាផ្លូវការនាថ្ងៃទី៩ កញ្ញា នៅទីក្រុងវិយែន និងការចេញផ្សាយជាភាសាអង់គ្លេស ៕
ចែករំលែកព័តមាននេះ