រាជធានីភ្នំពេញ ៖ រយៈពេលប៉ុន្មានសប្តាហ៍កន្លងមកនេះបន្ទាប់ពីក្រសួងមហាផ្ទៃបានប្រកាសច្បាប់ចរាចរណ៍ថ្មីនឹងត្រូវចាប់ផ្តើមអនុវត្តនៅថ្ងៃទី១ ខែមករា ឆ្នាំ២០១៦ខាងមុខនេះ…
រាជធានីភ្នំពេញ ៖ រយៈពេលប៉ុន្មានសប្តាហ៍កន្លងមកនេះបន្ទាប់ពីក្រសួងមហាផ្ទៃបានប្រកាសច្បាប់ចរាចរណ៍ថ្មីនឹងត្រូវចាប់ផ្តើមអនុវត្តនៅថ្ងៃទី១ ខែមករា ឆ្នាំ២០១៦ខាងមុខនេះ ប្រជាពលរដ្ឋបាននាំគ្នាសម្រុកទៅប្រលងយកប័ណ្ណបើកបរយានយន្តគ្រប់ប្រភេទយ៉ាងច្រើនកុះករខុសប្លែកពីធម្មតា ជាពិសេសចាប់ពីថ្ងៃទី១ធ្នូរហូតមកដល់ពេលនេះ ដែលចំនួននេះមានការកើនឡើងទ្វេដងបើប្រៀបធៀបទៅនឹងថ្ងៃធម្មតានាពេលមុនៗ ។
លោក មាស ចន្ថា ប្រធានអង្គភាពផ្តល់ប័ណ្ណបើកបរ និងសុវត្ថិភាពចរាចរណ៍ផ្លូវគោក នៃមន្ទីរសាធារណការ និងដឹកជញ្ជូន រាជធានីភ្នំពេញ បានឲ្យដឹងថា ក្នុងរយៈពេលប៉ុន្មានសប្តាហ៍ចុងក្រោយនេះប្រជាពលរដ្ឋបានសម្រុកទៅប្រឡងយកប័ណ្ណបើកបរទោចក្រយានយន្ត និងប័ណ្ណបើកបរយានយន្តយ៉ាងច្រើនកុះករខុសប្លែកពីធម្មតា ដោយពីមុនមានត្រឹមតែជាង១០០នាក់ ប៉ុន្តែឥឡូវមានរហូតដល់ទៅជិត៣០០នាក់ក្នុងមួយថ្ងៃ នេះជាចំនួនមួយដែលមិនធ្លាប់មានពីមុនមក ។ ជាក់ស្តែងនៅព្រឹកថ្ងៃទី២៣ធ្នូស្អែកនេះ ប្រជាពលរដ្ឋរាជធានីភ្នំពេញបាននាំគ្នាទៅប្រលងធ្វើប័ណ្ណបើកបររថយន្តចំនួន២៩០នាក់ កើនទ្វេដង បន្ទាប់ពីច្បាប់ចរាចរណ៍ថ្មីគ្រោងចាប់ផ្តើមអនុវត្តន៍នៅថ្ងៃទី១ ខែមករា ឆ្នាំ២០១៦នេះ ។
លោក មាស ចន្ថា បានឲ្យដឹងទៀតថា ចាប់ពីឆ្នាំ២០០៧ ដល់ឆ្នាំ២០១៥នេះ អ្នកដែលបានទៅធ្វើប័ណ្ណបើកបរនៅទូទាំងរាជធានីភ្នំពេញ សម្រាប់ប័ណ្ណបើកបរម៉ូតូមានជិត៧០០០នាក់ និងប័ណ្ណបើកបររថយន្តមាន១១២.០៨៧នាក់ ។ ចំពោះអ្នកដែលចុះឈ្មោះក្នុងការប្រឡងយកប័ណ្ណបើកបរបាន ត្រូវភ្ជាប់មកជាមួយនូវអត្តសញ្ញាណប័ណ្ណ សៀវភៅគ្រួសារ ឬសំបុត្រកំណើត ហើយមានការបញ្ជាក់ពីសាលាបង្រៀនបើកបរផងដែរ ៕
ចែករំលែកព័តមាននេះ